Lífið

Njósnað um jólasveinana

​Þegar níu ára sonur Bennýjar Sifjar Ísleifsdóttur stillti upp myndavél til að njósna um komu jólasveinanna setti hann af stað óvænta atburðarás. Úr varð barnabók sem hún skrifaði á legubekk heima í stofu.

Benný Sif á legubekknum góða þar sem fyrstu tvær skáldsögurnar hennar urðu til. MYND/SIGTRYGGUR ARI

Heimilið er staður fyrir samveru og þar þarf að vera til eitthvað í ísskápnum svo maður fái gott að borða. Svo spillir ekki fyrir að eiga góðan mann sem hefur yndi af því að matbúa sæl­kerakrásir ofan í fjölskylduna,“ segir Benný Sif þar sem hún lætur fara makindalega um sig á þægilegum legubekk í stofunni heima.

Á þeim sama góða legubekk skrifaði hún fyrstu tvær skáldsögurnar sem nú fást brakandi nýjar úr prentsmiðjunni.

„Það er vitaskuld lúxuslíf fyrir rithöfund að geta lagst út af með skáldsögur í kollinum og látið þær vakna til lífsins útafliggjandi á hlýrri gæru og í kósíheitum heima. Einveran verður þó stundum aðeins of mikil og því ákvað ég nýlega að fá mér skrifstofu í miðbænum. Þar get ég unnið með fleirum og haft af þeim félagsskap, sem er uppbyggjandi og nærandi,“ segir Benný.

Dreymdi um stóra fjölskyldu

Benný Sif er Eskfirðingur sem flutti í Kópavoginn fyrir tólf árum. Hún er með meistaragráðu í þjóðfræði og býr með eiginmanni sínum Óskari Garðarssyni og börnum þeirra fimm.

„Mig dreymdi alltaf um að eiga stóra fjölskyldu og finnst yndislegt að hafa mína nánustu í kringum mig,“ segir Benný sem á ellefu ára son og fjórar dætur á aldrinum 19 til 25 ára.

„Ég kem sjálf úr sömu samsetningu á systkinahópi og veit því hvernig heimilislífið gengur fyrir sig. Samkomulagið í systkinahópnum er með besta móti og strákurinn minn er ánægður að eiga allar þessar systur. Hann á í skemmtilegu sambandi við þær allar en kvartaði lengi yfir því að eiga ekki yngra systkin. Það verður þó alltaf hlutskipti eins í fjölskyldunni að vera yngstur,“ segir Benný og hlær, enda er hún sjálf yngst sinna systkina.

„Stíllinn heima er eflaust svolítið gamaldags en hann er hlýlegur. Það sést að hér býr fólk og yfirbragðið er ekki of stíliserað. Ég er mikið fyrir ljós og lampa en meðvitað farin að draga úr kertanotkun og velja umhverfisvæn kerti. Hugur minn dvelur því við umhverfisvernd og ég vil nýta húsgögn og heimilismuni sem best. Ég kaupi því fátt nýtt og er ekki týpan sem skiptir um jólaskraut á hverju ári,“ segir Benný og brosir kát á legubekknum góða.

„Bekkurinn er orðinn tíu ára og er einkar notalegur fyrir lestur. Hann er svolítið minn staður og sérstaklega eftir að ég hófst handa við skrifin, en mér finnst ég hafa unnið í lottóinu í hvert sinn sem ég sé heimilisfólkið sitja í honum með bók í hendi.“

Spennandi rannsóknarvinna

Benný Sif segir örlögin hafa ætlað sér að skrifa bækur en að hún hafi ekki komið sér til þess fyrr en nú að tvær fyrstu bækurnar koma út á sama tíma og í smíðum er önnur skáldsaga og önnur barnabók.

„Hugmyndin að barnabókinni kviknaði fyrir tveimur árum þegar sonur minn fékk spjaldtölvu sem námsgagn í skólanum. Þegar Stekkjastaur var væntanlegur fyrstur til byggða tók drengurinn upp á því snilldarráði að reyna að njósna um jólasveinana og stillti spjaldtölvunni út í glugga til að taka upp myndir af þeim á nóttunni, og auðvitað án þess að segja foreldrum sínum frá því,“ segir Benný sem komst nú samt á sporið um rannsóknarvinnu sonar síns.

„Þetta stúss á stráknum varð kveikjan að bókinni og þar þróast málin með spennandi og leyndardómsfullum hætti,“ segir Benný og vill ekki ljóstra frekar upp um framvindu sögunnar.

Jólasveinar í þjóðsögunum

Benný þykja jólasveinar skemmtileg fyrirbæri og bendir á að þeir lifa sterkt í þjóðsögunum okkar.

„Við eigum ótal sögur og sagnir um íslensku jólasveinana og þær eru af einhverju sprottnar. Mér finnst því sjálfsagt að halda þjóðsagnaarfinum á lofti. Krakkar geta líka vel trúað á alvöru jólasveina um leið og þeir koma auga á gervijólasveina á jólaskemmtunum. Sem þjóðfræðingur legg ég í ákveðnum skilningi trú á þjóðsögurnar og hef gaman af sagnahefðinni um jólasveinana.“

Mætti sjálfri sér

Benný er ekki farin að setja upp jólaljós þótt rétt rúmar sex vikur séu til jóla.

„Ég hef haldið mig við það að skreyta ekki fyrr en helgina sem fer næst 1. desember eða fyrsta sunnudag í aðventu. Mér finnst aðdragandinn að jólum yndislegur tími og það verður sérstök tilfinning að taka nú þátt í jólabókaflóðinu í fyrsta sinn,“ segir Benný sem auk barnabókarinnar Jólasveinarannsóknin teflir fram skáldsögunni Grímu sem hún hlaut nýræktarstyrk fyrir í vor.

„Gríma segir af örlögum sjómanns­kvenna í austfirsku sjávarþorpi á sjötta og sjöunda áratugnum. Þá kemur nýsköpunartogari til bæjarins og með honum eitthvað af nýjum skipverjum sem breytir takti bæjarlífsins. Þetta er þorps- og ástarsaga um efni sem hefur lítið verið fjallað um,“ segir Benný sem hlaut sjaldgæft nafn sitt frá Benedikt, eiginmanni Kristínar móðursystur sinnar.

„Mömmu þótti Kristín vera of hversdagslegt nafn og lét skíra mig Benný til að gera þeim báðum hátt undir höfði. Við erum nokkrar á landinu sem heitum Benný en ég hef aldrei hitt nöfnu mína. Bara séð bíl með þessu einkanúmeri og fannst ég þá hafa mætt sjálfri mér,“ segir Benný og skellihlær.

Benný teflir fram tveimur nýjum bókum þessa dagana, skáldsögunni Grímu og barnabókinni Jólasveinarannsóknin.

Athugasemdir

Auglýsing
Auglýsing

Tengdar fréttir

Lífið

Rússnesk stúlka krækti í íslenskan landsliðsmann

Lífið

Disney birtir nýja stiklu úr Dumbo

Lífið

Efsta hæðin á Tryggvagötu 18 til sölu

Auglýsing

Nýjast

Hildur Eir og Heimir opna sig um skilnaðinn

Birti mynd af sér í karaókí með Zucker­berg

Hömlulaus og hamflett í Tvískinnungi

Heimildirnar eru bensínið

Undraheimar tískunnar opinberaðir

Vísaði ó­vart í nýjasta lag Ari­önu Grande á Twitter

Auglýsing