Rifsberjahlaup er einstaklega gott, til dæmis með ostum, á ristað brauð eða með villibráð, önd eða reyktu kjöti. Það er einfaldara en margur heldur að búa til rifsberjahlaupið, bara gefa sér smá tíma. Einnig er nokkuð misjafnt hvernig fólk gerir það, sumir vilja nota hleypi á meðan aðrir segja að þess þurfi ekki. Sumir sjóða berin með stönglum og smá vatni í hálftíma, sía soðið með klút og sjóða það síðan með sykri. Aðrir setja allt í einn pott og sía síðan. Áður fyrr var meiri sykur settur með rifsinu heldur en nú er gert. Í þessari uppskrift er 700 g sykur á móti einu og hálfu kílói af berjum.

Hér er dönsk uppskrift af rifsberjahlaupi

1½ kg rifsber með stönglum, hreinsið

3 dl vatn

700 g sykur

Þetta er lítil uppskrift sem passar í um það bil tvær krukkur. Látið vatn og rifs í pott og látið malla í 30 mínútur. Sigtið saftina frá í gengum hreinan bómullarklút. Pressið klútinn í lokin til að ná sem mestum safa frá berjunnum. Setjið hreinu saftina í pott ásamt sykrinum. Látið suðuna koma upp og látið smámalla í 30-40 mínútur eða þar til þetta verður að hlaupi.

Ef hlaupið stífnar ekki látið þá suðuna koma aftur upp.

Skolið krukkur með sjóðandi vatni. Sumir setja örlítið koníak í krukkurnar og veltið því í þeim til að sótthreinsa enn betur.

Setjið hlaupið í krukkurnar og lokið strax. Látið kólna á borði áður en þær eru settar í kæliskáp.

Bláberjahlaup eða -sulta eftir því sem fólk vill. Nú er tími til að tína berin.

Bláberjahlaup

Þeir sem eru svo heppnir að komast í gott bláberjalyng ættu endilega að búa til bláberjahlaup. Í góðu veðri er ótrúlega skemmtilegt að tína ber og um að gera að láta börnin hjálpa til við tínsluna. Svo er hægt að baka pönnukökur og borða þær með ljúffengri bláberjasultu.

½ kg bláber

1 dl vatn

4 dl sykur

¼ poki hleypir

Hreinsið berin og setjið í pott ásamt vatninu. Látið suðuna koma upp og sjóðið í 6-7 mínútur. Þá er ágætt að nota kartöflustöppu og músa berin svo safinn komi allur úr. Nú má velja hvort maður síar berin í gegnum bómullarklút eða heldur þeim og úr verður sulta. Ef þetta á að vera sulta er sykurinn settur saman við án þess að sía. Ef berin eru síuð þarf að vigta safann og sjá hversu mikinn sykur þarf að nota og hleypi. Sjóðið aftur upp og látið malla þar til þetta fer að þykkna í 5-15 mínútur. Fer eftir hversu þroskuð berin eru.

Jarðarberjasulta er mjög góð út á jógúrt en líka með pönnukökum.

Jarðarberjasulta

Veljið góð jarðarber þegar sulta er gerð. Best að þau séu vistvæn.

1 kg jarðarber

750 g sykur

1 sítróna

Hitið ofninn í 200°C. Setjið sykurinn í eldfast mót og bakið hann í 20 mínútur. Skolið berin og skerið niður. Setjið berin í pott og hitið upp. Hrærið. Þegar berin eru orðin saftleg er sykrinum bætt saman við og allt látið malla í nokkrar mínútur. Þegar sultan er farin að búbla er hún tekin af hitanum og smá sítrónusafi kreistur yfir.

Sjóðið krukkur og setjið sultuna strax í og lokið. Kælið á borði áður en sett er í ísskáp. Það er gott að nota jarðarberjasultu út á gríska jógúrt, á pönnukökur eða ristað brauð.