Arna Guðlaug Einarsdóttir, kökuskreytingameistari með meiru, er dolfallinn aðdáandi hrekkjavökunnar og veit ekkert skemmtilegra en að slá upp hrekkjavökuboði með öllu tilheyrandi.

Arna skreytir heimilið hátt og lágt, sker út grasker með fjölskyldunni, velur búningaþema ár hvert og til að toppa hrekkjavökuna heldur Arna vanalega heljarinnar hrekkjavökumatarboð þar sem allar veitingarnar eru tengdar hrekkjavökunni á einn eða annan hátt. Þá eru kræsingarnar bæði ógurlegar og tryllingslegar.

Ertu til í að svipta hulunni af hrekkjavökuþemanu ykkar í ár?

„Í ár er Day of the dead-þema,“ segir Arna og er orðin mjög spennt. „Og ég verð að sjálfsögðu Bella Muerte.“

Frumlegar paprikurnar í graskersgervinu.

Appelsínuguli liturinn heillaði

„Þegar ég bjó í Brussel, sem er mjög fjölþjóðlegt samfélag, smitaðist ég af þeim venjum og siðum sem í kringum mann voru. Þar byrjaði ég að kaupa smá hrekkjavökuskraut á hverju ári. Svo fór maður að finna verslanir sem seldu meira gæðaskraut og ég fór að safna því. Það sem heillaði mig fyrst var appelsínuguli liturinn en á þessum árstíma eru haustlitirnir allsráðandi.“

Kaupir þú nýtt hrekkjavökudót árlega?

„Já, alltaf eitthvað smá. Mér finnst gaman að skipta út, vera með sitthvert þemað ár frá ári.“

Takið þið á móti þeim sem koma og banka upp á og biðja um gott eða grikk?

„Já, mér finnst alveg frábært að sjá hvað krakkar og unglingar leggja mikið í búningana. Að sjálfsögðu eiga þeir alltaf að vera frekar ógnvekjandi á þessum degi, prinsar og prinsessur eiga heima á öskudeginum.“

Hverjar verða kræsingarnar í ár sem munu trylla gestina?

„Ég er alltaf með mikið af smáréttum á boðstólum eða svokallaðan fingramat – eða mat sem lítur út eins og afsagaðir fingur. Framsetningin skiptir mestu máli, réttirnir þurfa ekki að vera svo flóknir heldur skiptir mestu máli að þeir líti hrekkjavökulega út.“

Ertu til í að deila með lesendum ómótstæðilegum og ógurlegum kræsingum?„Í ár vann ég mikið með paprikur í framsetningu. Og hér er dæmi um tvo rétti sem eru bornir fram í papriku. Annars vegar kjúklingaréttur sem er borinn fram í appelsínugulum paprikum sem eru skornar út eins og grasker á Hrekkjavökunni.

Hins vegar einfalt og gott salat sem hægt er að bera fram eitt og sér eða sem meðlæti með öðrum réttum.“

Skemmtilega uppsettar paprikur.

Kjúklingaréttur

6 appelsínugular paprikur

2-3 bollar af elduðum kjúklingi

1 bolli salsa

1 bolli svartar baunir

1 bolli soðin hrísgrjón

Taco krydd

Byrjið á að skera toppinn af paprikunni og hreinsa paprikuna að innan.

Takið því næst beittan hníf og skerið andlit út í paprikuna líkt og maður gerir við grasker á Hrekkjavökunni.

Skerið kjúklinginn niður í litla bita og kryddið með Taco kryddi og eldið á pönnu.

Bætið því næst salsasósunni, svörtu baununum og elduðu hrísgrjónunum út á pönnuna. Blandið þessu vel saman. Fyllið paprikurnar með kjúklingaréttinum og berið fram.

Arna Guðlaug hefur sett á borð þessa skemmtilegu ritvél í tilefni dagsins með hryllingshöndum.

Salat í papriku

Paprikur í lit að eigin vali

Einn poki salatblanda

Slatti af kirsuberjatómötum

Ein gúrka, notuð bæði í salatið og sem skraut

Svartar ólífur

Lítil dós af gulum baunum

Eða hvað sem er sem þið viljið í salatið

Ólífuolía og balsamik edik

Grænar ólífur – augu á paprikuna

Salatið er bara útbúið á hefðbundinn hátt, öll hráefnin skorin smátt niður og blandað saman í stórri skál. Toppurinn af hverri papriku er skorinn af til að gera lok á hverja og eina. Takið tannstöngul og festið tvær grænar ólífur á lokin sem augu. Skerið eða notið ostaskera til að útbúa langa þunna tungu úr gúrkunni. Fyllið paprikur með salatinu og skellið tungunni á milli papriku og loksins. Berið fram á ógurlegan hátt.

Það kennir ýmissa grasa í hrekkjavökusafninu hennar Örnu.
Arna Guðlaug hefur safnað ýmsum munum sem tengjast hrekkjavökunni.
Skemmtilegt skraut á hrekkjavöku.