Fantasíuþættirnir The Sandman á Neflix eru með þeim mest streymdu á Íslandi í dag. Þeir byggja á myndasögum Íslandsvinarins Neil Gaiman, sem komu út frá 1989 til 1996, í 75 heftum. Sagan hverfist um Draum, eða Morpheus eins og hann er einnig kallaður.

Draumur er konungur draumanna. Hann er einn af hinum sjö „Endalausu“, og er jafngamall mannlegri tilvist. „Hin endalausu“ eru holdgerving grunnfyrirbæra sem varða mannlegt líf. Auk Draums eru Dauðinn, Þráin, Örlögin, Örvænting, Firring og Tortíming.

Seinfær framleiðsla

Tilraunir til að kvikmynda söguna má rekja til ársins 1991 en það var ekki fyrr en um 2013 sem hjólin hófu að hreyfast fyrir alvöru þegar David Samuel Goyer kom að verkefninu. Goyer sá er þekktastur fyrir handritavinnu við Blade-myndirnar, Batman-myndir leikstjórans Christopher Nolan og fleiri stór myndasögutengd kvikmyndaverkefni, auk þess að vera einn aðal-handritshöfunda fyrir Call of Duty tölvuleikjarisann.

Goyer fékk stórleikarann Joseph Gordon-Lewitt með í verkefnið, en hann hafði í hyggju að túlka aðalpersónuna og hugsanlega leikstýra þáttunum einnig. Samstarfið fór út um þúfur árið 2016, Gordon-Lewitt sagði sig frá verkefninu og Warner Bros, eigandi framleiðsluréttarins, beindi sjónum sínum að sjónvarpsaðlögun í staðinn. Samningar náðust við Netflix árið 2019 og tökur fóru fram í miðjum heimsfaraldri.

Þetta er langt frá því að vera í fyrsta skipti sem verk Gaiman eru kvikmynduð eða áhrif úr sagnaheimi höfundarins notuð í formið. Nýleg dæmi eru sjónvarpsþættirnir American Gods, Good Omens og Lucifer.

Sáttur við sitt fólk

Neil Gaiman hefur lýst yfir mikili ánægju með The Sandman. Í samtali við bandaríska tímaritið Variety mærir hann Tom Sturridge og segir meðal annars frá því að nafn Toms, sem leikur aðalpersónuna, hafi komið upp í fyrsta tölvupóstinum um leikaravalið. „Svo hittum við fimmtán hundruð eða tvö þúsund Morpheusa en enginn þeirra var Tom. Hann hafði réttu nærveruna og hann sannfærði okkur alveg um að hann væri margmilljarða ára gömul vera, einhver sem var til í draumum fólks og ekki mennskur,“ segir höfundurinn í viðtali við bandaríska tímaritið Variety við frumsýningu á stiklu þáttanna í Los Angeles fyrr á árinu.

„Leikhópurinn, tökuliðið og framleiðendurnir, algjörlega allir sem komu að þessari framleiðslu, elska Sandman og gáfu sig alla í þessa þáttaröð,“ segir Neil Gaiman við erlenda fjölmiðla.

Grét yfir sjötta þætti

Aðspurður sagði hann að sjötti þátturinn hefði komið sér mest á óvart. „Ég grét þegar ég horfði á sjötta þáttinn. Þegar ég horfði á þáttinn nánast fullkláraðan, áður en við gengum endanlega frá tæknibrellunum. Ég áttaði mig skyndilega á því að tárin láku niður kinnarnar.“

Gaiman segist hafa velt vöngum yfir því, hvernig hann gæti grátið yfir eigin skáldskap. „Hvernig gat ég grátið yfir orðum sem ég skrifaði sjálfur í myndasögu fyrir þrjátíu og eitthvað árum síðan? Hvernig getur þetta eiginlega hreyft við mér tilfinningalega?“ spyr höfundurinn. „En þetta náði mér alveg rosalega. Það kom mér mjög á óvart að ég gæti upplifað mig meðal áhorfenda gagnvart verki sem ég bjó sjálfur til,“ segir hann.

Önnur þáttaröð líkleg

Hvað framhaldið varðar hefur Netflix ekki enn þá staðfest aðra þáttaröð með formlegum hætti. Þó þykir mjög líklegt að af henni verði. Einn af framleiðendum þáttanna, Allan Heinberg, sagði í samtali við bandaríska miðilinn Entertainment Weekly að undirbúningur fyrir handritagerð seinni þáttaraðar væri hafinn. Í sömu grein fullyrðir blaðamaðurinn Josh Rosenberg að næsti kafli í sögunni um Morpheus sé jafnan talinn sá allra besti í sögunni um Sandmanninn.