Leikarinn og skemmtikrafturinn Steinþór Hróar Steinþórsson, eða Steindi Jr., er mikið jólabarn og elskar allt vesenið í kringum jólin. Hann segist lifa og hrærast í látum og veseni og reddar alltaf því síðasta á síðustu stundu, sem hann segir að hafi komið aftan að sér. Hann segir að það besta við jólin sé að upplifa þau í gegnum börnin sín og sína nánustu og hlakkar til að liggja yfir lélegum bíómyndum og Play­Station í sykurdái yfir hátíðirnar.

Steindi segir að þó að COVID sé orðið þreytt og leiðinlegt ástand hafi hann sloppið betur en margir. „Ég er að skrifa sjónvarpsseríu sem verður vonandi tekin upp snemma á næsta ári og ég horfi ekki á fótbolta og stunda ekki líkamsrækt, þannig að fyrir mig er þetta nokkurn veginn óbreytt staða,“ segir hann léttur. „Svo erum við félagarnir í FM95Blö að gefa út nýtt spil, sem heitir Partý Skellur, en það hefur verið í vinnslu í þrjú ár og er þriðja spilið frá okkur. Svo er ég alltaf með streymið Rauðvín og klakar á Twitch á fimmtudagskvöldum og er í útvarpinu á föstudögum.“

Best að hafa 30 bolta á lofti

Steindi segir að hann hafi alltaf verið mikið jólabarn, en hann á afmæli 9. desember, þannig að desember hefur alltaf verið mikill hátíðarmánuður.

„Ég er mjög hrifinn af þessu tímabili. Fólk sem er ekki hrifið af jólahátíðinni er yfirleitt að bölva allri traffíkinni og öllu veseninu í kringum þetta, en það er það sem ég lifi og hrærist í,“ segir Steindi. „Ég funkera langbest þegar ég er með svona 30 bolta á lofti og helmingurinn er alveg að fara að detta. Þetta kemur sér vel á jólunum.

Ég er alltaf á síðasta snúningi. Korter í jól er ég í traffík og á eftir að sækja sex gjafir og finna út úr nokkrum. Ég er undantekningarlaust að þvælast á Þorláksmessu og jafnvel á aðfangadegi að grípa eitthvað. Þetta er jólin mín,“ segir Steindi. „Konan mín er alltaf að stinga upp á því að vera tímanlega og klára þetta fyrir jólin en þá finnst mér þetta ekki vera nein jól.“

Eins og Pallaball á rauðum ljósum

„En það hefur líka farið úrskeiðis. Þegar ég var unglingur urðum ég og félagi minn eitt sinn bensínlausir á aðfangadag alveg lengst í burtu, símalausir og allt. Við komum mjög seint heim og maturinn var búinn,“ segir Steindi. „Einu sinni fyrir mörgum árum var ég líka í bænum á Þorláksmessu og átti sex gjafir eftir en var búinn að fá mér nokkra bjóra. Svo endaði ég með því að gefa mjög skrítnar jólagjafir það árið. Pabbi fékk til dæmis myndina Shazam með Shaquille O’Neal og leðurbuxur. Alveg galin gjöf. En hann hafði bara húmor fyrir þessu og fór í buxurnar.

Steindi segir að það besta við jólin sé að upplifa þau gegnum krakkana og fólkið í kringum sig. Hann er á náttfötunum öll jólin og reynir að gera sem minnst. FRÉTTABLAÐIÐ/ERNIR

Ég held að það erfiðasta hafi verið á Þorláksmessu í fyrra. Þá fórum ég og frúin á fæðingardeildina til að fá að vita kynið á barninu okkar. Við fengum miðann og ákváðum að kíkja ekki, heldur vildum við láta gera kynjablöðru og leyfa eldri stelpunni, sem er 6 ára, að sprengja blöðruna. Hún var mjög spennt,“ segir Steindi. „Það átti að sprengja blöðruna á aðfangadag en þegar ég var á rauðum ljósum á leiðinni heim hvell­sprakk hún skyndilega! Það var búið að setja of mikið í hana. Þetta var agalegt. Það voru svo mikil læti og það var svo mikið bleikt konfettí, þetta var bara eins og að vera á Pallaballi. Það fór ofan í naríurnar og sokkana og mælaborðið og inn í miðstöð, bara alls staðar. Fólk var að horfa á mig í gegnum rúðuna og ég var bara í miðri traffík og gat ekkert gert, algjörlega varnarlaus. Ég þreif bílinn svona 4-5 sinnum til að losna við konfettíið og stelpan er orðin sex mánaða í dag en ég er enn að finna konfettídrasl alls staðar inni á milli.

Ég var svo sár út í sjálfan mig og vissi ekkert hvernig ég ætti að tækla þetta. Mér datt í hug að sækja familíuna og opna bara bílinn. En ég keypti bara nýja blöðru, fyllti hana af smá konfettí og einhverju bleiku og setti smá nammi og dóttir mín sá engan mun,“ segir Steindi. „Þetta var mjög fyndið en á þessu augnabliki vissi ég að önnur dóttir mín yrði smá jarðýta, fyrst hún lét vita af sér svona. Hún stendur undir því og er mikill orkubolti.“

Nýjar hefðir myndast

Steindi segir að það besta við jólin sé að upplifa þau gegnum krakkana og fólkið kringum hann.

„Dóttir mín er líka rosa mikið jólabarn og ég fæ að upplifa stemninguna og spennuna í gegnum hana,“ segir Steindi. „Svo er líka gott að fá frí og geta spilað PlayStation og taka kósíkvöld og spilakvöld og svona. Ég er á náttfötunum öll jólin og reyni að gera voða lítið.

Það er hefð hjá okkur að vera til skiptis hjá foreldrum mínum eða tengdó, en fyrir þremur árum héldum við svo okkar eigin jól fyrst og þá myndast nýjast hefðir. Hjá okkur eru allir velkomnir og við höfum prófað að taka ein jól þar sem við vorum bara í þægilegum fötum og allir voru í jólapeysum. Það er eitthvað sem ég mæli mjög mikið með,“ segir Steindi. „Þetta á að vera þægilegt, þú ert að fara að borða yfir þig og taka því rólega.

Þegar ég var yngri var jólatréð alltaf skreytt á Þorláksmessu en núna vil ég helst fá það upp strax um miðjan nóvember, en konan samþykkir ekki að skreyta fyrr en í lok nóvember og svo kemur tréð upp eftir það,“ segir Steindi. „En það er komið myrkur og þetta er bara mánuður. Það er um að gera að lengja þetta og ég mæli með að gera það áfram, ekki bara í ár. Það skemmir ekki fyrir að lýsa bæinn upp með jólaljósum. Svo er ég líka mikill áramótamaður. Ég hef bara gaman af þessu öllu, aðallega af því að þetta er tími með fjölskyldunni.“

Tekur eina slaka jólaræmu beint á kassann

Steindi er ekki með sérstakar gláphefðir um jólin. „Það eru mjög fáar góðar jólamyndir. Mér finnst eiginlega mikilvægara að það sé horft á mynd saman,“ segir hann. „Þegar ég var krakki fór maður á vídeóleiguna og þá gat maður fengið að hafa myndirnar lengur yfir jólin svo maður tók alltaf svona tíu myndir. Ég reyni svolítið að halda í þá hefð að hrúga familíunni saman í stofuna yfir mynd án þess að neitt sé að trufla og klára myndina, sama hversu vond hún er. Það jafnast ekkert á við að liggja í sykurdái yfir jólasjónvarpsmynd sem fær svona 3 í einkunn á IMDb. Þetta snýst eiginlega mest um það að taka eina slaka jólaræmu bara á kassann.

Mínar uppáhaldsjólamyndir eru ekkert frumlegar, en ég er líka svolítið að reyna að sýna dóttur minni klassísku jólamyndirnar. Ég hef gaman af Home Alone 1 og 2 og Christmas Vacation er klassík. Svo eru myndir eins og Die Hard, Elf, Nightmare Before Christmas, Bad Santa, þetta er allt gött stöff,“ segir Steindi. „Ég tengi líka Stellu í orlofi og Beetlejuice við jólin og fæ alltaf smá jólafíling af þeim. Ég hef örugglega horft á þær á jólum þegar ég var gutti.

The Grinch er líka í miklu uppáhaldi hjá dóttur minni, sem ræður yfirleitt hvað er horft á, nema maður komi með góða söluræðu. Svo mæli ég sterklega með gay vampírusplattermyndinni Þorsta. Það er í rauninni jólamyndin í ár,“ segir Steindi og hlær.

Fjör á Twitch um jólin

„Við í Rauðvíni og klökum höfum gefið í yfir hátíðirnar og tekið auka streymi og verið í miklum jólagír að spila PlayStation 5. Við reynum að sinna nördum þjóðarinnar eins og við getum,“ segir Steindi. „Í grunninn eru þetta bara fjórir hálfvitar að leika sér saman, fólk er ekki að stilla inn fyrir spilamennskuna heldur stemninguna. Við spilum saman oft í viku, en á fimmtudögum leyfum við öðrum að fylgjast með og spjallið er opið. Þetta er stærsta partí landsins á öllum fimmtudagskvöldum og það er líka hægt að horfa á eldri þætti á twitch.tv/raudvinogklakar. Núna yfir jólin höfum við verið duglegir, róterað leikjum og fengið flotta gesti til okkar.“