Við erum Dóra Dúna og Anna Maggý, við erum par og erum báðar ljósmyndarar. Dóra er á öðru ári í ljósmyndaskólanum og Anna Maggý er fyrrverandi nemandi í Ljósmyndaskólanum,“ segja þær Dóra og Anna. Þær segja sameiginlegan ljósmyndaáhugann gjarnan fyrirferðamikinn í sambandinu. „Við erum svo djúpt sokknar í heim ljósmyndunar að við þurfum frekar oft að ákveða í sameiningu að tala ekki um ljósmyndun í ákveðinn tíma. Okkur tekst það aldrei.“

Ljósmyndun ætti að vera metin til jafns við myndlist

„Okkur langaði að koma saman samtímaljósmyndurum og setja upp markað, þar sem við seljum listina okkar,“ segir Dóra. „Við munum ekki eftir því að ljósmyndarar hafi komið saman og sett upp markað til þess að selja list sína. Það eru svo oft myndlistarviðburðir og markaðir, en minna um ljósmyndaviðburði.“

Dóra Dúna og Anna Maggý telja þetta listform ekki njóta nægilegrar virðingar hér á landi og segja mikilvægt að gera ljósmyndun hærra undir höfði en hingað til hefur verið gert. „Ljósmyndun á að vera jafn mikils metin og myndlist. Listljósmyndun er myndlist. Enn í dag þarf að berjast fyrir því að ljósmyndun sé viðurkennd sem skapandi listform og erum við örlítið að taka slaginn!“

Þær segja þetta í þriðja skiptið sem markaðurinn er haldinn í Bíó Paradís en það er ekki nema ár síðan þær byrjuðu með þennan viðburð. „Við byrjuðum fyrir ári síðan með Ljósmyndamarkaðinn, í desember 2018.“

Hin fullkomna jólagjöf

Markmiðið hafi meðal annars verið að gera ljósmyndun sem listform aðgengilegri hérlendis auk þess að gera almenningi kleift að eiga möguleika á að fjárfesta í verkum eftir efnilega og reyndari ljósmyndara. „Hér á Íslandi erum við örlítið eftir á varðandi hvernig við sjáum ljósmyndun. Okkur fannst því vera gríðarleg þörf fyrir að sýna fólki ljósmyndun í listformi og bjóða fólki að kaupa verk á viðráðanlegu verði.“

Þær greina aukinn áhuga og ásókn með hverjum markaði og segja gjafir af þessu tagi tilvaldar í pakkann fyrir ástvini eða bara fyrir sjálfa/n sig. „Í hvert skipti sem við höldum markaðinn er meiri aðsókn og fólk virðist sífellt vera að átta sig betur á að það er engin gjöf betri en fallegt verk eða ljósmynd. Hvort sem það er fyrir mann sjálfan eða þá sem manni þykir vænt um.“

Ljóst er að það verður mikið úrval ólíkra ljósmynda á markaðinum en það er töluverður fjöldi ljósmyndara sem tekur þátt þetta árið. „Þetta eru 23 ljósmyndarar úr öllum áttum. Okkur finnst skipta máli að sýna fjölbreytileika og höfum við boðið þeim ljósmyndurum að taka þátt sem okkur finnst vera klárir. Margir af þeim eru nemendur í ljósmyndaskólanum eða fyrrverandi nemendur.“

Þær hvetja fólk til að mæta og auðga andann. „Þetta verður mikið glens og gaman. Endilega komið og virðið fyrir ykkur fjársjóði. List kætir og gleður, auk þess sem hún er upplögð í jólapakka!“

Ljósmyndamarkaðurinn er sem fyrr segir í Bíó Paradís í dag, á milli klukkan 16 og 20.

Ljósmyndamarkaðurinn verður í Bíó Paradís í dag á milli 16 og 20.