Myndasögufólkið sem stofnaði Íslenska myndasögusamfélagið (ÍMS) fyrir rétt rúmu ári kemur saman á Facebook á fimmtudaginn þar sem þau ætla að slá saman eins árs afmæli félagsins og útgáfuteiti fyrstu bókar þess á þriggja klukkutíma stafrænni uppákomu sem er öllum opin.

Atla Hrafney, Védís Huldudóttir og Einar Valur Másson eru öll fagfólk í myndasögugeiranum og stofnuðu ÍMS haustið 2019 með það fyrir augum að renna styrkari stoðum undir myndasöguna í íslensku menningarlífi og virkja um leið myndasöguhöfunda og lesendur.

Álfarnir á flugvellinum, Miila Westin, Nika Kiiskilä, Elísabet Rún, Edda K. Malmquist, Netta Lehtola, Einar V. Másson, Védís Huldudóttir og fremri röð Apila Pepita, Broci og Atla Hrafney. myndir/ aðsendar

„Það er alveg greinilega einhver gerjun í gangi og margir höfundar sem vilja stíga fram en vantar kannski helst vettvanginn,“ segir Atla Hrafney, formaður Íslenska myndasögusamfélagsins. „Og þess vegna erum við að reyna að keyra á þetta og búa til kúltúr,“ segir Atla og bendir á að félagið er skipað bæði áhuga- og fagfólki í myndasögugeiranum.

Erfitt í kófinu

Þegar Atla er spurð út í stöðu myndasögunnar á Íslandi tekur hún undir að myndasagan hafi einhvern veginn ekki náð jafn traustri menningarlegri fótfestu á Íslandi og til dæmis í næstu nágrannalöndum. Þessu vill félagið meðal annars bæta úr með alls konar hópefli og myndasöguviðburðum.

Krot og dútl eftir Védísi Huldudóttur frá stafrænni myndasögusultu á Facebook-síðu ÍMS í maí 2020.

„Við horfum mikið til Finna í þessu en þeir eru mjög virkir í félagslega þættinum og viðburðum,“ segir Atla og bendir á að vissulega sé við ramman reip að draga í kófinu. „Við höfum samt náð á þessu fyrsta ári að vinna með til dæmis Barnamenningarhátíðinni, Listasafni Reykjavíkur og komið myndasöguhöfundum í sumarstörf hjá Reykjavíkurborg. Þannig að við höfum náð alveg ágætlega miklum árangri yfir þetta ár miðað við hversu erfitt þetta er.“

Útgáfa og afmæli

ÍMS lætur þannig COVID-19 ekki kýla alla myndasögugleðina niður og verður með heilmikil hátíðarhöld á Facebook-síðu sinni annað kvöld milli klukkan 17-20.

Atla segir að fyrst og fremst ætli þau að fagna fyrstu útgáfu félagsins á myndasagnabálki sem leyfir nýjum og spennandi röddum í heimi íslenskra myndasagna að heyrast.

Bókin heitir ÍMS 2020 Comic Anthology, eða Myndasagnabálkur ÍMS 2020, og er 68 blaðsíður en tveir burðarásar hennar eru annars vegar sýning finnsk-íslenska hópsins Elves at the Airport í Listasafni Reykjavíkur í nóvember 2019 og hins vegar Strange Communities á Reykjavik Fringe-listahátíðinni í júlí 2020.

Atla segir þau síðan nota þetta tækifæri til þess að halda einnig upp á eins árs afmæli félagsins og áréttar að allir séu velkomnir og að á vefnum sé vitaskuld einnig öllum óhætt.

„Þetta verður þriggja klukkutíma viðburður þar sem fólk getur bara komið inn og út eins og það vill.“

Hófið verður haldið hér og stendur milli 17-20 fimmtudaginn 26. nóvember.

Kynleg samfélög

Þrjár frumsamdar myndasögur voru til sýnis í Galleríi Fold í júlí í tengslum við Reykjavík Fringe-hátíðina undir yfirskriftinni Furðuleg samfélög, eða Strange Communities.

Síða 2 úr Dracula Eats People, síða 2 úr F.R.E.A.K. og síða 3 úr Outcast.

Þetta voru sögurnar Dracula Eats People, eftir Árna Jón Gunnarsson og Einar V. Másson, Outcast, eftir Eddu Katrínu Malmquist, og F.R.E.A.K. eftir Karítas Gunnarsdóttur.

Allar styðjast við þekktar þjóð- eða furðusögur og var með óvæntri sýn á þessi gömlu minni reynt að varpa nýju ljósi á ákveðna siði eða venjur í samtímanum. Sögurnar birtast í Myndasagnabálki ÍMS 2020 og eru þar annar burðarás ritsins.