Sýning á verkum Hjálmars Stefánssonar frá Smyrlabergi stendur yfir í fjóshlöðinni á Kleifum við Blönduós. Á sýningunni, sem ber yfirskriftina Nafli jarðar, gefur að líta 127 málverk sem fengin eru að láni hjá ættingjum og vinum listamannsins.

Hjálmar Stefánsson fæddist árið 1913 á Smyrlabergi á Ásum í Austur-Húnavatnssýslu. Hann hlaut nokkra menntun og stundaði ýmsa vinnu á yngri árum, meðal annars fylgdi hann Kjarval þegar málarinn var á ferð um Norðurland vestra. Hjálmar var alla tíð einfari og átti lengi við vanheilsu að stríða. Rúmlega þrítugur að aldri flutti hann á Blönduós og tók að mála myndir af mikilli ástríðu. Hann var bókhneigður og eftir hann liggur óútgefið handrit með hugleiðingum, Nafli jarðar. Hjálmar lést árið 1989. Bróðurpartur myndanna verður færður Safnasafninu á Svalbarðsströnd til varðveislu. Sýningunni lýkur sunnudaginn 26. júlí.

Þetta er þriðja sýningin sem hjónin Áslaug Thorlacius og Finnur Arnar Arnarson setja upp. Áður hafa þau sett upp sýningu með verkum eftir Ragnar Kjartansson, Doddu Maggý, Olgu Bergmann og Önnu Hallin og Egil Sæbjörnsson og sýningu á verkum Sigurðar Guðjónssonar.