Camerarctica heldur sína árlegu kertaljósatónleika í kirkjum nú rétt fyrir jólin, en hópurinn hefur leikið ljúfa tónlist eftir Mozart í 29 ár.

Hópinn skipa að þessu sinni þau Ármann Helgason, klarínettuleikari, Emilia Rós Sigfúsdóttir flautuleikari, Hildigunnur Halldórsdóttir og Bryndís Pálsdóttir fiðluleikarar, Svava Bernharðsdóttir og Guðrún Þórarinsdóttir víóluleikarar og Sigurður Halldórsson sellóleikari.

Á dagskránni verður strengjakvartett kv. 160 og flautukvartett kv. 285 eftir Mozart, auk kvintetts fyrir klarínettu og strengi eftir Franz Krommer, samtímamann Mozarts. Að venju lýkur tónleikunum á því að Camerarctica leikur jólasálminn góða, Í dag er glatt í döprum hjörtum, eftir Mozart.

Tónleikarnir verða í Hafnarfjarðarkirkju sunnudagskvöldið 19. desember, í Kópavogskirkju mánudagskvöldið 20. desember, í Garðakirkju þriðjudagskvöldið 21. desember og í Dómkirkjunni í Reykjavík miðvikudagskvöldið 22. desember.

Tónleikarnir eru klukkustundarlangir og hefjast þeir allir klukkan 21.00.