Hér er María Gomez fagurkeri og sælkeri með meiru sem heldur úti bloggsíðunni Paz með dýrindis ísrétt eða gamla góða bananasplittið í jólabúningi sem þið eigið eftir að missa ykkur yfir. Um er að ræða hefðbundið bananasplitt samt sem áður nema með karamellussósu sem María kryddaði með þessum týpísku piparkökukryddum.

„Útkoman er æði, en karamellusósan er silkimjúk og með keim af piparkökubragði. Ef þið viljið hafa smá bit í réttinum getið þið mulið yfir hann piparkökur. Bananasplitt er ísréttur sem mér finnst hafa svoldið gleymst með árunum en guð hvað það er gott,“segir María sem missti sig strax yfir þessum guðdómlega ísrétti.

Í bananasplitti má alls ekki gleyma að hafa með þeyttan rjóma, þá ekki sprauturjóma heldur ekta íslenskan heimaþeyttan rjóma. Í karamellusósuna notaði María Salted caramels frá Walkers. „Þær eru alveg fullkomnar í þessa íssósu og útkoman lætur ekki á sér standa,“ segir María að lokum og hvetur alla sælkera til að prófa þetta bananasplitt í jólabúningi.

FBL Bananasplitt MG 4.jpeg

Bananasplitt

2 vanillu ískúlur

þeyttur rjómi eftir smekk

1 banani

Piparköku karamelluíssósa

150 g eða einn poki Walkers salted caramel karamellur

1 dl rjómi

1 tsk. kanill

½ tsk. engiferkrydd

¼ tsk. múskat (má sleppa, en með ¼ tsk. á ég við rétt botninn á 1 tsk þá mæliskeið).

¼ tsk. negull

¼ tsk. hvítur pipar

½ tsk. vanilludropar

Bananasplittið sett saman

  1. Byrjið á að gera íssósuna með því að setja saman rjóma, karamellur og kryddin í pott og bræða allt vel saman.
  2. Hrærið í af og til og hafið á miðlungshita..
  3. Þegar allt er vel brætt saman leyfið þá sósunni að malla í eins og 5 mínútur til að kryddin fái að njóta sín.
  4. Skerið svo 1 stk. banana í tvennt langsum fyrir miðju.
  5. Setjið tvær vanillu ískúlur á milli bananans á sitthvorn endanum og setjið þeyttan rjóma í miðjuna á milli ískúlana.
  6. Hellið svo karamellusósunni yfir heitri og það má jafnvel mylja smá piparkökur yfir til að hafa enn meira jóla.

Síðan er líka upplagt að skreyta réttinn með piparkökum.

FBL Bananasplitt MG 2.jpeg

FBL María Gomez.jpeg

María Gomez er mikill sælkeri og leggur mikið upp úr því að bera kræsingarnar sínar fram á fallegan og aðlaðandi hátt.