París var alltaf efst á óskalistanum hjá fatahönnuðinum Bergi Guðnasyni þegar hann hóf að sækja um starfsnám eftir útskrift úr fatahönnun frá Lista­háskólanum vorið 2017. Hann hefur dvalið þar undanfarið ár ásamt unnustu sinni, Margréti Rajani Davíðsdóttur, og starfað hjá tískuhúsinu Haider Ackermann og síðar hjá Acne Studios þar sem hann starfar í dag. Álagið er oft mikið en vinnan er um leið skemmtileg og lærdómsrík auk þess sem skötuhjúin njóta þessa að búa í heimsborginni París sem iðar af lífi allan sólarhringinn.

„Ég heimsótti París fyrst fyrir um níu árum og varð strax heillaður af borginni, t.d. sögunni, arkitektúrnum og menningunni. París er tískuborg heimsins og mörg af þekktustu tískuhúsunum eru hér. Eftir útskrift eyddi ég því allri minni orku í að komast í samband við þessi tískuhús og hönnuðina sem vinna þar. Tískuhúsin auglýsa sjaldan störf svo það eina sem virkar er að hafa beint samband við hönnuðina í hönnunarteymunum eða senda á ráðningarteymin. Það er ansi erfitt að fá svar til baka þegar maður er frá litla Íslandi en það hafðist þó að lokum. Gamli kennarinn minn úr Listaháskólanum, Linda Björg Árnadóttir, var einnig mjög hjálpsöm. Hún bjó lengi í París og aðstoðaði mig við að komast í samband við aðila í bransanum sem ég er mjög þakklátur fyrir.“

Ótrúleg upplifun

Fyrstu mánuðina í París starfaði Bergur hjá Haider Ackermann sem er einn af hans uppáhaldshönnuðum. „Það var því ótrúleg upplifun að vera í kringum hann daglega og vinna með honum. Hann hefur m.a. þá reglu að láta hönnunarteymið borða alltaf hádegismat saman. Þeim stundum mun ég seint gleyma, þar sem Haider fór alltaf á kostum í frásögnum sínum af frægum Hollywood vinum sínum, t.d. Kardashian fjölskyldunni og Önnu Wintour. Annars fóru fyrstu 2-3 mánuðirnir í að læra inn á bransann í París, hvernig hann virkar og hvernig maður á að beita sér. Tískubransinn er nefnilega mjög sérstakur í París og eru ákveðnar óskráðar reglur sem fólk fer eftir en erfitt er koma í orð hverjar eru.“

Að mörgu er að huga í hröðum heimi tískunnar, sérstaklega þegar kemur að undirbúningi á tískusýningu fyrir stærsta svið borgarinnar, Paris Fashion Week. „Við sýndum bæði herra- og dömulínuna á sömu sýningunni í september en það er í fyrsta sinn sem Haider gerir það. Það er ótrúlega sérstök tilfinning að vinna hörðum höndum dag og nótt og svo stendur sýningin yfir í um 15 mínútur. Meðan allir standa upp og klappa vorum við baksviðs í spennufalli, drukkum nokkur kampavínsglös og fórum síðan heim og sváfum í sólarhring.“

Verkefni Bergs hjá Haider voru eins misjöfn og þau voru mörg að hans sögn. „Ég var settur í þau verkefni sem þurfti að græja hverju sinni, allt frá því að búa til hugarheim og litapalettu fyrir línuna eða hlaupa á Hotel George V og pikka upp kjól fyrir Naomi Campbell.“

Tvö ólík fyrirtæki

Í október á síðasta ári færði Bergur sig um set og hóf starfsnám hjá Acne Studios sem hann segir mun þekktara og aðgengilegra merki en Haider. „Þær vörur eru á viðráðanlegra verði og eru seldar í mun fleiri búðum auk þess sem Acne Studios er með eigin búðir út um allan heim. Það var góð reynsla að fá að starfa hjá svona ólíkum fyrirtækjum. Hjá Acne er t.d. séð mjög vel um starfsfólkið með alls konar fríðindum, enda skandinavískt. Hjá Acne hef ég aðallega verið að vinna að hönnun á úlpum og alls kyns yfirhöfnum svo ég nefni eitthvað. Ég hef stundum ferðast til höfuðstöðva þeirra í Stokkhólmi og sótt kynningarfundi með eiganda Acne Studios. Þessar ferðir hafa verið mjög lærdómsríkar og dýrmæt reynsla. Síðan ég byrjaði hjá Acne í október vann ég að haustlínu merkisins sem var frumsýnd fyrir stuttu í Palais de Tokyo. Nú erum við að vinna hörðum höndum að sumarlínu 2020. Sú vinna fer vel af stað og línan verður mjög skemmtileg.“

Hann segir fyrirtækin tvö vera mjög ólík, raunar eins og svart og hvítt. „Haider er mun minna fyrirtæki þar sem bara nokkrir starfsmenn starfa. Þar er meiri glamúr, dýrari flíkur og vörurnar meira nær hátísku. Það er líka minna vöruúrval hjá Haider og talsvert meiri vinna og pæling á bak við hverja einustu flík.“

Hann segir erfitt að bera saman heimsborgina París og litla Ísland. „Það er kraftur í íslenskri tísku í dag. Það eru margir hæfileikaríkir fatahönnuðir en við erum bara svo fámenn þjóð. Markaðurinn er lítill og ekki mikið af starfsmöguleikum í boði. Mér finnst gaman að sjá að það eru þó nokkrir ungir fatahönnuðir á Íslandi að hanna sínar eigin vörur. Svo erum við auðvitað með flott fyrirtæki eins og 66°Norður. Annars er í raun ekki hægt að bera saman Reykjavík og París. Þetta eru gerólíkir heimar.“

Með keppnisskap

Senn líður að lokum dvalar hans hjá Acne Studios og um þessar mundir er hann í miðju umsóknarferli fyrir næsta starfsnám. 

„Ég var í fótbolta til tvítugs þannig að ég hef mikið keppnisskap og hef bara verið að eltast við stóru þekktu húsin hér í París. Það er erfitt að komast í starfsnám þar sem hundruð fatahönnuða útskrifast um allan heim á hverju ári. Oft taka tískuhúsin bara einn til tvo starfsnema á ári, stundum enga, svo það er erfitt að komast að. Ég hef verið mjög heppinn og er óendanlega þakklátur fyrir að hafa fengið að komast í starfsnám tvisvar í röð í París. Það kitlar mig líka alltaf aðeins að koma heim og prófa að stofna mitt eigið merki og sjá hverjar viðtökurnar verða. Eins og staðan er núna er ekkert ákveðið heldur er ég að skoða möguleikana hér í París og í öðrum borgum.“

Álagið getur verið mikið í tískubransanum og segir Bergur það koma fyrir, sérstaklega fyrir sýningar, að það sé unnið alla nóttina og ekkert sofið. 

„Inn á milli fæ ég þó frítíma en hann nýti ég mest með Margréti. Við erum dugleg að njóta borgarinnar, t.d. með því að fara á söfn og alls konar sýningar. Hér er alltaf eitthvað um að vera svo það er sannarlega erfitt að láta sér leiðast. Okkur finnst gaman að fara í hönnunarbúðir en þar fæ ég mikinn innblástur. Svo er frönsk matarmenning náttúrulega stórkostlega góð svo við erum dugleg við að fara út að borða hér í París.“