Umsjónarmaður gönguferðanna er Kolbrún Björnsdóttir, lærður leiðsögumaður með óbilandi ást á útiveru. Hún segir stemninguna í hópnum góða og að vinaböndin styrkist með hverri gönguferð. Verkefnið var sett á ís í vetur vegna COVID eins og annað starf Ferðafélagsins, en fór svo aftur af stað nú um miðjan september.

„Þannig að segja má að við séum nýbyrjuð aftur og bjóðum öll áhugasöm með okkur,“ segir Kolbrún.

„Hugsanlega hefur þetta ástand einhver áhrif en þá er gott að hafa í huga að það er fátt betra fyrir okkur en að hreyfa okkur úti í náttúrunni. Nema þá að hreyfa okkur úti í náttúrunni í skemmtilegum félagsskap. Það styrkir svo sannarlega ónæmiskerfið.“

Kolbrún segir hópinn ótrúlega skemmtilegan. Fólkið kemur úr ólíkum áttum en á það sameiginlegt að njóta þess að vera úti.

„Allir þátttakendurnir eru í góðu gönguformi, við göngum allaveganna frekar rösklega og stundum líður mér eins og ég þurfi að hafa mig alla við,“ segir Kolbrún hlæjandi.

Kolbrún er leiðsögumaður hópsins sem hún segir mjög skemmtilegan, en þátttakendur koma úr öllum áttum.

„En það þarf enginn að óttast að vera skilinn eftir, við erum alls ekki að flýta okkur og njótum þess líka að spjalla. Þetta eru fyrstu göngurnar mínar með þessum hópi og ég get með sanni sagt að ég hlakka til hverrar göngu. Mér finnst eins og ég sé að eignast fullt af skemmtilegum vinum sem eru fullir af visku. Ég kem allaveganna aldrei að tómum kofanum ef það er eitthvað sem ég er að velta fyrir mér og það er eiginlega magnað hversu mikil þekking er innan hópsins, á öllu á milli himins og jarðar. Þetta eru reynsluboltar í lífinu sem eru alger forréttindi að fá að ganga með.“

Frábær hreyfing og yndislegt fólk og félagsskapur

Einn af þátttakendunum í gönguhópnum er Steinunn Steinarsdóttir. Steinunn er vanur göngugarpur en hún er félagi í Ferðafélagi Íslands og hefur í gegnum árin farið í lengri og styttri gönguferðir með félaginu.

„Ég er fyrir stuttu byrjuð að taka þátt í þessum gönguferðum eldri borgara. Ég tek þátt í þeim vegna þess að þær henta eldra fólki mjög vel hvað gönguleið og hraða snertir,“ segir Steinunn og bætir við að þær séu líka á góðum tíma.

„Félagsskapurinn er frábær, þetta er yndislegt fólk og skemmtilegt. Það er mikið spjallað og hlegið og auðvitað leyst úr heimsmálum hinnar líðandi stundar.“

Steinunn gengur mikið á fjöll, en hún er nýfarin að taka þátt í gönguferðum eldri borgara með Ferðafélaginu.

Steinunn segir að gönguhópurinn gefi sér frábæra hreyfingu og útivist sem henti henni mjög vel.

„Og ekki síst félagsskap og nærveru annarra, sem er okkur öllum nauðsynleg til að líða vel,“ bætir hún við.

Hópurinn hittist tvisvar í viku, á mánudögum og fimmtudögum klukkan 10. Á mánudögum við Árbæjarlaug og á fimmtudögum við Perluna.

„Við förum ólíkar leiðir um svæðið og veljum þær aðeins eftir veðri,“ segir Kolbrún.

„Og svo framarlega sem enginn í hópnum er að flýta sér, þá nýtum við okkur það stundum ef veður er gott að ganga aðeins lengur en þessar 60-90 mínútur sem gert er ráð fyrir.“

Í ferðunum fræðist hópurinn í leiðinni um svæðið sem er gengið á.

„Ég þekki nú aðeins til í Árbænum, þar sem ég ólst þar upp, en á svæðinu í kringum Perluna höfum við meðal annars nýtt þau fjölmörgu skilti sem þar er að finna og segja frá sögu svæðisins,“ útskýrir Kolbrún.

„En svo erum við að spá í að færa okkur örlítið á milli staða. Okkur langar allaveganna að heimsækja aðeins stígana í Heiðmörk.“

Kolbrún segir einfalt að vera með í gönguhópnum en fyrir þau sem hafa áhuga á að vera með í þessum skemmtilega félagsskap, eru allar upplýsingar um hann á heimasíðu Ferðafélags Íslands og hægt er að skrá sig þar, eða með því að hringja á skrifstofu FÍ.