Fram undan er desember, jólamánuðurinn, mánuður matar og víns, slökunar og notalegrar samveru með ofgnótt veitinga í föstu og fljótandi formi. Geir Gunnar Markússon næringarfræðingur heldur námskeið á Heilsustofnuninni Hveragerði fyrstu tvær helgarnar í desember sem er ætlað að vera í senn hressandi og afslappandi og hjálpa fólki að koma sér af stað í heilbrigðara líferni. Geir Gunnar hefur boðið upp á lengri námskeið hingað til en segir þau ekki henta í desembermánuði, einmitt þegar fólk þarf hvað mest á aðstoð að halda.

Næringarfræðingurinn Geir Gunnar Markússon heldur námskeið fyrir þá sem hafa ekki náð að forgangsraða heilsunni í hversdeginum.

Að bera ábyrgð á eigin heilsu

„Nútímalíferni okkar býður upp á alltof mikið stress, svefnleysi, hreyfingarleysi og skyndibita. Þetta er námskeið fyrir þá sem eru komnir í vítahring óheilbrigðs lífernis og vantar smá „kick start“ í átt að hollari lífsháttum.Ef þú nærð ekki að forgangsraða heilsunni í hversdeginum er þetta námskeið fyrir þig.

Fólk þarf samt ekkert að vera á slæmum stað heilsulega séð til þess að sækja þetta námskeið því lengi getur gott batnað. Ég myndi segja að þetta væri námskeið hugsað fyrir alla þá sem vilja læra að bera ábyrgð á eigin heilsu,“ segir Geir Gunnar.

Skynsamleg skref en ekki átak

En hversu miklu ætli sé áorkað á einni helgi á meðan fólk er oft að berjast hálfa ævina við að breyta lífsstíl sínum til betri vegar?„Það verða svo sem engin kraftaverk unnin á einni helgi en það er von mín að hver og einn geti tekið með sér punkta tengda bættri heilsu sinni, svo sem um betra mataræði, betri svefn, markvissari hreyfingu og sterkari andlega heilsu.“

Geir Gunnar hvetur fólk til að njóta jólanna án þess að kála sér í óhollustunni. Nordicphotos/Getty

Láta ekki stórhátíðir skemma

Eins og fyrr segir hefur Geir Gunnar áður staðið fyrir slíkum námskeiðum en þá alltaf vikulöngum. „Vikunámskeið er ekki praktískt í öllum þeim jólahlaðborðum, jólatónleikum og jólaundirbúningi sem heltekur desember. Því langaði okkur á Heilsustofnun að prófa að vera með stíft helgarnámskeið í desember og leggja grunn að góðri heilsu um jólin og á nýju ári.

Mín reynsla úr líkamsræktarbransanum og næringarfræðinni hefur kennt mér það að það eru allt of margir sem koma með offorsi á námskeið og skrá sig í ræktina í fyrstu vikunni í janúar en eru allt of oft dottnir aftur í sama gamla óholla lífsstílinn áður en febrúar hefst.

Því er þetta námskeið mikilvægt til að kenna fólki að láta ekki stórhátíðir eins og jólin skemma heilsusamlegan lífsstíl, enda alveg 100 prósent öruggt að það koma jól, páskar, afmæli, sumarfrí og veislur á hverju einasta ári en það er ekkert víst að þú haldir heilsunni þessi ár ef þú ferð ekki að setja hana í forgang.“

Jólin aðeins ein vika ársins

Geir Gunnar ráðleggur fólki að ganga hægt um gleðinnar dyr í desember. „Njótum jólanna og undirbúningsins án þess að kála okkur í óhollustunni. Njótum góðrar samveru með vinum og ættingjum. Notum frítímann sem við fáum um jólin til að hreyfa okkar meira.

Ef þú vilt gefa góða jólagjöf gefðu þá sjálfum þér og þínum góða heilsu. Svo má líka benda á það að jólin sjálf, það er að segja aðfangadagur til nýársdags, eru rétt rúm vika og þótt þú farir út af sporinu í mataræði og hreyfingu þessa viku þá skiptir það litlu máli í stóra heilsusamhenginu því það eru 52 vikur í einu ári.“

Einfaldar reglur Geirs Gunnars

"Einfaldar og ekki einfaldar en þetta er a.m.k eitthvað sem ég hef verið að tileinka mér í gegnum áratugina og hefur reynst mér nokkuð vel"

- Borða hollan morgunmat alla dag

- Borðaðu alvöru mat úr náttúrunni

- Ekki borða neitt eftir kl.19:00 á kvöldin, sex sinnum í viku

- Ekki drekka sykraða eða sætuefnis gosdrykki

- Finnum hreyfingu sem er skemmtileg og stundum hana reglulega

- Njótum hreyfingar í náttúrunni

- Stefnum að því að ná 7-8 klst órofnum nætursvefni

- Ekkert koffín eftir klukkan 16 á daginn

- Nærum sálina – munum að brosa alla daga

- Vertu besti vinur þinn

- Verum fyrirmyndir annarra og sérstaklega barnanna okkar í heilsueflingu. Það er besta forvörnin og þú ert frekar til staðar fyrir börnin þín ef þú hugsar um heilsu þína og börnum okkar veitir ekkert af góðum fyrirmyndum í instagramheiminum sem þau lifa í.