Vinnustofa Kötlu er hjá SIGN sem er í Hafnarfirði, við Fornabúðir, á heillandi stað við höfnina. SIGN er bæði skartgripaverslun og vinnustofa, þar sem töfrarnir gerast í hönnun skartgripa. Katla gekk til liðs við SIGN fyrir liðlega ellefu árum og byrjaði þá að hanna skartgripi samhliða því að selja skart. Í dag eru Katla og Sigurður Ingi Bjarnason gullsmiður saman með vinnustofuna og blómstra saman í verkum sínum.

Mikil sveitastelpa

Katla er fædd og uppalin á Sauðárkróki hjá foreldrum sínum og bróður. „Ég var mikið í sveit sem barn og unglingur hjá afabróður mínum og fjölskyldu hans á Melstað í Óslandshlíð. Þannig að ég er mikil sveitastelpa í mér og elska sveitina. Þaðan kemur eitt af mínum uppáhaldsáhugamálum, sem er hestamennska. Ég nýt þess að fara í útreiðartúra úti í náttúrunni og þar fæ ég líka innblástur í hönnun mína,“ segir Katla, sem veit fátt skemmtilegra en að vera í kringum hesta. Katla var bæði í grunnskóla og framhaldsskóla á Sauðárkróki.

„Ég bjó í Svíþjóð um tíma og hef ávallt haft mikinn áhuga á allri hönnun og list. Ég stefndi alltaf á leirlist eða fatahönnun á mínum yngri árum en er menntuð snyrtifræðingur, ótrúlegt en satt,“ segir Katla og segir að örlögin hafi síðan leitt hana í skartgripahönnunina.

Móðir náttúra nefnist þetta hálsmen.

Katla er móðir og nýtur sín í því hlutverki líka. „Í dag á ég þrjú yndisleg börn, þau Árna Tuma 17 ára og tvíburana Árveigu Ólöfu og Bjarna Kristin sem eru 14 ára,“ segir hún og bætir því við að þau veiti henni innblástur í listina.

Fallegt ferli

„Ég hef ávallt haft áhuga á skartgripahönnun og þá sér í lagi hvernig skartgripurinn er búinn til og hvernig efnin verða að því sem skapað er. Hvernig sköpun hönnuðarins er yfirfærð í tilbúinn hlut, allt frá hugmynd, markaðssetningu og til þess sem síðan ber skartið, finnst mér fallegt ferli.“

Er einhver saga bak við hönnun þína og ástríðuna í því sem þú ert að gera?

„Kannski bara sagan mín, lítil stelpa sem var skítug upp fyrir haus úti að leika sér og skapa ævintýraheima. Þessi stelpa fylgir mér svolítið í öllu sem ég geri. Stundum er hönnunarferlið eins og ævintýri, innblástur getur verið ævintýralegur.“

Tileinkuð mömmu sem greindist með krabbamein fyrr á árinu

Katla hannaði nýverið nýja skartgripalínu sem nú hefur litið dagsins ljós.

„Nýjasta línan er ólík hinum. Hluti af henni er grófur en fínlegur á sama tíma, keðjur sem mynda einingu og heitir Samspil. Annar hluti, sem heitir Lóa, er pen með mikið af steinum sem líkjast tári en tár myndast vegna tilfinninga hvort sem er vegna gleði eða sorgar. Þennan hluta línunnar tileinkaði ég mömmu minni, sem greindist með brjóstakrabbamein fyrr á árinu og er að takast á við það verkefni. Mamma mín heitir Ólöf og er kölluð Lóa.“

Katla segist aðallega fá innblásturinn í hönnun sína frá fólkinu sem stendur henni næst. „Ég leitast mikið eftir því að hafa gaman í kringum mig og hlæja sem mest, það veitir mér líka mikinn innblástur.“

Skartgripalína frá Kötlu sem nefnist Lóa og er ákfalega falleg.

Andstæður heilla mig mikið

Hvernig myndir þú lýsa hönnunarstílnum þínum?

„Ég leitast eftir að láta andstæður mætast og finna jafnvægi þar á milli.“

Þegar kemur að vali að formum og táknum, er eitthvað sem heillar þig frekar en annað?

„Andstæður heilla mig mikið, svart og hvítt, mjúkt og hart, slétt og hrjúft og svo framvegis.“

Þegar Katla er spurð hvort hún eigi sér uppáhaldsskart sem hún hefur hannað er hún með það á hreinu. „Móðir náttúra-línan sem ég hannaði árið 2018, annars er auðvelt að halda upp á nýjustu línuna sem er í gangi hverju sinni,“ segir Katla dreymin á svip.

Áttu þinn uppáhaldshönnuð þegar kemur að hönnun á skarti og fylgihlutum?

„Sigurður Ingi Bjarnason er alltaf í mestu uppáhaldi hjá mér. Hann veitir mér mikinn innblástur og hvatningu, sem er innblásin krafti í mína hönnun.

Langar að flytja upp í sveit

Þegar Katla horfir til framtíðar segist hún enn eiga fullt af draumum sem hana langar að fylgja eftir.

„Ég á mér marga drauma, eiginlega of marga, mig langar að flytja upp í sveit og vinna við sköpunina okkar og vera meira í hestamennsku.

Svo ætla ég einhvern tímann að læra að mála myndir,“ segir hún að lokum og hlakkar til að halda áfram að láta drauma sína rætast, innblásin af sköpunarkrafti og sköpun sinni.