„Við erum bara búin að taka þetta eitt skref í einu, eins og flestir í þessum sporum held ég. Maður reynir bara að vera jákvæður og bjartsýnn, en þetta er auðvitað búin að vera mikil óvissa og lykilatriðið alltaf að tryggja öryggi og fara eftir settum reglum. Við frestuðum keppninni einu sinni. Eins og staðan er núna höldum við okkar striki og förum eftir öllu sem þríeykið góða segir,“ segir Manuela Ósk Harðardóttir, sem staðfestir þó að nú sé fundað um möguleikann á því að fresta keppninni fram í október.

Enn er því stefnt að því að keppnin fari fram 21. ágúst en þá yrði áhorfendafjöldi mjög takmarkaður og sætaskipan þannig að tveggja metra reglan sé virt.

„Eins hefur Elísa, sem sér um sýninguna, þurft að endurskoða allar innkomur. Erlendis erum við að sjá krýningar með grímur og það er bara eitthvað sem við þurfum að skoða þegar nær dregur,“ segir Manuela.

Styrkja Kvennaathvarfið

Hún segir hópinn í ár fjölbreyttan og frábæran að vanda.

„Það eru margar í hópnum núna sem hafa keppt áður, sem mér finnst alltaf svo gaman, því það segir mér að við séum að gera góða hluti þegar stelpur koma aftur og keppa. Þetta hefur klárlega verið erfiðara ár og skrítnar aðstæður, en í svona nánu samstarfi myndast alltaf djúp vinátta, sem okkur finnst svo dýrmæt.“

Manuela segir að hún og aðstandendur keppninnar geri mikið í því að hvetja keppendur til að láta gott af sér leiða.

„Tuttugu kröftugar konur geta sko gert mjög margt þegar þær koma saman. Við eigum í góðu samstarfi við Kringlubazaarinn, en stelpurnar hafa safnað fötum sem þær eru hættar að nota og verða með bása opna til 29. ágúst. Allur ágóði sölunnar fer óskiptur til Kvennaathvarfsins. Sú umræða hefur oft komið upp hjá okkur í keppninni að maður þekkir eiginlega ekki konu sem aldrei hefur upplifað einhvers konar of beldi, hvort sem það er óviðeigandi káf á skemmtistað eða heimilisofbeldi. Það er mjög sorgleg staðreynd og eitthvað sem ætti ekki að viðgangast. Um leið og maður opnar umræðuna þá opnar maður líka fyrir breytingar, og það er það sem við viljum gera,“ segir Manuela.

Hluti af þeim kraftmiklu konum sem taka þátt í keppninni í ár og selja af sér spjarirnar til styrktar Kvennaathvarfinu á Kringlubaazar.

Rekið af konum

Manuela segist gera sér grein fyrir þeim fordómum sem fylgi keppnum sem þessum.

„Orðið fegurðarsamkeppni er mjög villandi og býður einmitt upp á misskilning eins og til dæmis að keppnin snúist bara um útlit. Ég er alltaf að reyna að finna betra orð sem gefur rétta mynd af því sem við gerum í keppni eins og Miss Universe Iceland, en hef ekki fundið neitt ennþá. Miss Universe er rekið af konum, fyrir konur og með það að markmiði að valdefla ungar konur og gefa þeim tækifæri og rödd,“ segir hún.

Manuela segist alltaf hafa nóg að gera, en nýverið opnaði hún vellíðunarstöðina Even Labs. „Það er alltaf nóg að gera hjá mér og stundum bara aðeins of. Þessir skrítnu tímar sem við erum að upplifa hafa hins vegar snúið mér svolítið á hvolf og maður kemst ekki hjá því að taka svolítið til hjá sér og kíkja á lífið í aðeins öðru ljósi,“ segir Manuela, sem nýverið opinberaði nýjan kærasta á Instagram.

Aldrei liðið betur

„Ég skrifaði við fyrstu myndina sem ég birti af okkur saman hvaða bjáni hefði eiginlega sagt að góðir hlutir gerist hægt? Kaldhæðnin er vissulega sú að hjá okkur hefur þetta gerst á einhverjum ógnarhraða, en samt er tilfinningin svo rétt. Mér hefur í raun aldrei liðið betur og við grínumst mikið með að við séum eins og unglingar saman. Ég veit að maður þarf að ganga í gegnum alls konar sveiflur í lífinu til að átta sig almennilega á því hvað maður vill og þarf, og svo bara kemur það rétta á hárréttum tíma.“

Manuela hefur verið í sviðsljósinu meira en helming ævi sinnar og segist því orðin frekar vön því að fólk úti í bæ spái í það hvað hún gerir og segir.

„Með tímanum þroskast maður og hættir að láta það á sig fá, maður sér hvaða fólk maður vill hafa í kringum sig og hættir að læðast til að þóknast öðrum. Það er mikið frelsi fólgið í því að lifa lífinu án þess að sveiflast með áliti annarra.“