Góðgerðarsamtökin Oxfam standa fyrir átakinu. Á vefsíðu átaksins segir að árlega endi 11 milljón flíkur í landfyllingu og mikilvægt sé að draga úr þessari sóun. Mikil vitundarvakning hefur orðið undanfarið á slæmum áhrifum hinnar svokölluðu skyndibitatísku. Fyrirsætan Stella Tennant styður átakið og tók þátt í myndaseríu ásamt 14 ára dóttur sinni til að vekja athygli á því.

Markmið átaksins er að hvetja fólk til að kaupa notuð föt af góðgerðarsamtökum í stað þess að kaupa ný föt og lengja þannig líftíma fatnaðarins. Stella segir að það geti verið erfitt að breyta út af venjum sínum og endurnýta gömul föt í stað þess að kaupa ný en hún telur það sannarlega skref í rétta átt. Hún segir að fyrir kynslóð dóttur hennar sé líklega auðveldara að aðlagast breyttum venjum en dóttir hennar er nú þegar dugleg að kaupa sér notuð föt.

Til að minnka fatakaup er mikilvægt að nota hverja flík lengur og gera við flíkur í stað þess að henda þeim. Áætlaður líftími hverrar flíkur í Bretlandi er 2,2 ár. Með því að lengja líftímann um ekki nema þrjá mánuði myndi kolefnisspor hverrar flíkur minnka um 5-10%.

Það segir sig því sjálft að það að nota hverja flík lengur margborgar sig. Eins getur verið gott að velja föt sem eru tímalaus í stað þess að eltast við nýjustu tískustraumana. Þá eru minni líkur á að fá leiða á fötunum og þannig nýtast þau lengur.

Fataskiptimark­aðir eru líka sniðug lausn vilji fólk lengja líftíma fatanna sinna og á sama tíma að hrista aðeins upp í fataskápnum sínum. Gömul kápa sem hefur hangið ónotuð inni í skáp árum saman gæti verið fjársjóður fyrir einhvern annan. Á fataskiptimörkuðum mætir fólk með föt sem það er hætt að nota svo aðrir geti nýtt þau og þar er hægt að finna sér „ný“ föt án þess að það hafi nokkur áhrif á umhverfið. Slíkir markaðir eru bæði hagkvæmir fyrir budduna og umhverfið.

Ef fólk kaupir minna af nýjum fötum er minna framleitt af þeim og færri flíkur enda sem landfylling. Plastagnir úr gerviefnum eins og pólýester enda síður í sjónum og skaða lífríkið þar. Það er því um að gera að hugsa sig tvisvar um áður en ný föt eru keypt. Er það virkilega þess virði? Það er spurning sem fólk mætti gjarnan spyrja sig að.