Ís­lenska vonar­stirnið í Noregi, Natan Dagur Bene­dikts­son, hélt að bróðir sinn væri að gera í sér síma­at þegar hann fékk sím­talið þar sem honum var boðið að taka þátt í norsku út­gáfunni af raun­veru­leika­þættinum The Voice. Þetta kom fram í morgunút­varpi Rásar 2 í morgun.

Líkt og Frétta­blaðið hefur greint frá sló Natan í gegn í prufunni sinni í þáttunum. Það er ekki síst merki­legt fyrir þær sakir að fyrir þáttinn hafði Natan aldrei sungið á sviði áður. Líkt og faðir Natans út­skýrði, hafði hann lengi átt sér þann draum að vera söngvari.

„Hann er mjög góður bróðir og hafði alltaf verið mjög stuðnings­ríkur í þessu,“ segir Natan um bróðir sinn sem skráði hann hrein­lega til leiks í The Voice. Natan hafði fram að því ekki þorað að stíga skrefið en líkt og fram hefur komið upp­skar Natan gjarnan háð og stríðni skóla­fé­laga sinna fyrir söng sinn.

Þegar Natan fékk boðið í sím­tali, hélt hann að þar væri bróðir sinn á ferðinni. Því sló hann á létta strengi en áttaði sig fljót­lega á því að hringjandinn var ekki alveg á sömu blað­síðu.

„En svo fattaði ég fljótt að þetta væri ekki grín,“ segir Natan glettinn. „Gæinn var mjög hissa á hinni línunni og vissi ekki alveg hvernig hann ætti að bregðast við.“ Natan segist hafa á­kveðið að slá til, enda ekki haft neinu að tapa.

Natan segir að það hafi komið sér á ó­vart að sér hafi tekist að græta einn dómarann, eins og frægt er orðið. „Það snerti hjartað. Það er alltaf mjög gaman að geta borið skila­boðin svona vel í gegnum söng,“ segir hann.

Tökur á þáttunum standa nú yfir og fara fram þar til í miðjan apríl. Þá taka beinar út­sendingar við og spennandi að sjá hvert gengi Natans verður.