Nanna Rögnvaldardóttir heldur úti blogginu Konan sem kyndir ofninn sinn. Þar má finna margar frábærar uppskriftir, meðal annars þetta salat sem Nanna gaf okkur leyfi til að birta til að gefa hugmyndir um hangikjöt á annan veg en við eigum að venjast. Nanna miðar uppskriftina við fjóra og notar 80–100 g af tvíreyktu hangikjöti. Hún var með sauðahangikjöt úr Mývatnssveit, 5–6 þurrkaðar apríkósur (mjúkar, ekki harðþurrkaðar), 4–5 gráfíkjur (líka mjúkar), væna lúku af klettasalati og 1/2 granatepli.

„Ég skar hangikjötið í þunnar, litlar sneiðar (best að það sé hálffrosið, þá gengur betur að skera það þunnt) og apríkósurnar og gráfíkjurnar í bita eða þunnar sneiðar og blandaði saman við klettasalatið á diskunum. Svo skóf ég fræin úr granateplinu og stráði þeim yfir,“ segir hún. „Síðan hrærði ég saman 2 msk. af góðri olíu, 2 tsk. af góðu balsamediki, nokkra dropa af hlynsírópi og ögn af pipar og salti og dreypti yfir. Ég notaði blöndu af hnetu- og truffluolíu, 40 ára gamalt balsamedik og ekta, kanadískt hlynsíróp.

Hangikjötssalat með ávöxtum og granateplum. Mjög ljúffengt og ekki síður fallegt.

Hangikjötssalat með ávöxtum og granateplum

80–100 g tvíreykt hangikjöt

5–6 þurrkaðar apríkósur

4–5 gráfíkjur

Lófafylli af klettasalati

½ granatepli

2 msk. góð olía

2 tsk. gott balsamedik

Nokkrir dropar af hlynsírópi Salt og Pipar