Við fengum Lindu Benediktsdóttur uppskriftahöfund og fagurkera til að deila með okkur uppskrift að dásemdarkökum fyrir helgarkaffið. Linda Ben rekur uppskriftasíðuna lindaben.‌is, ásamt því að taka allar myndir fyrir síðuna. Einnig heldur hún úti Instagramsíðunni instagram.com/lindaben þar sem hún deilir bæði uppskriftunum sínum og gefur innsýn inn í heimilislíf sitt. Hún er í sambúð og á tvö börn og veit ekkert betra en að eiga ánægjulegar stundir með fjölskyldunni í eldhúsinu.

Nú ert þú að fara gefa út þína fyrstu uppskriftabók, segðu okkur aðeins frá tilurð hennar og hvar þú fékkst innblásturinn?

„Ég hef alltaf haft það á bak við eyrað að einn daginn muni ég gefa út bók og er því búin að hugsa lengi hvernig hún eigi að líta út, hvernig uppskriftir eiga að vera í henni og svo framvegis. Ég fæ mikið af mínum innblæstri frá fjölskyldu minni. Ég elska að endurgera og þróa gamlar uppskriftir og svo geri ég mikið af því að kasta hugmyndum á milli minna nánustu og þróa þannig uppskriftir. Uppskriftirnar í bókinni koma úr öllum áttum, mest er af nýjum uppskriftum, einhverjar eru gamlar sem ég er búin að þróa áfram og gera enn þá betri en sumar eru lesendum góðkunnar og að mínu mati ótrúlega gott að hafa útprentaðar í bók.“

Ertu til í að ljóstra upp nafninu á bókinni?

„Bókin fjallar um mína fyrstu ást – Kökur – og það er einmitt nafnið á bókinni, Kökur.“ Linda hefur haft ástríðu fyrir matargerð og bakstri í mörg ár eins og hún segir sjálf frá. „Ég hef mikla ástríðu fyrir því að skapa góðan mat og kökur, bæði hollt og óhollt þar sem ég tel að jafnvægi þar á milli sé hinn gullni meðalvegur, að minnsta kosti fyrir mig og mína fjölskyldu. Ég legg afskaplega mikið upp úr því að gera kökurnar og matinn fallegan enda borðum við flest öll fyrst með augunum, svo með munninum. Það er líka gaman að bera eitthvað fram á borðið sem maður getur verið stoltur af. Þar sem ég er tveggja barna móðir og yfirleitt nóg að gera á heimilinu, legg ég mikið upp úr einföldum og fljótlegum uppskriftum sem bragðast vel. Kökurnar sem ég geri eru skreyttar með einföldum hætti og ég reyni að hafa vel flest áreynslulaust. Fegurðin leynist nefnilega oftar en ekki í einfaldleikanum.“

Ertu til í að gefa okkur uppskrift að skotheldum kökum fyrir helgarkaffið?

„Ég ætla að gefa ykkur uppskrift að æðislegum stórum kanilsykursbollakökum sem eru í miklu uppáhaldi hjá okkur fjölskyldunni. Það skemmtilega við bollakökubakstur er að hann hentar vel í þessu ástandi sem við lifum við, þá á ég við að þegar allir hafa borðað nægju sína af bollakökum þá er einfalt og þægilegt að setja afganginn í frysti þar til síðar.“

Stórar kanilsykursbollakökur að hætti Lindu Ben.

Krönsí toppur

30 g smjör

30 g hveiti

25 g sykur

¼ tsk. kanill

Bollakökur

120 g smjör

150 g sykur

100 g púðursykur

2 egg

1 tsk. vanilludropar

350 g hveiti

3 tsk. lyftiduft

½ tsk. salt

200 ml AB-mjólk

Kanilsykur

2 msk. sykur

1 tsk. kanill

Glassúr

100 g flórsykur

1 msk. vatn

Byrjið á því að útbúa krönsí toppinn með því að bræða smjör og bæta út í það hveiti, sykri og kanil. Hræra saman og leyfa því að stirðna á meðan kökurnar eru útbúnar. Þeytið saman smjör, sykur og púðursykur þar til létt og ljóst, bætið þá út í eggjunum, eitt í einu og þeytið vel á milli. Blandið vanilludropunum saman við. Í aðra skál skal blanda saman hveiti, lyftidufti og salti, bætið því út í eggjablönduna ásamt súrmjólk og hrærið saman þar til samlagað.Takið stór pappírs-muffinsform og raðið í muffins-álbakka, fyllið hvert form upp 2/3. Hrærið saman sykur og kanil, setjið 1/2 tsk. af kanilsykri ofan í miðjuna á hverri köku. Myljið krönsí toppinn yfir bollakökurnar og bakið inn í miðjum ofni við 200°C í u.þ.b. 20 mínútur eða þar til þær eru bakaðar í gegn.

Blandið saman flórsykri og vatni í skál, (þið gætuð þurft að setja örlítið meira af vatni eða flórsykri til þess að fá áferðina þykkfljótandi), dreifið yfir kökurnar.

Njótið hvers munnbita í huggulegheitum.