Svíana segir Kjartan vera einna lengst komna í moltugerð, sérstaklega varðandi þátttöku almennings. „Þegar ég flutti til Íslands fékk ég mér jarðgerðartank, las mér til um efnið og fór að prófa mig áfram. Mikil mengun stafar af urðun matarleifa og í raun ætti að banna hana sem fyrst. Helstu kostirnir við moltugerð eru þeir að umhverfinu er hlíft við þessari mengun. Fólk í sveitarfélögum Norðurlands á kost á því að láta sækja matarleifar heim til sín sem svo er breytt í moltu í stórum vélum. Aðrir gera þetta sjálfir eins og ég og fjölskyldan. Moltan er góður jarðvegsbætir og góð fyrir blóma- og grænmetisbeð. Molta úr matarleifum er gífurlega næringarrík, jafnvel um of, svo það er betra að blanda henni saman við mold áður en hún er notuð.“

Kjartan er talsmaður þess að það sé þægilegt og hentugt að nota moltuna. „Það er best að hafa moltutunnuna nógu nálægt svo maður þurfi ekki að ganga langt með matarafganga. Mín tunna er ekki nema tíu metra frá eldhúsinu.“

Moltugerð allt árið um kring

Kjartan lýsir moltugerð eða jarðgerð sem heillandi samblöndu af vísindum og list. „Þar ráða ákveðin líffræðileg lögmál en það þarf að prófa sig áfram og alls ekki gefast upp. Mikilvægt er að gera sér grein fyrir að moltugerð er lífrænt niðurbrot. Efnaskipti í efninu gerast á sama hátt og í líkama okkar. Efnaskiptin leiða til þess að efnið hitnar, allt upp í 40-50°C, en hitinn er merki um að niðurbrotið gengur eðlilega fyrir sig. Moltugerð er hægt að stunda allt árið um kring. „Það er enginn vandi að halda moltu á veturna á Ísandi. Hitinn sem verður til við niðurbrotið helst vel þó það sé -10°C frost úti.“

Líkt og líkamar okkar þá þarf moltan þrennt: Næringu, vatn og súrefni. „Ef eitt af þessu þrennu vantar þá stöðvast niðurbrotið. Ef efnið verður til dæmis of blautt og klessist saman þá hindrar það súrefnisflæði og niðurbrot stöðvast. Þá er algengt að fiskiflugur og jafnvel mýs geri sig heimakomnar í tankinum. Ef það gerist er best að setja þurrt efni saman við efnið og hræra vel í, til dæmis með gaffli.“

Kjartan mælir með því fyrir þá sem hafa áhuga á að byrja moltugerð að gerast sem fyrst meðlimur í Facebook-hópnum Áhugafólk um moltugerð. „Ég hef búið til nokkur kennslumyndbönd og þau er að finna í hópnum.“ Einnig þarf að koma sér upp tanki til þess að hýsa moltuna. Jarðvegstankar fást til dæmis í byggingarvöruverslunum eða hjá gámafyrirtækjunum. „Þegar tankurinn hefur verið keyptur er best að setja allra fyrst þurrt trjágreinakurl í botninn, byrja næst að setja matarleifar í tankinn, hræra efninu saman við trjákurl og jafnvel stoðefni sem er með niðurbrotshvata.“

Kjöt- og fiskafgangar mega gjarnan fara í moltuna

Að sögn Kjartans er algengur misskilningur að kjöt og fiskur megi ekki fara í moltu. „Allar matarleifar mega fara í moltuna. Kjöt og fiskur eru beinlínis æskilegt hráefni vegna mikils magns af köfnunarefni. Rétt hlutfall af kolefni (C) og köfnunarefni (N) tryggir hratt niðurbrot í tankinum, svo hratt að mýs eða flugur hafa ekki lyst á efninu daginn eftir. Fólk þarf ekki að hafa áhyggjur af beinum, því þótt bein brotni ekki niður nema á löngum tíma þá sigtar maður slíkt frá þegar moltan er að fullu niðurbrotin og tilbúin til notkunar.“