Steffi Gregersen stofnaði Facebook-viðburð sem heitir „Settu jólaljósin upp snemma á þessu ári!“. Hugmyndin gengur út á að fá smá auka birtu og gleði inn í lífið á þessum erfiðu tímum og það er greinilegt að mörgum þykir ekki veita af, því þúsundir vilja taka þátt og átakið hefur meira að segja teygt sig út fyrir landsteinana. Viðtökurnar hafa komið Steffi skemmtilega á óvart, ekki síst þar sem hugmyndin fæddist hálfpartinn í gríni.

Steffi er þýsk og kemur upprunalega frá borginni Siegen, en hún hefur búið á Íslandi í 24 ár, lengur en hún bjó í Þýskalandi. Steffi er gift Torben, sem er danskur, og þau búa ásamt þremur dætrum sínum í fallegu húsi í Hafnarfirði.

Steffi segir að hugmyndin að þessum viðburði hafi fæðst hratt.

„Þetta kom upp á svona fimm sekúndna spjalli í bílnum. Ég sagðist vilja setja ljósin upp extra snemma í ár, strax 1. nóvember, en Torben tók það ekki í mál og sagðist ekki nenna að standa í því,“ segir hún. „En þetta er svo leiðinlegur tími útaf COVID og myrkrið er að koma, þannig að ég ákvað að setja smá pressu á hann með því að búa til viðburð á Facebook og senda hann bara til vina minna, bæði hér á landi og erlendis, en hafa hann samt öllum opinn.“

segir að hún hafi stofnað viðburðinn í hálfgerðu gríni til að setja pressu á Torben og fá hann til að samþykkja að setja jólaljósin upp snemma, en viðtökurnar voru miklu betri en hún bjóst við. FRÉTTABLAÐIÐ/ANTON BRINK

Steffi hafði lýsinguna á viðburðinum á íslensku, ensku og þýsku og innan skamms höfðu yfir fimm þúsund manns lýst yfir áhuga eða sagst ætla að taka þátt og nú er sú tala komin vel yfir sex þúsund.

Jólaskraut strax eftir hrekkjavökuna

Steffi segist alltaf hafa verið mikið jólabarn. Það var mikið lagt upp úr jólunum í æsku hennar og þá var alltaf mest gaman.

„Eftir að maður eignast börn verður þetta líka svo spennandi og skemmtilegur tími. Svo hjálpa jólin líka á þessu dimma tímabili á Íslandi,“ segir Steffi. „Ég tók svo líka eftir því að útvarpsstöðin Jólaretró fór í gang 15. október. Mér finnst það gott þó að það sé pínu snemmt. Venjulega hlusta ég ekki á jólatónlist fyrr en 1. nóvember en ég hef aðeins stolist til að hlusta fyrst þetta er komið í gang.

Mér finnst jólaljósin mjög falleg og fólk leyfir þeim oft að hanga inn í nýja árið, en af hverju ekki bara að setja þau upp fyrr líka?,“ spyr Steffi. „Við erum líka mikil hrekkjavökufjölskylda og skreytum mikið vegna hennar, en daginn eftir hrekkjavöku vil ég helst losna við það og setja upp jólaljósin. Núna er komin pressa á hann Torben að framfylgja þessu.“

Facebook-viðburðurinn „Settu jólaljósin upp snemma á þessu ári!“ gengur út á að fá auka birtu og gleði inn í lífið á þessum erfiðu tímum. MYND/AÐSEND

Hafnarfjarðarbær hefur staðið fyrir átaki þar sem fólk er hvatt til að setja jólaljósin upp snemma til að lýsa upp skammdegið á þessum erfiða tíma og þar hefur verið kveikt á jólaljósum á fjölförnum stöðum, en Steffi segir að það séu engin tengsl á milli viðburðarins hennar og þessara áforma sveitarfélagsins, svo hún viti.

„Þetta var tilkynnt viku eftir að ég setti upp viðburðinn minn. Ég veit ekki hvort það var tilviljun eða ég hafi veitt þeim einhvern innblástur,“ segir Steffi. „Reykjavíkurborg hefur líka staðið fyrir svipuðu átaki.“

Veitir ekki af smá gleði

„Við erum bara að hvetja fólk til að setja jólaljósin upp 1. nóvember, en ég skrifaði 1.-15. nóvember á viðburðinn til að gefa fólki smá svigrúm,“ útskýrir Steffi. „Núna er COVID að versna alls staðar og það er ekki margt sem má gera, en það má samt fara út að labba og þá er gaman að sjá öll fallegu ljósin. Við getum gert þetta út um allt land og glatt fólk sem er á ferðinni.

Það veitir ekkert af því að gleðja fólk á þessu tímabili sem við erum að ganga í gegnum. COVID var nógu slæmt í vor og sumar en núna er að koma tími sem er erfiður fyrir margra, burtséð frá COVID. Þannig að það er ekki mjög skemmtilegur tími fram undan hjá flestum og þá er gott að gera það sem hægt er til að gleðja hvert annað,“ segir Steffi. „Það er líka hægt að taka þetta alla leið og skreyta bara extra mikið í ár í staðinn fyrir að eyða í ferðalög og dýrar jólagjafir.“

Fjölskyldan hjálpaðist að við að setja upp jólaljósin á sunnudaginn í fallegu veðri. MYND/AÐSEND

Steffi býst við miklum viðbrögðum og nú þegar hafa fjölmargir birt myndir af jólaskrautinu sínu í umræðunni um viðburðinn hennar og greinilegt er að það er meira að segja fólk utan landsteinanna að taka þátt.

„Það eru rúmlega tvö þúsund sem hafa sagt ætla að taka þátt og yfir fjögur þúsund búin að lýsa yfir áhuga. Því meira sem þessu er dreift, því fleiri taka vonandi þátt,“ segir hún.

Við komumst í gegnum þetta tímabil saman

Steffi starfar sem flugmaður hjá flugfélaginu Bláfugl en segir að COVID hafi ekki haft sérlega mikil áhrif í líf hennar.

Steffi segir að það veiti ekkert af öllu sem getur glatt fólk á þessu erfiða tímabili. MYND/AÐSEND

„Ekki meira en hjá öðrum. Ég er bara fegin að hafa vinnu og að allir séu heilbrigðir í kringum mig,“ segir Steffi. „Auðvitað hefur þetta áhrif á mitt líf eins og allra annarra. Við höfum til dæmis ekki getað farið eins mikið til útlanda til að hitta fjölskylduna eins og venjulega og það er erfitt að geta hvorki farið að hitta fólk né fá heimsókn. En ég get ekki kvartað.

Ég vil bara endilega hvetja sem flesta til að taka þátt og lýsa upp þessa skrítnu tíma með fallegum ljósum og kannski einhverju öðru skemmtilegu skrauti,“ segir hún. „Við þurfum að finna leiðir til að komast í gegnum þetta erfiða tímabil saman og það er fullt sem er hægt að gera og full ástæða til að gleðja aðra.“


Nánari upplýsingar um viðburðinn er að finna á Facebook. Það er auðvelt að finna hann með því að slá inn „Settu jólaljósin upp snemma á þessu ári!“ í leitargluggann.