Karen Jónsdóttir, Kaja eins og hún er ávallt kölluð, frumkvöðull, stofnandi og eigandi Matarbúrs Kaju og Café Kaju, býður upp á safahreinsun nokkru sinnum á ári sem hefur notið mikilla vinsælla.

Fyrsta safahreinsun haustsins er í gangi núna og færri komust að en vildu, svo vinsælir eru safarnir hennar Kaju orðnir. Það er ekki að ástæðulausu sem þessi safahreinsun er jafn vinsæl og raun ber vitni. Fram undan eru tvö námskeið til viðbótar í haust í safahreinsuninni, 17. september og síðan þriðja og síðasta námskeið haustsins 1. október.

Tilurð og árangurinn

Þegar kemur að því að framleiða safana eins og allt það sem Kaja framleiðir og gerir er aðaláherslan á lífrænt hráefni enda rekur Kaja eina lífrænt vottaða kaffihús landsins. Við fórum og heimsóttum Kaju og fengum hana til að segja okkur nánar frá safahreinsuninni.

Þú hefur verið að bjóða upp á safahreinsun, segðu aðeins frá tilurð hennar.

„Eftir að ég veiktist leitaði ég allra leiða til að ná heilsu að nýju. Eftir lestur og yfirlegu varð ég nokkuð sammála þeim kenningum að hreinsa þurfi líffærakerfið annað slagið. Eftir margar prufur og leit að hreinsun sem hentaði mér, rakst ég á bók sem heitir Sjö daga safakúr, en þessi safakúr grundvallaðist meira sem megrun heldur en hreinsun. Ég fór í gegnum þennan safakúr nokkrum sinnum, breytti og þróaði þannig að hann hentaði mér og hefði hlutverk hreinsunar, ekki megrunar.“

Eru uppskriftirnar að söfunum þínar?

„Það eru grunnuppskriftir en þær eru þó breytilegar eftir því hvaða hráefni fást en ég nota einungis lífræn hráefni í safana eða íslensk sem eru ræktuð villt eða án eiturefna. Enda er það grunnurinn að hreinsa út, að nota „hreinan“ mat.“ Kaja segir að sér finnist það alveg nauðsynlegt, bæði andlega og líkamlega, að fara í safahreinsun. Ástæðan sé sú að það eigi sér stað svo mikil endurnýjun og þetta sé frábær leið til að núllstilla sig. „Til að losna við bjúg og bólgur auk þess sem þetta auðveldar fólki líka að hefja og ná tökum á breyttum lífsstíl,“ segir Kaja.

Hreinsa út eiturefni

Kaja segir að tilgangur með safahreinsuninni sé fyrst og fremst að minnka álag á meltinguna og gefa líkamanum tóm til að hreinsa eiturefni út úr líkamanum og vinna svolítið að viðgerðum.

Safahreinsun er átta daga prógramm sem samanstendur af þriggja daga undirbúningi og síðan fimm dögum þar sem viðkomandi neytir einungis safa, ávaxta og fræja. „Safarnir eru allir með trefjum og eru þeir samtals 25 og enginn eins, þar sem hver safi á að hafa sína virkni. Í fyrri hluta hreinsunarinnar eru notaðir ávextir og grænmeti sem hafa losandi og hreinsandi áhrif og í seinni hlutanum eru hráefnin til að byggja upp. Á fimmta degi verður uppljómun, það er reynsla þeirra sem hafa tekið þátt í þessu námskeiði. Prógrammið fyrir safahreinsunina er í boði nokkrum sinnum á ári, í fyrstu var það tvisvar á ári en eftirspurn eftir safahreinsun hefur aukist og því erum við farin að bjóða oftar upp á safahreinsunina.

Þriggja daga undirbúningur

Samsetningin skiptir miklu máli, bæði til að ná góðu bragði, upplifun og svo hreinsandi þættinum.“

Þarf að undirbúa sig fyrir safahreinsunina?

„Það eru teknir þrír dagar í undirbúning þar sem allt kjöt, fiskur, sykur, glúten og mjólkurvörur eru teknar út.“

Geta einhverjar aukaverkanir fylgt því að fara í safahreinsunina?

„Aukaverkanir geta verið misjafnar og fara eftir því hvar fólk er statt í lífinu og þeim lífsstíl sem það hefur tileinkað sér. Þeir sem eru vanir að drekka mikið kaffi eða koffeindrykki geta fundið fyrir hausverk og þreytu svo dæmi séu tekin. Enda eru viðbrigði að taka út koffeindrykki í fimm daga en vel þess virði. Aukaverkanir eru mjög persónubundnar og sumir finna strax fyrir ferskleika bæði á líkama og sál.“

Betri líðan

Hvaða árangri getur fólk náð með safahreinsuninni?

„Í sumum tilfellum er hægt að losna við lyf vegna ýmissa lífsstíls-sjúkdóma en það á einungis við ef fólk heldur áfram að vera á beinu brautinni. Betri líðan á allan hátt, léttara skap, bólguminnkun og svo mætti halda áfram.“

Hægt er að fræðast frekar um safahreinsunina hjá Matarbúri Kaju.

Kaja notar einungis lífræn hráefni í safana.