Í hádeginu í dag verður í annað sinn haldið alheimsloftslagsverkfall, sem er fjórtánda loftslagsverkfallið í Reykjavík og fertugasta loftslagsverkfallið sem Greta Thunberg heldur. Síðast mættu á annað þúsund manns á Íslandi og Sigurður vonast til þess að gera enn betur í dag, því þó að skólakrakkar séu á leiðinni í sumarfrí fari loftslagsvandinn ekki í sumarfrí.

Kröfur verkfallsskipuleggjendanna eru að ríkið leggi meira fjármagn í aðgerðir gegn loftslagsbreytingum. „Vísindamenn hafa talað um að það þurfi að gera það strax, en á síðustu árum er losun eiturefna út í umhverfið samt að aukast. Ástandið er ekki enn farið að skána. Við köllum eftir því að það verði lýst yfir neyðarástandi, við þurfum að kljást við ástandið sem slíkt. Við erum alls ekki búin að leysa málið. Þess vegna munu loftslagsverkföllin halda áfram en í smærra sniði í sumar. Síðan tökum við aftur við af fullum krafti í haust, nema auðvitað að við sjáum einhverjar alvöru aðgerðir í loftslagsmálum og að það sé verið að reyna að leysa þetta.

Unga fólkið er duglegast að mæta á mótmælin

Fólki verður velkomið í sumar að koma á föstudögum í hádeginu á Austurvöll eða fyrir utan þinghúsið. Einhver úr skipulagshópnum verður alltaf á staðnum með skilti.“

Andrés Ingi Jónsson, þingmaður Vinstri grænna, gerði loftslagsvandann að ræðuefni sínu á þingi þann 30. apríl síðastliðinn. Þingmennirnir Logi Einarsson, Albertína Friðbjörg Elíasdóttir, Ágúst Ólafur Ágústsson, Guðjón S. Brjánsson, Guðmundur Andri Thorsson, Helga Vala Helgadóttir og Oddný G. Harðardóttir fluttu tillögu til þingsályktunar um að útbúa svokallaðan grænan samfélagssáttmála, sem eigi að stuðla að sjálfbærni landsins og umhverfisvænu hagkerfi, eins og kemur fram á vef Alþingis.

„Ég er ánægður að sjá að þingmenn séu allavega farnir að ræða eitthvað af tillögum okkar.“ Í kjölfar fundar með forsætisráðherra sem skipuleggjendur verkfallanna áttu, var ákveðið að þingmenn myndu mæta á fund unga fólksins sem tekur þátt í skólaverkföllunum. Það hefur hins vegar frestast eitthvað og Sigurður hefur áhyggjur af því að fundinum verði frestað fram yfir sumarfrí. „Maður reynir alltaf að vera bjartsýnn, en það er bara svo margt sem þarf að gera miklu betur en hefur verið gert. Það er staðan.“