Frá 1. nóvember til 14. apríl þarf að hafa vetrardekk undir bifreiðum á Íslandi. Vetrardekk eru, eins og nafnið gefur til kynna, sérhönnuð til að gagnast bifreiðum á veturna, í hálku, snjó og ís. Munurinn á þeim og sumardekkjum er gúmmíið í þeim og breidd og dýpt mynstursins. Í vetrardekkjum eru líka oft naglar til að auka grip á ís, en þeir tæra líka götuna og skapa aukið vegryk, ásamt því að mynda djúp hjólför á yfirborði vega. Það er misjafnt milli landa hvort slík dekk eru leyfð, enda eru þau víða alveg ónauðsynleg.

Gúmmíið í vetrardekkjum er ekki eins og í sumardekkjum og það er mýkra. Samspil gúmmísins í dekkinu og yfirborðs vega er svo breytilegt eftir hitastigi og hefur áhrif á veggrip. Sumardekk harðna þegar hitinn fellur undir sjö gráður en vetrardekk haldast sveigjanleg í kulda.

Það er svo sannarlega full þörf á negldum hjólbörðum á þjóðvegum landsins yfir vetrartímann. NORDICPHOTOS/GETTY

Mynstrið á dekkjunum bítur sig fast í snjó, ís og slyddu, dreifir vatni hraðar til að koma í veg fyrir að bílar fljóti ofan á hjólförum og tryggir betra grip á vegum og betri stjórn. Aukin dýpt hjálpar mynstrinu að grípa í snjó, sem gefur betra grip á pökkuðum snjó. Vetrardekk sem hafa staðist veggripspróf hafa rétt á að vera merkt með þriggja tinda fjalli með snjókorni.

Stífari sumardekk henta svo mun betur og gefa betra veggrip í hlýrra veðri, ásamt því að valda minni mengun.

Ábendingar Samgöngustofu

Hér eru nokkur atriði sem Samgöngustofa bendir fólki á að hafa í huga varðandi hjólbarða fyrir veturinn.

- Bifreiðar ættu að hafa góða heilsárs- eða vetrarhjólbarða sem hæfa aðstæðum, með gripgóðu mynstri og réttum loftþrýstingi.

- Söluaðilar verða að merkja nýja hjólbarða svo niðurstöður staðlaðra prófana sjáist. Það sem á að sjást er hve miklu eldsneyti þeir eyða, hvernig veggrip þeirra er í bleytu og hve mikill hávaði stafar af þeim, í desibelum.

- Ef dekk eru tjöruhreinsuð reglulega yfir veturinn eykst veggrip þeirra mikið. Tjaran myndar sleipa húð á mynstri hjólbarðanna sem er mikilvægt að hreinsa af með vistvænum efnum.

- Nagladekk verða svo bönnuð aftur frá 15. apríl til 31. október nema aðstæður gefi tilefni til annars. Yfir vetrartímabilið skal mynsturdýpt allra hjólbarða vera að minnsta kosti þrír millimetrar.