Tíska

Myrkrið klæðir mig vel

Blaðakonan Anna Margrét Björnsson elskar skammdegið. Hún er rómuð fyrir kvenlegan þokka og rokkaðan fatastíl og teflir nú fram sinni fyrstu barnabók sem hún vonar að vinni bug á myrkfælni.

Anna Margrét segist ekki mundu slá hendinni á móti því að fara í tuskubúðir með töffaranum og ofurfyrirsætunni Kate Moss og klárt mál að þær myndu enda búðarrápið á Kaffibarnum. MYND/SAGA SIG

Hvernig er stíllinn þinn?

Ætli hann sé ekki frekar einfaldur. Svartur, innblásinn af 7. áratugnum, rokki og róli, og pínu strákalegur. Miðnæturkúreki með vott af frönskum og breskum áhrifum. Mér finnst einfaldur fatnaður ná langt. Góðar gallabuxur og skyrta, eða bara einfaldur stuttermabolur, og nota frekar skemmtilegt skart, litrík stígvél, hatt eða yfirhöfn við.

Hver er tískufyrirmyndin?

Tónlist hefur mest áhrif á stílinn minn. Til dæmis fræg „screen test“ Andys Warhol af Lou Reed, Nico og Edie Sedgwick. Líka töffarar eins og Blondie, Kim Gordon, Jane Birkin og dætur hennar, Poison Ivy, Nick Cave og Blixa Bargeld.

Hvað viltu að stíllinn segi um þig?

Kannski að ég sé dularfull og smá töff án þess að ég sé að reyna það alltof mikið.

Í hvað ferðu þegar þú vilt stela senunni?

Mínípils.

Hver er uppáhaldsflíkin í skápnum?

Þær sem hafa tilfinningalegt gildi. Ljósblá leðurkápa sem mamma mín átti frá árinu 1962 og svört kápa af ömmu. Í sumar áskotnaðist mér hefðbundinn marokkóskur kjóll, svartur með hvítri bróderingu, og ég held mikið upp á hann. Og gamli leðurjakkinn minn. Svo get ég ekki verið án gríska sjómannakaskeitisins sem ég hef átt árum saman.

Henrik Björnsson, bróðir Önnu Margrétar og forsprakki hljómsveitarinnar Singapore Sling, gaf systur sinni það heilræði að mikilvægt væri að vera alltaf töff. Hún er ekki viss um hvort hann hafi verið að grínast. MYND/SAGA SIG

Hvert er besta tískuráðið sem þú hefur fengið og hver gaf þér það?

Henrik bróðir minn sagði mér eitt sinn að það væri mikilvægt að vera alltaf töff. En kannski var hann að djóka.

Hvað er það dýrasta sem þú hefur nokkru sinni keypt þér á kroppinn?

Ég kaupi ekki dýr föt heldur aðallega fatnað í „second hand“ búðum. Sennilega er það kjóll frá snillingnum Hildi Yeoman sem ég ætla að klæðast á áramótunum. Fínustu flíkurnar sem ég á eru vintage merkjaföt eða pelsar frá mömmu og ömmu.

Hvaða stíl ættu allar konur að prófa um ævina?

Að vera goth!

Hvað gleður þig mest?

Yndislegu börnin mín og Jón, kærastinn minn, gleðja hjarta mitt alla daga og mínir traustu vinir og fjölskylda. Kvöldstund við Þingvallavatn fyrir framan arineldinn að hlusta á góða tónlist. Og ferðalög til fjarlægra landa. Ég ætla að reyna að gera meira af því á ný. Og kötturinn okkar, hann Amon Dúll.

Hvaða flík ætti að banna?

Enga, þótt persónulega þyki mér ljótt svona merkjadót, bolir með risastóru lógói (nema maður sé rappari) og svo þoli ég ekki spandex-íþróttadót og hvað þá í skærum litum. Ég veit að ég ætti að fíla þetta því allar miðaldra konur eru hjólandi og hlaupandi út um allar trissur, en ég held að ég fari aldrei þangað. Það sem mér finnst þó ljótast í tískunni eru ekki flíkur heldur þessi brjálæðislega mikla förðun sem sést á svo mörgum konum núna, einhvers konar Instagram-förðun og mikið meik sem er bara „scary“ í dagsbirtu, með lituðum augabrúnum og alls konar gervi-einhverju.

Uppáhaldsmunstrið þitt?

Hlébarðamunstur! Og svarthvíta munstrið á gólfinu í Black logde í Twin Peaks.

Hvað eitt gæti bjargað jólunum hjá hverri konu?

The Peanuts Christmas Album með Vince Giraldi Trio.

Fylgirðu tískudrós á Instagram?

Já, ég fylgi Susie Bick. Hún er kona Nicks Cave og fatahönnuður sem kallar sig The Vampire’s Wife. Líka Lou Doillon, dóttur Jane Birkin. Ég mundi þó ekki kalla þær tískudrósir heldur bara töff konur með fallegan stíl.

Nýjasta flíkin í fataskáp Önnu Margrétar er glæstur áramótakjóll frá Hildi Yeoman sem minnir á klæðaburð geimskutlunnar Barbarellu í meðförum Jane Fonda árið 1968.

Hvaða flík keyptirðu þér síðast?

Áramótakjólinn frá Hildi Yeoman. Hann er alsettur pallíettum og svona Barbarellu-kjóll.

Náttkjóll eða náttföt?

Uhmm … hvorugt.

Hvaða skartgripur er ómissandi?

Enginn. Ég er ekkert sérstaklega mikið fyrir skart en held upp á nokkra gamla skartgripi frá mömmu og ömmu og svo fallega silfurskartgripi frá ORR eða Marokkó. Þar keypti ég fagurt silfurarmband með fallegum táknum frá Tuareg-menningunni; reyndar mjög lík íslensku vegvísisrúninni.

Hvað hefðirðu viljað vita um eigin stíl þegar þú varst yngri?

Að maður þyrfti ekki að fylgja tískustraumum og að best væri að finna sinn eigin stíl og halda sig við hann. Það er alltaf flottast.

Hverju klæðistu oftast?

Svörtum gallabuxum, leðurjakka, hlébarðapels og ökklastígvélum.

Hvernig líður þér best?

Í svörtum gallabuxum eða japönskum silkislopp.

Hvort ertu týpan sem klæðist eins krumpugalla og kærastinn, eða eins jólapeysu og kötturinn?

Jesús! Kærastinn á ekki krumpugalla og kötturinn ekki jólapeysu! Af tvennu illu kysi ég peysuna ef hún má vera með hlébarðamunstri.  

Hvort ertu týpan sem klæðist eins krumpugalla og kærastinn, eða eins jólapeysu og kötturinn?

Af tvennu illu kysi ég peysuna ef hún má vera með hlébarða­munstri.

Hvort létirðu þig hafa, að klæðast kjól sem væri þakinn kattarhárum eða matar- og kaffiblettum?

Kattarhárum býst ég við. Það er nóg af þeim á heimilinu.

Hvort væri verra, að hafa lífshættulegt ofnæmi fyrir leðri eða blúndum?

Leðri!

Hvort freistar þín meira; að fara í tuskubúðir með Brigitte Bardot eða Kate Moss?

Þær eru báðar örugglega rosa hressar. Bardot er kannski orðin dálítið klikkuð og gift fasista, þannig að ég vel Kate og við myndum þá pottþétt enda á Kaffibarnum.

Stíllinn hennar Önnu Margrétar er undir frönskum og breskum áhrifum. MYND/ÁSTA KRISTJÁNS

Hvernig kom sagan Á milli svefns og vöku til þín?

Hugmyndin kom frá yngri dóttur minni sem var hrædd við að fara ein að sofa og sakaði það sem hún kallaði leynigestinn um að gera alls konar skrýtna hluti á heimilinu. Sagan varð að samstarfsverkefni okkar Laufeyjar Jónsdóttur vinkonu minnar sem teiknaði myndirnar svo listavel.

Fyrirfinnst tíska í bókinni?

Já, það mætti segja það, þótt það hafi ekki verið ætlunin. Laufey er menntaður fatahönnuður og kennir teikningu við fatahönnunardeild LHÍ. Því má greina vott af áhrifum tískuteikninga í bókinni.

Áttu þér tískufyrirmynd á meðal rithöfunda?

Ekki sérstaklega en nefni þó Simone de Beauvoir og Lord Byron.

Fyrir hvern er bókin?

Ég vona að sem flestir sjái eitthvað við hana, en sagan er hugsuð fyrir börn á aldrinum 5 til 9 ára.

Kyndir hún undir myrkfælni?

Ég held frekar að hún tali til barna sem eru myrkfælin. Oft nennum við fullorðna fólkið ekki að hlusta á börn og hræðslu þeirra við myrkrið og segjum það vera vitleysu. Ég vona að bókin hjálpi börnum að skilja hvað myrkrið er og að allir upplifi stundum þessi óskýru mörk á milli draums og vöku, ímyndunar og raunveruleika.

Rökkrið umlykur söguþráðinn; hvernig líður þér í skammdeginu?

Ég er mjög hrifin af myrkri, það klæðir mig vel. Ég elska árstímann frá október og fram í janúar. Mér finnst þessi dimmi tími á norðurhjara veraldar vera heillandi, róandi og dularfullur í senn; maður fyllist sköpunarorku og ímyndunaraflið fer á flug. Svo er maður enn meira stemmdur í að hafa það kósí með fólkinu sem maður elskar.

Athugasemdir

Auglýsing
Auglýsing

Tengdar fréttir

Tíska

Grunnur að góðum fataskáp

Lífið

Hið góða mest gúgglað árið 2018

Lífið

Plötuðu milljónir Twitter not­enda fyrir skóla­verk­efni

Auglýsing

Nýjast

Bjóða þeim sem eru einir á jólum í há­tíðar­kvöld­verð

Súkku­laði flæddi um götur þýsks smá­bæjar

Fox hrædd við að opna sig þrátt fyrir #MeT­oo

Konur í aðalhlutverkum vinsælli en karlar

Fyrst konur og nú karlar á trúnó

Breyttu Iceland í sann­kallað ís­land

Auglýsing