Það er samt engin þörf á að stökkva beint í íslensku kjötsúpuna og láta þar við sitja. Það er vel hægt að halda í litadýrð sumarsins og stíga á sama tíma fáein skref inn í litríkt haustið. Borscht er afar vinsæl og gómsæt, sæt og súr súpa sem kemur upprunalega frá Austur-Evrópu og Norður-Asíu. Í daglegu tali er þó oftast átt við úkraínsku útgáfuna sem gerð er úr rauðrófum er gefa súpunni sinn einkennandi og sterka rauða, næstum dökkbleika lit. Í Póllandi má einnig finna hefðbundna rauðrófusúpu sem kölluð er á frummálinu barszcz czysty czerwony. Súpan er oftast úr fiskisoðsgrunni og er borðuð á Wigila eða á aðfangadagskvöld þann 24. desember. Þá eru borin fram með súpunni svokölluð uszka sem merkir eyru, en um er að ræða deigþynnur með sveppafyllingu sem minna á tortellini-pasta.

Rauðrófa eða rauðbeða (lat. beta vulgaris) er afar næringarrík og gómsæt rót sem er náskyld sykurrófu og beðju. Neysla á rauðrófum er frábær leið til þess að auka trefjar í mataræðinu en um 2 dl innihalda um 3 gr af trefjum. Þeirra má neyta ýmist ofnbakaðra, soðinna, niðursoðinna, hrárra eða í safaformi.

Rauðrófur innihalda litarefnið betanin en rautt litarefni E-162 er unnið úr þeim. Þessi litsterka rót á það til að lita allt í skvettufæri við skurðborðið og því nota margir einnota hanska þegar þeir meðhöndla þetta litfagra grænmeti. Einnig er æskilegt að skera/rífa niður rauðrófur á bretti sem er í lagi að komi smá litur í. Fallega gegnheila hnotuskurðarbrettið er því líklega ekki besti kosturinn þegar kemur að meðhöndlun rauðrófa.

Rauðrófusafi er stútfullur af vítamínum og frábær uppspretta af járni og C-vítamíni.

Rauðrófusúpa á methraða

Meðaleldunartími hefðbundinnar ungverskrar borscht rauðrófusúpu er um 3-6 klst. En það má þó stytta sér leið að gómsætri rauðrófusúpu með því að nota tilbúið kjöt- eða grænmetissoð eða soðteninga, forsoðnar rauðrófur og sleppa kjötinu.

1 pakki rauðrófur forsoðnar/ 3-4 ferskar rauðrófur skrældar: Rífa niður með rifjárni

1 stór hvítur laukur saxaður

3 meðalstórar gulrætur rifnar með rifjárni

3-4 hvítlauksrif

1 dós tómatar saxaðir

1 líter nautasoð/grænmetissoð/sveppasoð/misosoð

Heitt vatn (allt að ½ lítra)

Salt og pipar

Sítrónusafi

Worcestershire- eða soyasósa (val)

Ofan á:

Saxað dill eða steinselja

Sýrður rjómi

Með kjöti

Hægt er að gera súpuna matarmeiri með því að setja svínakjöt út í hana. Þá má byrja á því að steikja svínahakk í súpupottinum með salti, pipar og þurrkuðum kryddjurtum að eigin vali og setja í skál til hliðar. Einnig má steikja á sama hátt hrátt pylsukjöt (flettið kjötinu úr pylsuhúðinni og brjótið niður) sem fæst til dæmis hjá Pylsumeistaranum á Hrísateig. Kjötið fer aftur út í súpuna og hitað í gegn þegar hún er fullsoðin.

Rífðu niður gulrætur og rauðrófur. Ef þú ert að nota ferskar rauðrófur er hægt að geyma gulrætur og rófur saman í skál.

Næst skaltu steikja laukinn í súpupotti á miðlungs/háum hita með olíu að eigin vali uns hann verður glær. Kremdu hvítlaukinn eða fínsaxaðu ofan í pottinn með lauknum og steiktu smá. Settu rifnu gulræturnar út í (og rauðrófurnar ef ferskar) og steiktu uns þær eru byrjaðar að mýkjast. (Ef þú ert að nota soðnar rauðrófur má setja þær út í pottinn núna.) Næst hellirðu tómötunum úr dósinn út í pottinn ásamt soðinu. Þá er súpan látin sjóða uns allt grænmeti er soðið í gegn. Hér má ákveða hvort það eigi að bera súpuna fram með heilum bitum eða að blanda hana með töfrasprota eða í matvinnsluvél. Loks er súpan smökkuð til með salti, pipar, sítrónukreistu og heitu vatni. Hér mábæta við um teskeið af Worcestershire- og/eða sojasósu út í til að bragðbæta.

Súpan er vanalega borin fram með smá slettu af sýrðum rjóma og söxuðu dilli eða steinselju.