Fjórða þáttaröð Venjulegs fólks er komin í Sjónvarp Símans og þar segir af áframhaldandi hremmingum og hversdagslegum ævintýrum vinkvennanna Völu og Júlíönu sem bera nöfn leikkvennanna sem skópu þær.

Vala og Júlíana á leið á Edduna þar sem eitthvað mun sennilega ganga á.
Mynd/ Ólafur Hannesson

„Það er bíó, bókstaflega, að fylgjast með vinkonunum en þær eru alltaf að reyna að finna sig og aðlagast nýjum aðstæðum,“ segir Júlíana.

Oddur Júlíusson kemur nýr inn sem Þyr, ævintýralegur nýr nágranni Júlíönu og Tomma.

„Þegar við byrjuðum að skrifa fyrstu þáttaröð af Venjulegu fólki óraði okkur ekki fyrir því að við myndum fara í fimm seríur,“ heldur hún áfram en þær eru þegar byrjaðar að skrifa fimmtu seríuna með sínu fólki.

Pétur Jóhann bættist í hópinn í þriðju seríu sem Eiríkur, bróðir Tomma, og fer hvergi.

„Þetta er algjör draumur og ég tala nú ekki um að vinna með svona frábæru fólki en þetta hafa alltaf verið við Vala Kristín, Fannar Sveins og Dóri DNA í handritaskrifunum en við fengum annan frábæran handritshöfund með okkur í lið í fjórðu seríu, hana Karen Björgu,“ segir Júlíana en sem fyrr framleiðir Glassriver þættina.

Vala, Júlíana, Fannar leikstjóri, Ásgrímur og Pétur Jóhann leggja línurnar fyrir næstu senu.
Mynd/ Ólafur Hannesson

Það er náttúrlega algjör lottóvinningur að skrifa efni sem hefur fengið svona mikinn meðbyr en ég held að ástæðan sé meðal annars sú að það er alltaf þakklátt að fá aðeins meira grín í skammdegið og lægðirnar á þessu landi.“

Tommi, sem Hilmar Guðjónsson leikur, reynir að hughreysta Júlíönu.
Mynd/ Ólafur Hannesson

Júlíana bætir síðan við að ekki spilli fyrir að fólk eigi að geta tengt við sögupersónurnar þar sem seríurnar fjalli um venjulegt fólk og uppákomur sem það lendir í.

Vala drekkur í sig kjark og veitir sjálfsagt ekki af.

„Og áhorfendur vilja greinilega sjá meira af ævintýrum þess,“ segir Júlíana spennt fyrir framhaldinu.

Þorsteinn Bachmann og Berglind Alda sem leikstjóri og leikkona bíða úrslita á Eddunni.
Mynd/ Ólafur Hannesson