Leikkonan og leikstjórinn Nanna Kristín Magnúsdóttir segist eiginlega vera að rísa úr dvala sem hún lagðist í eftir að hafa heldur betur slegið hressilega í gegn með sjónvarpsþáttunum Pabbahelgar.

Þrátt fyrir fjölda áskorana ætlar hún þó ekki að byrja á að skrifa framhald af þáttunum heldur vinda sér í að leikstýra dans- og söngvamynd byggðri á krakkaplötunni og leikritinu Abbabbb! eftir Dr. Gunna.

„Já, ég mun láta undan þeim þrýstingi glöð í bragði,“ segir Nanna Kristín um háværar óskir um fleiri Pabbahelgar. „Fólk er að stoppa mig úti á götu og jafnvel að múta mér með kanelsnúðum í Bónus,“ heldur hún áfram vel meðvituð um að Pabbahelgar eigi dygga aðdáendur víða.

Pönk vs. diskó

Kanelsnúðar og frómar óskir breyta því þó ekki að næsta verkefni Nönnu verður söngleikurinn Abbababb! þar sem krakkar verða áberandi, þannig að nú stendur yfir leit að hressum krökkum á aldrinum 6-13 ára sem hafa áhuga á að leika í bíómynd.

„Abbababb! kom til mín fyrir þremur árum þegar Júlíus Kemp framleiðandi bað mig um að kíkja á verkefnið með það í huga að koma því á hvíta tjaldið,“ segir Nanna.

„Ég hafði auðvitað hlustað á lögin, sem eru frábær, og þemað pönk vs. diskó heillaði mig upp úr skónum. Þannig að ég þurfti ekkert gríðarlega langan umhugsunarfrest til að taka þetta að mér.“

Lætur hjartað ráða

Abbababb! er ekki aðeins fyrsta dans- og söngvamyndin sem Nanna leikstýrir heldur, eins og hún bendir á, hennar fyrsta kvikmynd í fullri lengd.

„Ég þarf alltaf að taka hlutina aðeins lengra!“ segir hún og segir að vissulega sé að mörgu að huga þegar vinsæl plata og síðar söngleikur eru löguð að kvikmynd. „Jú, það er heilmikil áskorun í skrifunum en það var búið að vinna góða forvinnu þegar ég kom að verkefninu.

Ásgrímur Sverrisson hafði skrifað bíómyndahandrit upp úr leikritinu og ég tók það svo í þær áttir sem hjartað mitt vildi fara með söguna og lagði áherslu á frásögn með fleiri leiðum en beinum texta.

Síðan er ég búin að fá með mér í lið þvílíka eðal listamenn. Sem dæmi mun Valgerður Rúnarsdóttir danshöfundur hafa yfirumsjón með kóreógrafíunni og Þorvaldur Bjarni Þorvaldsson útsetur tónlistina og semur sinfónísku kvikmyndatónlistina fyrir SinfoniaNord.“

Teppalandsdraumurinn

Doorway Casting sér um leitina að leikurum í Abbababb! og hefur auglýst eftir áhugasömum krökkum sem enn hafa smá ráðrúm til þess að senda prufu áður en frestur rennur út á föstudaginn.

Er leikstjórinn með einhver skilaboð til krakkanna, kannski ekki síst ef mann langar rosa mikið að prufa en er kannski pínu feiminn eða hræddur um að gera eitthvað „vitlaust“ í prufunni?

„Skilaboðin frá leikstjóranum eru þau að það er ekki hægt að gera neitt vitlaust,“ segir Nanna og hvetur einfaldlega „alla sem hafa áhuga á að vera í bíómynd“ til þess að senda inn prufur.

„Þegar ég var lítil langaði mig mest af öllu að fá að leika í auglýsingu og þrábað stjúpföður minn um að koma því til skila til yfirmanna sinna. Ég fékk aldrei að leika í auglýsingu enda vann stjúppabbi minn hjá Teppalandi á Grensásveginum. Ég gerði í sjálfu sér ekkert vitlaust nema að setja öll eggin í sömu körfu, það er að segja, Teppaland.“

Við erum alls konar

Nanna Kristín segir að allar prufur verði skoðaðar gaumgæfilega. „Ég vil einmitt fá alls konar krakka í myndina. Ekki aðeins þau sem eru þaulreynd af því að keppa eða sýna mörgum sinnum á vetri þótt sá hópur muni að sjálfsögðu koma sterkur inn í þar til gerð hlutverk.

En við erum alls konar og í skólanum þar sem Abbababb! gerist núna, þá er fjölbreytileiki,“ segir Nanna. „Hæfileikar fyrir þessa dans- og söngvamynd eru ekki aðeins dans og söngur heldur getur það verið að djöggla boltum, spila á básúnu, karate, spilagaldrar, lesa ljóð, prjóna, ropa hátt og lengi eða hvað sem þeim sjálfum þykir merkilegt. Sem leikstjóri er ég að leita að demöntum en ég vil ekki ákveða fyrir fram í hvaða formi þeir skína skærast.“