„Þetta er ég. Þetta er ég að finna rætur mínar aftur. Þannig að mér fannst næstum eins og ég hefði ekkert val. Þegar ég las handritið þá fannst mér ég vera búin að vera að bíða eftir einmitt þessu lengur en ég get munað og mér finnst Sjón og Valdimar hafa boðið mér í ferðalag,“ segir sænska kvikmyndastjarnan Noomi Rapace um kvikmyndina Dýrið og ekki síst aðalpersónu hennar, sauðfjárbóndann Maríu.

Dýrið, sem var frumsýnd á Íslandi í gær, er frumraun leikstjórans Valdimars Jóhannssonar, gerð eftir grunnhugmynd hans og handriti eftir Sjón. Myndin gerði stormandi lukku á kvikmyndahátíðinni í Cannes, gagnrýnendur víða um heim hafa ausið hana lofi og hún hefur verið nefnd sem líkleg til stórræða á næstu Óskarsverðlaunahátíð.

Eitthvað sem kemur Noomi ekki á óvart, þótt bandaríska teymið hennar hafi rekið upp stór augu þegar hún sagði þeim að hún „ætlaði að fara til Íslands að gera litla, íslenska mynd sem heitir Lamb, sem væri lítil framleiðsla og engir peningar í þessu,“ segir Noomi þegar Fréttablaðið truflar hana við tökur á vestraþáttunum Django í Rúmeníu.

Falleg skepna fæðist

„Nei, ég meina, ég vissi alltaf að við hefðum gert eitthvað ofboðslega djúpstætt, frumlegt, persónulegt og einkennilega óhugnanlega fagurt,“ segir Noomi og hlær. „Þannig að ég vissi alltaf að við hefðum fætt skepnu, fallega skepnu,“ heldur leikkonan áfram og hláturinn verður enn innilegri.

„Þetta kemur mér því ekki á óvart en ég er kannski svolítið undarandi á hversu margir virðist umfaðma myndina, en mér finnst það hins vegar hafa verið yfirþyrmandi hversu breiður hópurinn er sem hefur tekið myndinni okkar fagnandi og ég er mjög þakklát og hissa,“ segir Noomi og bætir við að viðtökurnar fylli hana auðmýkt.

„Ég kom til bara til Íslands til þess að fæða Maríu og stíga inn í heim Valdimars og Sjóns. Og ég lít bara á allt sem hefur komið í kjölfarið sem stóra gjöf til mín. Upplifunin ein og sér var nóg var nóg fyrir mig, þannig að ég er mjög þakklát og vil ekki einu sinni hugsa út í hversu stór þessi mynd gæti orðið. Allt er bara plús núna og mér finnst við vera í klikkaðri og fallegri vegferð saman.“

Noomi og leikstjórinn Valdimar Jóhannsson í Cannes í sumar þar sem Dýrið gerði stormandi lukku og vann til verðlauna fyrir frumleika.
Fréttablaðið/Getty

Íslenskur happafengur

Valdimar hefur áður upplýst í viðtali við Fréttablaðið að hann hafi séð Noomi fyrir sér sem Maríu snemma í framleiðsluferlinu, en hafi vitaskuld haft áhyggjur af því að hún hefði hvorki tíma né áhuga á þessu litla verkefni á Íslandi.

„Nei, ég er svo auðveld,“ segir Noomi og skellihlær áður en hún heldur áfram á alvarlegri nótum.

„En það er fyndið og gerist stundum, mjög sjaldan, að þú finnur hvernig allt í líkama þínum segir þér að eitthvað sé rétt. Ég tengdi svo sterkt við Maríu, sorg hennar, missi og þrár, þannig að hún yfirtók Nomi gersamlega heilt sumar,“ segir leikkonan, sem rann saman við persónuna þegar á hólminn var komið á Íslandi.

„Við Valdimar gengum síðan saman með Maríu. Þetta var svo mikil samvinna og á hverjum degi fannst mér að við værum að uppgötva nýjan sannleika saman. Mig langar gjarnan að vinna aftur með Valdimar og við höfum verið að ræða dálítið saman um hvað við getum gert. Mér finnst hann vera fjölskyldan mín. Hann er bróðir minn. Hann er systir mín,“ segir Noomi og hlær.

„Og ég og Sjón erum að vinna saman að verkefni þannig að ég er mjög, mjög þakklát og finnst ég hafa kynnst tveimur mönnum sem ég mun halda áfram að starfa með.“

„Málið er að allar persónur sem ég hef leikið lifa enn innra með mér. Vegna þess að þær eru allar mismunandi útgáfur af mér. Þannig að Lisbeth er klárlega enn með mér vegna þess að hún var alltaf ég.“

Dýrsleg tenging

Noomi tók hlutverkinu í Dýrinu ekki síst fagnandi þar sem römm eru þau stjúptengsl sem tengja hana Íslandi. „Ég bara elska Ísland. Ísland er hjartað mitt. Mér fannst ég alltaf tengdari Íslandi en Svíþjóð, eins undarlega og það hljómar,“ segir Noomi sem bjó hérna þegar hún var fimm til átta ára.

Eftir að fjölskyldan flutti aftur til Svíþjóðar eyddi hún öllum sumrum á Íslandi þangað til hún varð fjórtán ára. „Mér finnst ég hafa fundið hjarta mitt og sál á Íslandi sem barn. Mig langar að koma oftar til Íslands og mig langar að byggja mér hús á Íslandi. Þannig að Dýrið var ekki aðeins bíómynd fyrir mér heldur ég að tengjast aftur hluta af sjálfri mér sem ég vil hafa meira í lífi mínu.“

Noomi tengdi svo sterk við Maríu að persóna og leikkona runnu saman og voru sem eitt á meðan á tökum Dýrsins stóð. Mynd/Aðsend

Ólíkar persónur í einni konu

Hilmir Snær Guðnason leikur eiginmann Maríu og Björn Hlynur Haraldsson kemur síðan einnig að málum sem mágur hennar, en Dýrið hverfist um afdrifaríkar afleiðingar þess að hjónin ákveða að ættleiða lamb, ef svo má að orði komast.

„Þeir voru magnaðir. Við vorum eins og fjölskylda og ég hálf partinn gleymdi að við vorum að leika persónur,“ segir Noomi um íslensku mótleikarana. „Þetta var eitt af þessum himnesku verkefnum þar sem persóna og manneskja runnu saman í eitt. Mér fannst þetta svo auðvelt þannig að þetta varð aldrei þvingað. Þetta var eins og við værum að dansa saman. Þetta var svo flæðandi og mikil leikgleði.“

Noomi sló hressilega í gegn sem Lisbeth Salander þríleiknum sem hófst með Karlar sem hata konur og kenndur er við Millenium.

Noomi braust til heimsfrægðar í krafti persónu Lisbeth Salander sem hún gerði ógleymanleg skil í þríleiknum kenndum við Karla sem hata konur og aðspurð segir hún stúlkuna með drekatattúið enn dvelja með sér.

„Málið er að allar persónur sem ég hef leikið lifa enn innra með mér. Vegna þess að þær eru allar mismunandi útgáfur af mér. Þannig að Lisbeth er klárlega enn með mér vegna þess að hún var alltaf ég.“