Jóhann Gunnar er þekktur úr þáttunum Allir geta dansað á Stöð 2 en þar sýndi hann eftirminnilega takta í fatavali og er hvorki feiminn við glys né glimmer. Hann er einnig þekktur sem bötler enda starfaði hann sem slíkur á Bessastöðum lengi. Kristín, eða Kiddý, eins og hún er kölluð, starfar sem upplifunar- og þróunarstjóri Þjóðleikhússins en bæði hafa ánægju af fallegum hlutum. Kiddý er menntaður blómaskreytir og framleiðslumaður svo hún leggur sig fram af miklum metnaði við jólaskreytingarnar. Kiddý og Jói ráku blómabúð á árum áður og kunna því vel til verka þegar kemur að blómaskreytingum.

Glæsilegt borðið þar sem litlu hlutirnir skipta öllu máli. Servíettuhringur eins og jólatré.

Hjónin eru sérstaklega samheldin og vinna hlutina í samvinnu. „Kiddý er náttúrlega helst með blómaskreytingarnar. Við erum pínulitlir nördar í þessu. Viljum hafa allt samstætt. Leggjum áherslu á að jólakúlur í skreytingum séu í stíl við skraut í ljósakrónunni og á jólatrénu. Þannig fáum við heildrænt útlit en ekki allt hvað úr sinni áttinni,“ útskýrir Jói. „Stundum erum við með túlípana á borðum, en núna ákváðum við að vera með fallega blómaskreytingu. Hún má þó aldrei vera hærri en 23 cm, til að fólk geti horfst í augu yfir borðið. Oft er ég að elda jólamatinn á meðan hún setur upp borðið með fallegum skreytingum. Við viljum hafa jólaborðið fallegt og erum hrifin af glysi og glimmeri. Um áramótin gerum við svo eitthvað allt annað,“ segir Jói og bætir við að hann sé svo mikill nörd að hann mæli hversu langt hnífapörin eigi að vera frá borðbrún

Jói mælir lengdina frá borðbrún að hnífapörum. Sömuleiðis eru glösin á borðinu í réttri fjarlægð.

Jói segir að þau skreyti matarborðið eftir því hvort bera eigi matinn fram á fötum eða á diskunum. „Það þarf meira pláss þegar maður fer með allan matinn á borðið í skálum og á fati. Við vorum með hvítt, gyllt og silfurlitt að þessu sinni og við erum oftast með þá. Ég hef gaman af því að setja á borð silfur sem amma mín átti. Einnig erum við með gamlar jólaskeiðar og veljum þá fæðingarár okkar. Þetta er því blanda af nýju og gömlu. Síðan röðum við jólasveinum úr Jólahúsinu í Eyjafirði á skenkinn fyrir aftan borðið.“ Jói og Kiddý hafa alltaf verið með möndlugraut með karamellusósu í forrétt á aðfangadag en núna ætla þau að færa hann til hádegis og hafa humar í staðinn. „Við erum alltaf með rjúpu á aðfangadag og síðan erum við með ís á eftir sem er uppskrift frá ömmu Kiddýar. Við viljum halda í gamlar hefðir. Borðum til dæmis eftirréttinn eftir að pakkar hafa verið teknir upp.“

Gamalt sllfur frá ömmu Jóa og jólaskeiðar fá sinn stað á fallegu veisluborðinu.

Jói segir að hann leggi mikið upp úr servíettubrotum og að þessu sinni gerði hann jólatré úr servíettunum. Hann sagðist hafa gúgglað christmas tree napkin fold og fengið upp Youtube-kennslumyndband. „Það var mjög einfalt að gera þetta,“ segir hann. „Við höfum mjög gaman af því að skreyta hjá okkur og sérstaklega núna á þessum skrítnu tímum. Okkur veitir ekkert af að fá smá gleði og birtu inn í lífið. Aðventan er skemmtilegur tími.“

Glæsilegt með jólatré í baksýn.
Það er ekki amalegt að setjast til borðs við þetta borð.
Kristín er lærður blómaskreytir og kann að útbúa fallegar skreytingar með lifandi blómum.