Þorgerður Ása Aðalsteinsdóttir minnist móður sinnar, Önnu Pálínu Árnadóttur, með heiðurstónleikum í Fríkirkjunni í kvöld, fimmtudag, í tilefni þess að Anna Pálína hefði orðið sextug 9. mars. Anna Pálína var ein dáðasta vísnasöngkona Íslands en hún lést úr krabbameini á hátindi ferils síns 2004, aðeins 41 árs að aldri.
„Það var einhvern tíma í nóvember sem ég fór að huga að þessum tónleikum og hugsaði með mér að mig langaði að minnast hennar með einhverjum hætti,“ segir Þorgerður Ása.
Á tónleikunum í Fríkirkjunni mun Ása flytja valin lög af hljómplötum móður sinnar en með henni leika þeir Gunnar Gunnarsson á píanó, Jón Rafnsson á kontrabassa og Pétur Grétarsson á slagverk, sem störfuðu allir náið með Önnu Pálínu. Gestasöngvarar á tónleikunum eru söngkonan Guðrún Gunnarsdóttir, ein nánasta vinkonu Önnu Pálínu, og Álfgrímur Aðalsteinsson, bróðir Ásu.
„Við héldum tónleika fyrir tíu árum þegar hún hefði orðið fimmtug en þá var ég mjög feimin við þennan samanburð og að setja mig í hennar spor og vildi til dæmis alls ekki syngja með hljómveit. Ég var bara ein með gítar og söng eitt lag sem var mjög gaman og þar kom fram fjöldi listamanna. Í þetta sinn langaði mig að gera eitthvað persónulegra og hafa bara flytjendur sem tengdust henni.“
Gaf út átta plötur
Anna Pálína náði miklum frama í tónlist þrátt fyrir stuttan feril og gaf alls út átta plötur í ólíkum stílum, þar af nokkrar með eiginmanni sínum og föður Ásu, Aðalsteini Ásberg Sigurðssyni.
„Hún samdi ekki mikið sjálf, ég held að hún hafi samið eitt eða tvö lög en þetta eru allt lög af plötunum hennar sem við flytjum. Hún gaf út átta plötur, þar af tvær barnaplötur sem verða ekki með í prógramminu, þannig þetta verða lög af sex plötum,“ segir Ása.
Fórstu í gegnum allan katalóginn hennar þegar þú valdir lög á tónleikana?
„Já, ég byrjaði á því að skrifa niður þau lög sem voru mér efst í huga en svo bara skoðaði ég plöturnar og valdi af þeim, svona mismikið af hverjum diski. Þessi diskar eru náttúrlega allir svo ólíkir, þetta er vísnatónlist en svo er líka djassplata, þjóðlagaplata og sálmaplata, þannig að þetta er mikil blanda. Mér finnst mjög erfitt að gera upp á milli þessara platna en ég held mikið upp á plötuna Guð og gamlar konur og lagið Skammlausa gamla konan.“
Fær ekki flúið örlögin
Þorgerður Ása segist áður hafa forðast samanburðinn við móður sína en þó er ljóst að þær mæðgurnar hafa farið svipaða leið í lífinu. Ása er til að mynda sjálf vísnasöngkona auk þess sem hún starfar við dagskrárgerð á Ríkisútvarpinu líkt og móðir hennar gerði á árum áður.
„Maður fær kannski ekki flúið örlög sín að einhverju leyti,“ segir Ása og hlær. „Ég strögglaði svolítið við að koma út úr söngskápnum þarna fyrir rúmum tíu árum en ég er komin yfir það. Söngurinn kallaði á mig og svo líka útvarpið, það var bara einhvern veginn þannig.“
Pökkuðu inn plötum saman
Fjölskylda Ásu er mjög tónelsk en faðir hennar Aðalsteinn Ásberg er skáld og tónlistarmaður og samdi mikið af lögunum sem Anna Pálína söng á ferli sínum. Þá eru báðir bræður hennar einnig í tónlist, þeir Árni Húmi og Álfgrímur sem kemur fram á tónleikunum með systur sinni.
„Pabbi á náttúrlega meirihluta efnisins sem er á tónleikunum, hann samdi svo mikið af lögunum sem hún flutti. Ég ólst upp við að fara á tónleika með þeim og svo vorum við náttúrlega með litla barnaþrælkunarverksmiðju í kjallaranum þar sem við vorum látin pakka inn geisladiskum,“ segir Ása kímin en faðir hennar rekur bóka- og tónlistarútgáfuna Dimmu.
„Þetta voru miklar gæðastundir þar sem öll fjölskyldan sat saman og þetta var svona færiband þar sem við pökkuðum inn plötum. Einn setti geisladiska í, annar bæklinga, næsti lokaði og svo framvegis. Þetta eru mjög dýrmætar minningar og við fengum nú borgað smá, nokkrar krónur á plötu.“
Það er þessi hugmynd að maður klári að vinna úr sorginni en svo einhvern veginn læðist hún aftan að manni, sem er bara fallegt.
Fylgir manni alla ævina
Það hljóta að vera ljúfsár tímamót að fagna afmæli móður þinnar?
„Þetta fylgir manni alla ævina. Maður heldur einhvern veginn að þetta sé frá og það er þessi hugmynd að maður klári að vinna úr sorginni en svo einhvern veginn læðist hún aftan að manni, sem er bara fallegt. Ég vildi fyrst hafa tónleikana á afmælisdegi hennar 9. mars en það vildi þannig til að hvorki bróðir minn né pabbi minn voru á landinu þannig við ákváðum að hafa þá viku seinna og það var mjög rétt. Þá gat maður leyft sér að vera viðkvæmur þann dag og svo fer tónleikadagurinn bara í fögnuð.“
Finnst þér móðir þín hafa fylgt þér í gegnum lífið?
„Já, mamma náttúrlega hafði ótrúlega mikil áhrif á mig og hvatti mig til þess að syngja og lesa upp. Áður en hún lést voru hún og móðir hennar mínir helstu þjálfarar fyrir Stóru upplestrarkeppnina í grunnskóla,“ segir Ása sem vann undankeppnina í sínum skóla og lenti í þriðja sæti aðalkeppninnar.
Viðbrögðin hafa ekki látið á sér standa og kveðst Ása vera að íhuga að bæta við aukatónleikum.
„Það selst svo vel þannig það eru ýmis teikn á lofti um að við gætum þurft að bæta við tónleikum. Ég hlakka mikið til að flytja þessi lög og vona að þetta verði bara ótrúlega gaman.“
