Sonur Mariu Clark lést í bíl­slysi fyrir tveimur árum síðan, einungis 25 ára gamall. Hún hugsaði strax með sér að hún ætlaði að nýta líf­færin hans í líf­færa­gjöf. Hjartað hans slær núna í fjórtán ára dreng, tveimur árum eftir andláts sonar Clark. ABC News greina frá þessu.

„Ég sagði: Við getum ekki grafið alla þessa töfra, við verðum að deila þeim,“ sagði Clark, móðir þriggja eftir­lifandi barna.

Clark sagði það hafa verið ósk sonar síns að verða líf­færa­gjafi. Þegar sonurinn lést var við­takandi einungis þrem tímum frá honum.

Í septem­ber árið 2020 var drengur að nafni Jean Paul Marceaux á bið­lista eftir sinni annarri hjartaígræðslu, en hann var þá einungis 12 ára.

Jean Paul fór í sína fyrstu hjartaígræðslu að­eins tveggja ára, en um tíu árum síðar fór hjartað hans að bila að sögn móður hans Candace Armstrong. „Þegar hann fékk fyrstu í­græðsluna vissum við að líkurnar á því að hann þyrfti að fara í aðra í­græðslu væru miklar. Hann endaði síðan á sjúkra­húsi árið 2020,“ sagði Armstrong.

Clark sagðist vita að hjarta sonar síns hefði verið gefið en vissi þó ekki hver hefði tekið við því. Í flestum til­fellum líf­færa­gjafar er fjöl­skyldum sagt að bíða í eitt ár áður en þau hafa sam­band við við­takanda líf­færanna.

Fjöl­skyldurnar tvær náðu að hitta hvora aðra tæpum tveimur árum eftir að Jean Paul tók við hjartanu.
Fréttablaðið/LOPA

Heyrði aldrei frá fjölskyldu fyrsta líffæragjafans

Armstrong, móðir Jean Paul, sagðist aldrei hafa heyrt frá fjöl­skyldu fyrsta hjarta­gjafans, en það leið ekki ár þangað til að Clark hafði sam­band við Armstrong og lét hana fá bréf með nafni og mynd af syni sínum.

Clark segist ekki hafa getað beðið eftir því að sjá hver fékk hjarta sonar síns. „Mig langaði að vita hvar líf­færin hans eru. Ég vildi vita að þau væru í lagi,“ sagði hún.

Þær mæður héldu sam­bandi í gegnum skila­boð á Face­book en Armstrong var dug­leg að senda upp­færslur um bata Jean Paul. „Hún sýndi mér mynd­band af honum dansa á fyrsta ballinu. Ég var á­nægð að sjá það,“ sagði Clark.

Co­vid-19 hafði þau á­hrif að seinka þurfti fundi þeirra, en Jean Paul hefur slæmt ó­næmis­kerfi eftir í­græðsluna svo hann ein­angraði sig í far­aldrinum.

Fjöl­skyldurnar tvær náðu að hitta hvora aðra tæpum tveimur árum eftir að Jean Paul tók við hjartanu.

„Hann kom inn og hann faðmaði mig bara. Hann knúsar fast, eins og sonur minn. Og svo fékk ég að heyra hjart­sláttinn, hann var svo sterkur og fullur af lífi,“ sagði Clark.

Móðir Jean Paul sagði Clark og börn hennar vera orðin hluti að fjöl­skyldu hennar „að ei­lífu.“