Berglind er einstaklega lagin við að töfra yngri kynslóðina upp úr skónum, með sínum litríku og frumlegu nammikökum. Þessi er engin undantekning. „Hér er á ferðinni klassísk vanillukaka og ég notaði grunnuppskrift af vanilluköku frá Courtney sem er með Cake By Courtney og er ein mín uppáhalds. Síðan lék ég mér að lita deigið og dúllast aðeins í þessu til að úr yrði regnbogakaka í stíl við hlaupkarlana,“ segir Berglind og lætur hugmyndaflugið ráða för við skreytingarnar.

„Stelpurnar mínar elska Sour Patch Kids nammið og stukku hæð sína þegar það kom til Íslands eftir að hafa keypt það reglulega þegar við bjuggum í Bandaríkjunum. Þessa köku ættu allir að ráða við að gera og því get ég lofað að börn munu hoppa hæð sína þegar þau sjá hana.“

Það er líka í góðu lagi að baka sína eigin vanillubotna eftir smekk.

Berglind segir að kakan sé auðveld í vinnslu og veki alltaf lukku, enda nammið gott.

Sour Patch Kids regnbogakaka

Vanillubotnar

430 g hveiti

1 msk. lyftiduft

1 tsk. salt

280 g smjör við stofuhita

440 g sykur

7 eggjahvítur við stofuhita

1 msk. vanilludropar

300 ml „Buttermilk“ (kreistið 1 matskeið af sítrónusafa í nýmjólk)

150 g sýrður rjómi við stofuhita

Hitið ofninn í 170°C og takið til 5 x 15 cm kökuform. Klippið smjörpappír í botninn og úðið vel með matarolíuúða að innan.Blandið hveiti, lyftidufti og salti saman í skál, geymið. Þeytið saman smjör og sykur þar til það er létt og ljóst.Bætið þá eggjahvítunum saman við, í nokkrum hlutum og skafið niður á milli.Næst fara vanilludroparnir saman við og síðan hveitiblandan og „buttermilk“ til skiptis. Hrærið á lágum hraða og skafið síðan niður og blandið í nokkrar sekúndur aftur. Blandið að lokum sýrða rjómanum varlega saman við. Skiptið deiginu niður í 5 skálar og litið með gulu, appelsínugulu, rauðu, grænu og bláu. Setjið í formin og bakið í um 25-30 mínútur, eða þar til prjónn kemur hreinn út.Kælið áður en þið útbúið kremið og setjið kökuna saman.

Regnbogakaka er auðvitað í fallegum litum.

Krem og skreyting

300 g smjör við stofuhita

950 g flórsykur

220 ml rjómi

¼ tsk. salt

3 tsk. vanilludropar

6-7 pokar Sour Patch Kids hlaup. Marglitt kökuskraut

Þeytið smjörið þar til það er létt. Bætið þá flórsykri og rjóma saman við til skiptis, skafið niður á milli og þeytið vel. Setjið að lokum salt og vanilludropa saman við og þeytið aðeins til viðbótar.Setjið um 5 matskeiðar af kremi í senn í skál og litið í sama lit og botnarnir. Ég byrjaði á bláa botninum og setti bláa kremið ofan á, gott er að kremið sé um 1 cm að þykkt.Síðan má setja græna ofan á, gera grænt krem og þannig koll af kolli. Að lokum fer guli botninn ofan á og þá má lita alla restina af kreminu gult og grunnhjúpa kökuna með þunnu lagi af kremi. Eftir um 30 mínútur má síðan setja næsta lag af kremi á kökuna og gott að hafa það um ½-1 cm á þykkt. Sléttið hliðarnar og toppinn eftir fremsta megni og raðið síðan Sour Patch Kids hlaupi á hliðarnar eins og myndin sýnir. Alltaf tveir og tveir eins, hlið við hlið og vinnið þetta lóðrétt, alltaf ein lína alveg upp. Síðan rúlla litirnir alltaf niður þannig að „ombre“ mynstur komi á hlaupkarlana. Þegar búið er að þekja kökuna með Sour Patch Kids má setja restina af kreminu í sprautupoka með stórum stjörnustút (ég notaði 2 D frá Wilton). Sprautið 8 jafna toppa ofan á kökuna við kantana, stráið kökuskrauti ofan á þá og í miðjuna og setjið Sour Patch Kids hlaupkarla á milli toppanna. Einnig er hægt að raða hlaupkörlunum fyrst og sprauta síðan toppana og skreyta með kökuskrautinu.

Berglind Hreiðarsdóttir er einstaklega lagin þegar bakstur er annars vegar. FRÉTTABLAÐIÐ/ANTON