„Mikil sorg hér á Sogavegi hjá sonum mínum sem tókst að týna gylltum fótbolta árituðum af Cristiano Ronaldo á Battó vellinum hjá Breiðagerðisskóla,“ svona hefst færsla Ernis Erlingssonar föðurs í hverfisgrúppu á Facebook í gær.

Ernir birtir mynd af glæsilegum gylltum fótbolta sem synir hans týndu í hverfi 108 í gær.

Aðspurður um söguna á bakvið boltann segir Ernir að hann hafi verið keyptur á sérstöku Ronaldo safni á portúgölsku eyjunni Madeira.

Líkt og margir vita er knattspyrnuhetjan frá Portúgal og styður hann safnið sjálfur, meðal annars með því að árita bolta sem eru síðan seldir á safninu.

„Það er nú allt og sumt, þetta er bara söluvara í einstöku safni,“ segir Ernir í samtali við Fréttablaðið.

Ernir birti mynd af boltanum glæsilega í von um að einhver viti hvar hann sé að finna.

Hér má sjá boltann sem týndist og áritun Ronaldo á honum.
Mynd/Skjáskot af Facebook