Margir gætu haldið að náttúrulegt vín og lífrænt vín sé einn og sami hluturinn en svo er ekki. Það er samt ýmislegt sameiginlegt með þessum vínum. Sérstaklega hvað varðar sjálfbærni og umhverfisvæna framleiðslu. En það er þó margt sem aðgreinir þau.

Lífrænt vín hefur verið skilgreint samkvæmt lögum þó ekki séu öll lönd sammála um nákvæmar skilgreiningar. Evrópusambandið og Bandaríkin eru til dæmis ekki sammála um hvort leyfilegt sé að bæta súlfötum í lífræn vín. Það eru aftur á móti ekki til neinar lagaskilgreiningar á náttúrulegu víni enn sem komið er.

Náttúruleg vín eru framleidd án þess að nokkru sé bætt við þau og ekkert er heldur fjarlægt úr vökvanum í framleiðsluferlinu. Náttúruleg vín innihalda því engin aukefni og inngrip við framleiðsluna eru í lágmarki.

Almennt er engum auk­efnum bætt út í náttúruleg vín í framleiðsluferlinu.

grunninn eru náttúruleg vín gerjaður vínberjasafi án nokkurra aukefna. Þrátt fyrir skort á lagabókstaf um náttúruleg vín segir Isabelle Legeron, stofnandi RAW vínkaupstefnunnar, að almennt séu þeir sem aðhyllast náttúruleg vín sammála um hvað sé ásættanlegt og hvað ekki til að vín teljist náttúrulegt.

Lífræn vín geta innihaldið náttúruleg aukefni

Almennt er talið skilyrði að vínberin sem notuð eru til að búa til náttúrulegt vín séu lífrænt ræktuð. Við ræktun vínberjanna er ekki notaður tilbúinn áburður, skordýraeitur eða önnur eiturefni til að vernda vínviðinn fyrir sníkjudýrum. Legeron segir að lífræn ræktun vínþrúgunnar sé helsta ástæða þess að öll náttúruleg vín eru lífræn. Þrátt fyrir það eru alls ekki öll lífræn vín náttúruleg.

Legeron segir að aðskilnaður náttúrulegra og lífrænna vína hefjist í vínkjallaranum. Reglur um meðhöndlun lífrænna vína í vínkjöllurum leyfa notkun á aukefnum eins og til dæmis geri og sykri. Einnig leyfa margar stofnanir sem votta lífræna vínframleiðslu aukefni eins sítrussýru, tannín, eikarspæni, ýmiss konar súlföt og fleiri náttúruleg aukefni. Slík efni eru ekki leyfileg í náttúrulegum vínum.

Listinn af þeim aukefnum sem bæta má út í lífrænt ræktuð vín er þó mun styttri en listi leyfilegra aukefna í víni sem ekki hefur lífræna vottun.

Náttúruleg vín að sögn Legeron eiga strangt til tekið ekki að innihalda nein súlföt en sumir eru þó á þeirri skoðun að þau séu í lagi í mjög litlu magni, en þó í mun minna magni en leyfilegt er í lífrænum vínum samkvæmt reglum Evrópusambandsins.

Á RAW vínkaupstefnunni sem Legeron er í forsvari fyrir er gerður greinarmunur á náttúrulegum vínum og lífrænum og vistvænum vínum sem framleidd eru með lágmarksinngripi. En báðir flokkar eru leyfilegir á kaupstefnunni enda segir Legeron að þessi vín séu mun náttúrulegri en ólífræn vín.