Laskaður kvikmyndabransinn heldur sína uppskeru- og árshátíð á sunnudagskvöld að íslenskum tíma og oft hefur nú verið meira líf í tuskum hátískuhönnuðanna og tilnefningunum almennt. En kannski er ekki við öðru að búast þegar heimsfaraldur og einstefna í rétthugsun leggjast á eitt.

Það segir sitt um ástandið að aldrei þessu vant eru fulltrúar há- og dægurmenningardeilda Fréttablaðsins í einu og öllu sammála um hver niðurstaðan verður í þeim fimm flokkum sem vekja jafnan mesta athygli og áhuga.

En sem betur fer á akademían það til að koma á óvart og úr óvæntri átt og nokkrir jókerar sem eru til alls líklegir eru í stokknum.

Ma Rainey´s Black Bottom með Viola Davis og Chadwick heitinn Boseman í forgrunni er líkleg til þess að skila þeim styttum.

Sem betur fer, því að annars væri aðeins hasar og spenna í kringum það hvort Húsvíkingar ríði ekki örugglega feitasta hestinum af rauða dreglinum með verðlaun fyrir besta lagið um heimabæinn við Skjálfanda þar sem hvalirnir eiga athvarf og söngur fjallanna bergmálar í gegnum gargið í mávunum.

Besta myndin


Nomadland

The Father

Judas and the Black Messiah

Mank

Minari

Promising Young Woman

Sound of Metal

The Trial of Chicago 7

Kolbrún: Þetta var heldur aumt kvikmyndaár. Engin tilnefndu myndanna er frábær, sumar reyndar drepleiðinlegar. The Father finnst mér afar áhugaverð og hið sama má segja um Promising Young Woman. Ég horfði hins vegar með mestri ánægju á Mank þannig að hún fær mitt atkvæði. Ég er þó viss um að hin þrautleiðinlega Nomadland muni vinna – algjörlega óskiljanlegt!


Þórarinn:
Drungi, þunglyndi og leiðindi eru dagskipunin hjá Óskarnum á þessum allra síðustu og leiðinlegustu tímum og í þeim efnum hefur Nomadland sigfljótandi yfirburði yfir aðrar tilnefndar myndir og mun hreppa verðlaunin þótt stemningin og tíðarandinn hrópi ef til vill hærra á Minari og að Netflix hafi keyrt á klikkaða kosningabaráttu fyrir The Trial of the Chigaco 7.

Besti leikstjórinn


Chloé Zhao
Nomadland

Thomas Vinterberg
Another Round

David Fincher
Mank

Lee Isaac Chung
Minari

Emerald Fennell
Promising Young Woman

Kolbrún: Vel David Fincher, leikstjóra Mank sem skilar sínu verki af miklu öryggi og sannri fagmennsku. Ég held samt að Chloé Zhao sé örugg með verðlaunin fyrir hina mjög svo þreytandi Nomadland. Ég veit ekki um neinn sem segist hafa horft á þá mynd af sannri ánægju. Listræn tilgerð mun sigra, en það er ekki alveg óþekkt í listaheiminum.


Þórarinn:
David Fincher er alveg hress í Mank og skilar flottri og skemmtilegri mynd um gerð handrits meintrar bestu myndar allra tíma, Citizen Kane. Þrátt fyrir sjálfhverfu Hollywood-liðsins verður þetta ekki kvöldið hans og þótt Nomadland hafi fært leiðindi upp í nýjar og áður óþekktar hæðir verður ekki af myndinni tekið að hún á erindi og Chloé Zhao hirðir þessi verðlaun verðskuldað. Það þarf lítið að þrasa um það.

Besti leikarinn


Chadwick Boseman
Ma Rainey´s Black Bottom

Riz Ahmed
Sound of Metal

Anthony Hopkins
The Father

Gary Oldman
Mank

Steven Yeun
Minari

Kolbrún: Þarna hlýtur baráttan að standa á milli Anthony Hopkins og Chadwick heitins Boseman en báðir eru frábærir í hlutverkum sínum. Ég hallast að Hopkins sem er algjörlega frábær og veitir manni afar sannfærandi sýn inn í heim Alzheimer-sjúklings. Ég held þó að Boseman hreppi styttuna fyrir afar áhrifamikla túlkun sína. Þetta er eina tækifæri hans til að fá Óskarinn og ég held að styttan verði hans. Það mun verða hjartnæm stund.


Þórarinn:
Valið stendur klárlega milli Anthony Hopkins og Chadwick Boseman og Anthony Hopkins að leika gamlan mann með heilabilun er náttúrlega eitthvað sem Óskarsverðlaunin fyrir besta leikarann voru fundin upp fyrir. Enginn deilir hins vegar við dauðann og Boseman, sá frábæri leikari, er öllum harmdauði og ekkert getur komið í veg fyrir að akademían sýni honum verðskuldaðan sóma og virðingu með styttunni.

Hopkins á líka eina styttu fyrir og hefur verið tilnefndur samanlagt sex sinnum en þessi tilnefning Bosemans fyrir Ma Rainey's Black Bottom er hans fyrsta og því miður sú síðasta.

Besta leikkonan


Viola Davis
Ma Rainey´s Black Bottom

Andra Day
The United States vs. Billie Holiday

Vanessa Kirby
Pieces of a Woman

Frances McDormand
Nomadland

Carey Mulligan
Promising Young Woman

Kolbrún: Ég er einlægur aðdáandi hinnar stórkostlegu leikkonu Violu Davis sem aldrei stígur feilspor. Ég veðja á hana og held að akademían geri það líka. McDormand hlýtur þó að eiga talsverða möguleika. Vanessa Kirby er fantagóð í Pieces of a Woman og gæti orðið óvæntur sigurvegari, en ég á samt ekki sérstaklega von á því.


Þórarinn:
Fengi ég einhverju ráðið fengi Carey Mulligan þessi verðlaun fyrir Promising Young Woman. Vegna þess að hún er frábær í góðri mynd en fékk einhvern leiðinda rembuskít yfir sig frá gagnrýnanda Variety. Óskarinn mætti alveg senda fingurinn í fílabeinsturninn með verðlaunum til hennar en vindurinn er í seglin hjá Violu Davis sem stelur styttunni frá Frances McDormand og eyðileggur Nomadland alslemmuna í leiðinni.

Besti leikari í aukahlutverki


Daniel Kaluuya
Judas and the Black Messiah

Sacha Baron Cohen
The Trial of Chicago 7

Leslie Odom
One Night in Miami

Paul Raci
Sound of Metal

Lakeith Stanfield
Judas and the Black Messiah

Kolbrún: Sacha Baron Cohen er ansi góður í The Trial of Chicago 7og fær mitt atkvæði en ég held að Daniel Kaluuya hreppi styttuna. Satt að segja finnst mér þessi flokkur einna minnst spennandi einfaldlega vegna þess að myndirnar þykja mér ekkert sérstakar.


Þórarinn:
Sacha Baron Cohen er vissulega góður í The Trial of Chicago 7 og trommar meira að segja upp með ekta óskarsverðlaunahárgreiðslu en samfélagsstemningin í heimsþorpinu er með Judas and the Black Messiah.

Myndin er enda með tvo leikara tilnefnda í þessum flokki; Lakeith Stanfield og Daniel Kaluuya og sá síðarnefndi tekur þetta með glæsibrag. Reyndar má gera alvarlegar athugasemdir við það hvers vegna hann er ekki tilnefndur í flokki aðalleikara en þá hefði hann að vísu mætt Boseman og þurft að lúta í lægra haldi.

Besta leikkona í aukahlutverki


Yuh-Jung Youn
Minari

Maria Bakalova
Borat Subsequent MovieFilm

Glenn Close
Hillbilly Elegy

Olivia Colman
The Father

Amanda Seyfried
Mank

Kolbrún: Ég hef einungis séð stiklur úr Minari en þær benda til að Yuh-Jung Youn eigi Óskarinn skilið og ég hef trú á því að hún vinni. Hinar fjórar leikkonurnar eru allar góðar í sínum hlutverkum en Amanda Seyfried finnst mér best þeirra, hún er unaðsleg Marion Davies í Mank.

Þórarinn: Amanda Seyfried var vissulega dásamleg í Mank og hélt Gary Oldman heldur betur á tánum í þeirra senum en Yuh-Jung Youn á verðlaunin svo sannarlega skilið og fær þau. Ég ætla samt að leyfa mér að láta persónulegar skoðanir mínar og dynti ráða hérna og veðja á Maria Bakalova í Borat Subsequent Moviefilm.


Hún er það langbesta við þetta útvatnaða og heldur mislukkaða framhald epísku snilldarinnar Borat: Cultural Learnings of America for Make Benefit Glorious Nation of Kazakhstan og sýnir leik sem er mörgum klössum ofar en myndin sjálf. Þar fyrir utan er eitthvað svo falleg og skemmtileg rísandi stjörnu saga á bak við innkomu þessarar 25 ára gömlu, búlgörsku leikkonu.