Ólafur Kjartan býr í skógarkofa utan við borgina Bayreuth í Þýskalandi, ásamt konu sinni. Í byrjun heyrist ómur af rödd hans í símanum – en hringir til baka. „Ég er í hálfgerðri eyðimörk þegar kemur að netsambandi en veit um nokkra punkta og er kominn í einn,“ segir hann glaðlega.

Hin velþekkta Wagnerhátíð í Bayreuth hefur verið söngvettvangur Ólafs Kjartans síðustu vikur þar fer hann með hlutverk Biterolfs í Tannhäuser. „Við sem erum á sviðinu mættum hér 1. júní. – Ég er líka við æfingar á nýrri uppfærslu á Niflungahringnum, var til dæmis að æfa Ragnarök í morgun fyrir Hringinn næsta sumar sem ég mun líka syngja 2023, ef allt fer samkvæmt áætlun. Þetta er þriggja mánaða úthald, ég get pakkað saman og farið heim síðasta dag ágúst, það sama verður uppi á teningnum tvö næstu sumur og kannski lengur – hver veit.“

Allir í prufur daglega

Ólafur Kjartan segir allt takmörkunum háð á hátíðinni þetta árið vegna Covid. „Það er gríðarlegur fjöldi sem kemur að hátíðinni, tvær hljómsveitir, tveir kórar og aragrúi af sólóistum, fyrir utan fólkið sem sér um uppsetningu, tækni- og fræðslumál. Allir þurfa að fara í prufur daglega. Áhorfendafjöldinn er skorinn niður um rúmlega helming, miðað við fullt hús, nú mega vera 900 gestir á hverri sýningu, allir með grímur, bólusetningarvottorð og ný test. Við þátttakendur erum þakklátir fyrir þessa fyrirhöfn því við fáum að hafa vinnu.“

Vel ættaður stjórnandi

Bayreuth-hátíðin er ein af elstu óperuhátíðum heims. Hún hefur verið við lýði í vel á annað hundrað ár og er eingöngu tileinkuð óperum Richards Wagner, enda reisti hann sjálfur óperuhúsið utan um sín verkefni, að sögn Ólafs Kjartans. „Þetta er gríðarlega fallegt hús og það er einstakt hvernig Wagner lét hanna það til að stýra hljómburðinum. Núna er því stjórnað af Katharinu Wagner, afkomanda hans, og Franz Liszt. Þegar maður vinnur með henni skreppur tónlistarsagan saman, manni finnst allt hafa gerst í gær!“

Miklir biðlistar eru jafnan eftir miðum á hátíðina, sumir bíða í mörg ár, að sögn Ólafs Kjartans. „Hingað kemur fólk úr öllum hornum heims, bæði hlustendur og flytjendur. Þetta er stórt í sniðum og mikið apparat sem er magnað að taka þátt í. Margir leigja út húsin sín hér yfir sumarið, því fjölskyldur reyna að gera úr þessu sumarfrí í leiðinni. Við hjónin leigðum skógarkofa og höfum það fínt!“

Svolítið flökkulíf

Kona Ólafs Kjartans er Sigurbjörg Bragadóttir, sjálfstætt starfandi kjólaklæðskeri. Þau eiga heimili í Berlín en bjuggu lengi í Saarbrücken í Þýskalandi, þar sem Ólafur Kjartan var fastráðinn í mörg ár. „Fjölskyldan tíndist til mín þangað í bútum. Tvö eldri börnin og öll barnabörnin eru komin til Reykjavíkur aftur en yngri dóttirin er hjá okkur í Berlín. Þetta hefur verið svolítið flökkulíf, það tilheyrir þessu fagi. Það er annað hvort fastráðning eða lausamennska, eða „frílans“ sem er fína orðið yfir atvinnuleysi. Núna gengur vel og ég hef svo sem haft nóg að gera en var lengi að koma mér upp í þann flokk sem ég stefndi að, sem er sá sem ég starfa í í dag. Þegar óperubransinn lifnar aftur er útlitið bjart hjá mér. Ég mun syngja hlutverkið Wotan (Óðin) í Valkyrju eftir Wagner á Listahátíð í Hörpu í febrúar 2022, það er verkefnið sem ég hlakka hvað mest til á komandi starfsári,“ segir söngvarinn.

Miðakaup krefjast fyrirhyggju

Að sjálfsögðu fóru nokkrir Íslendingar á hátíðina í ár að fylgjast með okkar manni. „Það var mjög ánægjulegt að á minni frumsýningu var Selma Guðmundsdóttir, formaður Wagnerfélagsins, mætt og Gunnar Snorri Gunnarsson sendiherra og svo slangur af minni fjölskyldu,“ segir stórsöngvarinn. „Ég er líka búinn að hlera að það ætli einhver hópur að mæta á frumsýningu Hringsins næsta sumar. Slíkt þarf að skipuleggja með árs fyrirvara en í Wagnerfélaginu er þekking og reynsla og þangað ætti fólk að snúa sér til að fá ráðleggingar, ef áhugi er á miðum.“ ■

Fjölskyldan á frumsýngu: Sigurður Rúnar Jónsson, Ásgerður Ólafsdóttir, Sigurbjörg Bragadóttir og Brynja Ólafsdóttir. Mynd/Isolde Stein-Leibold
Í hlutverki Biterolf í Tannhäuser.8Mynd/Isolde Stein-Leibold