Menningarhátíð Seltjarnarness var haldin fyrr í þessum mánuði þar sem fjölbreyttir viðburðir voru í boði fyrir alla aldurshópa. Einn þeirra viðburða sem voru vel sóttir var LEGO-sýning Péturs Breiðfjörð Péturssonar sem hann hefur haldið í bílskúr fjölskyldunnar á Menningarhátíðum undanfarinna ára við mikla gleði yngri og eldri gesta enda tengja nær allir landsmenn við gömlu góðu LEGO-kubbana. „Ég tók fyrst þátt í Menningarhátíð Seltjarnarnesbæjar 2017 og það virðist alltaf gleðja gesti jafn mikið að skoða safnið mitt. LEGO hefur verið til á heimilum flestra landsmanna og gestir kannast við margt sem ég er að sýna og þá rifjast upp góðar minningar. En um leið er auðvitað fullt af munum sem gestir eru að sjá í fyrsta sinn, bæði nýtt og gamalt, og gleður unga sem aldna.“

Pétur Breiðfjörð Pétursson safnar LEGO og á um 600 LEGO-sett í bílskúrnum heima.
LEGO Expert Volkswagen T2 Autocamper. Sett nr. 10279 og inniheldur 2207 kubba.

Byrjaði með jólagjöf

Áhugi Péturs á LEGO byrjaði jólin 1982 þegar hann fékk sitt fyrsta stóra LEGO-sett (nr. 8860) frá foreldrum sínum í jólagjöf. „Þetta var bíll sem ég byrjaði strax að setja saman á aðfangadagskvöld og hætti ekki fyrr en ég var búinn að setja hann saman snemma á jóladagsmorgun. Upp frá því fékk ég alltaf LEGO í afmælis- og jólagjöf. Á þessum tíma var pabbi vinar míns oft í útlöndum vinnunnar vegna og keypti mjög oft sitt LEGO-tæknisettið hvort fyrir okkur tvo.“

Hann segist alla tíð hafa verið mikill LEGO-tækni áhugamaður. „Ég tók oft strætó niður í bæ til að kíkja í leikfangabúðina Liverpool á Laugavegi og fór upp á aðra hæð til að skoða LEGO-settin. Það kom oft fyrir á þessum árum að ég hafði safnað pening til að kaupa nýtt LEGO en af því ég hafði líka nýtt strætópeninginn í kaupin þurfti ég að labba heim út á Seltjarnarnes með nýja dótið.“

LEGO Technic 8860 var fyrsti stóri LEGO bílil Péturs en hann fékk hann í jólagjöf frá foreldrum sínum sem strákur.
Nasa Space Shuttle Discovery inniheldur 2.354 kubba. Kom út 2021.

Boltinn byrjar að rúlla

Pétur var þó kominn á fullorðinsár þegar hann byrjaði að safna LEGO með formlegum hætti. „Það má segja að boltinn hafi byrjað að rúlla þegar dóttir mín flutti til Danmerkur árið 2012. Hún gaf mér LEGO Technic þyrlu (nr. 9396) í afmælisgjöf og þá kviknaði áhugi minn aftur á fullu. Frá þeim degi varð ekki aftur snúið og nú eru settin að nálgast 600. Á undanförnum árum hef ég keypt bæði ný og notuð sett þegar ég er staddur erlendis en líka hér heima. Auk þess hef ég fengið gefins sett frá fólki sem vill styðja mig í að halda þessu safni úti og líður betur að vita að settin séu vel varðveitt hjá mér.“

Næsta sett á listanum er LEGO Titanic (nr. 10294) sem kemur í verslanir síðar á árinu. „Það verður stærsta settið í safninu og inniheldur 9.090 hluti enda um 135 sentímetrar að lengd.“

LEGO Technic Crawle Crane inniheldur 1.401 kubb. Kom út 2015 og Pétur keypti hann á Íslandi.
Pétur á mikið úrval bíla, til dæmis fólksbíla, strætisvagna og vörubíla.

Bæði róandi og fræðandi

En hvað gerir þetta áhugamál svona heillandi? Pétur segir það vera bæði róandi og fræðandi að dunda sér með kubbana en um leið krefjist vinnan mikillar einbeitingar. „Það er notalegt að sitja við eldhúsborðið á kvöldin og setja saman sett. Það má segja að þetta sé mín núvitund. Dætur mínar hafa einnig gaman af þessu og eiga þær þó nokkur sett sem eru til sýnis hjá mér. Þær hjálpa mér við að koma þessu öllu saman. Svo má ekki gleyma eiginkonunni sem hvetur mig áfram og er minn helsti styrktaraðili.“

Pétur opnar safnið reglulega sé þess óskað sérstaklega. „Það er alltaf hægt að hafa samband við mig og þá er fundinn tími fyrir heimsókn. Svo kemur nú fyrir að bílskúrsdyrnar séu opnar hjá mér og þá kemur fólk, sem er að ganga, hjóla eða keyra fram hjá, við og kíkir inn.“

Áhugasamir geta fylgt Pétri og safninu á Instagram (@peterslegocollection).

Caterham Seven 62OR inniheldur 773 kubba. Þessi var keyptur í London.
Gestir sýningarinnar tengdu marga muni við æskuminningar sínar.
Svona leit bílskúrinn út þegar Pétur hélt sýninguna á Menningardögum Seltjarnarness fyrr í þessum mánuði.
LEGO Expert - Porsche 911 Turbo og Targa sett nr. 10295. Það eru 1458 kubbar í settinu.