Elsie Kristinsdóttir veit hvað skiptir máli þegar kemur að fermingarförðun. Elsie lærði förðunarfræði í Snyrtiakademíunni í Kópavogi árið 2011, en hún er menntuð sem bæði förðunarfræðingur og stjórnmálafræðingur og kennir samfélagsgreinar í Vallaskóla á Selfossi ásamt því að vera í mastersnámi í kennslufræði við HÍ. Hún hefur starfað sem förðunarfræðingur í níu ár og hefur haldið sér við með því að fara á masterclass námskeið, en hefur aldrei gert förðun að aðalstarfi sínu.

„Mig langar að halda áfram að farða, en ég sé ekki fram á að leggja þetta fyrir mig því ég er mikill bókaormur,“ segir Elsie. „En þetta er samt það skemmtilegasta sem ég geri.“

Elsie segir að það sé töluverður munur á fermingarförðun og almennri tískuförðun.

Síðustu árin hefur náttúruleg og ljómandi húð verið í tísku og Elsie segir að það henti vel í fermingarförðun að hafa húðina í aðalhlutverkinu.

„Tískuförðun er voðalega bundin því hvað er í tísku hverju sinni, en fermingarförðun er miklu meira tímalaus. Það er helsti munurinn,“ segir Elsie. „Tískuförðun snýst því um það sem er vinsælt hverju sinni, hvort sem það eru skærir litir, dökkar varir, ýktur augnblýantur eða hvað annað, en fermingarförðunin er látlausari og tímalausari.“

Hægar breytingar í fermingarförðun

Tískan breytist hægar í fermingarförðun, en hún breytist samt. „Þetta hefur breyst rosalega mikið í gegnum árin,“ segir Elsie. „Ég man að þegar ég fermdist var ég bara með maskara. Þetta hefur aukist, en almenna viðmiðið er samt að vera ánægður með sjálfan sig og að minna er meira. Það þýðir samt ekki endilega að nota bara litað dagkrem og hyljara, heldur frekar að fara hóflega og velja náttúrulegu leiðina.“

Elsie segir að tískubylgjur í förðun hafi áhrif á áherslurnar í fermingarförðun. „Það sem breytist á milli ára eru áherslurnar. Stundum er kannski aukin áhersla á augabrúnirnar og annað ár er aukin áhersla á varirnar og þá er náttúrulegum blýanti bætt við gloss,“ segir hún. „Síðustu árin hefur verið í tísku að húðin sé ljómandi og náttúruleg og það er mjög góður útgangspunktur fyrir fermingarförðun að hafa húðina í aðalhlutverki.“

Elsie mælir með því að fara ekki óðslega í fermingarförðuninni og hafa hana ekki ýkta. Hún bendir óvönum á að fá hjálp frá fagaðila eða reyndum fjölskyldumeðlim.

Elsie segir að fólk verði að hafa í huga að það vilji geta skoðað fermingarmyndirnar eftir tíu ár án þess að hugsa „guð minn almáttugur!“. „Ekki fara þér óðslega, ekki hafa þetta of ýkt. Minna er meira,“ segir hún. „Ef þú kannt ekki að mála þig skaltu fá fagaðila eða einhvern í fjölskyldunni sem er með reynslu til að hjálpa þér, ekki bara fara af stað og reyna að líkja eftir einhverri mynd af Pinterest.“

Vönduð en látlaus förðun

Elsie sýndi okkur dæmi um glæsilega fermingarförðun á fyrirsætunni Berglindi Jónsdóttur. Þrátt fyrir að Berglind líti út fyrir að vera lítið máluð er töluverð vinna að baki þessari náttúrulegu og látlausu förðun.

„Grunnurinn að allri förðun er að hafa undirlagið gott. Forvinna er algjörlega nauðsynleg og ég undirbjó húðina með góðu ljómakremi,“ segir Elsie. „Svo bar ég á hana litað BB-dagkrem með rökum beauty blender svampi og passaði að hafa húðina jafna og fallega, en ég vann BB-kremið vel inn í húðina með svampinum.

Svo setti ég hyljara undir augu og á öll þau svæði sem þurfti. Svo áður en lengra var haldið setti ég væna skvettu af rakaspreyi yfir allt andlitið,“ segir Elsie. „Eftir það púðraði ég niður helstu svæðin sem ég vildi ekki að glönsuðu mikið, en ekki of mikið, því ég vildi halda í náttúrulegan ljóma húðarinnar.

Svo tók ég sólarpúður og skyggði undir kinnbein og upp við hárlínuna og við kjálkann, þannig að það var létt skygging á andlitinu,“ segir Elsie. „Svo setti ég ferskjulitaðan kinnalit á kinnarnar og ljómapúður (highlighter) á kinnbein, nefbrodd, efri vör og aðeins á hökuna. Ég notaði ljómapúður til að fá fallega ljómandi áferð á húðina.

Þrátt fyrir að Berglind líti út fyrir að vera lítið máluð er töluverð vinna að baki þessari náttúrulegu og látlausu förðun.

Svo fór ég í augabrúnirnar,“ segir Elsie. „Ég byrjaði á að greiða þær mjög vel með greiðu til að ná öllu púðri eða kremi úr þeim og svo setti ég augabrúnagel í þær og mótaði þær á fallegan og náttúrulegan hátt og passaði að þær væru ekki of afgerandi í laginu.

Svo tók ég alveg matt sólarpúður og fór aðeins í globus-línuna, línuna þar sem augnlok og bein mætast,“ segir Elsie. „Ég bjó til létta skyggingu þar til að fá smá dýpt í augnsvæðið. Eftir það tók ég brúnan eyeliner og gerði örmjóa línu meðfram augum til að ramma inn augnsvæðið.

Svo brettum við augnhárin og settum lítinn maskara, en því næst tók ég stök augnhár og setti á til að fá smá þykkingu og þétta,“ segir Elsie. „Svo rammaði ég varirnar inn með náttúrulegum varablýanti og setti gloss yfir.

Svo tók ég aftur upp ljómapúður og setti í augnkrók og á augnbeinið undir augabrúninni,“ segir Elsie. „Eftir það tók ég aftur upp rakasprey og spreyjaði vel yfir andlitið og það síðasta sem ég gerði var að setja svo setting sprey yfir. Þessi tvö sprey í lokin eru rosa mikilvægur lokahnykkur.

Þá vorum við tilbúnar,“ segir Elsie að lokum.


Hægt er að fylgjast með förðun Elsie á Instagram-síðu hennar, @makeupbyelsiek.