Sigríður Elfa hefur alltaf haft mikla þörf fyrir að skapa en hafði þó óbeit á almennri handavinnu í skólanum. „Um leið og ég mátti búa til eitthvað sjálf gat ég fullkomlega gleymt mér. Ég stofnaði svo fyrirtækið SElfa ehf. árið 2006 og síðan þá hef ég hannað og framleitt undir nafninu SES design,“ segir hún.

„Ég er nú orðin rúmlega sextug og hef unnið hin ýmsu störf meðfram sköpuninni til að eiga fyrir reikningum. Ég fór í myndlistarskóla eftir stúdentspróf, lærði í tvö ár í Barcelona og tvö í Cartagena de Indias í Kólumbíu og kláraði 1989.“

Sigríður segir að dvöl sín í Mexíkó hafi haft mikil áhrif á hönnun sína.
Gunnlöð Jóna

Ég held að ekkert land í heiminum sé jafnríkt af alþýðulist eða jafnlitaglatt og Mexíkó. Fridu Kahlo hef ég dýrkað og dáð síðan þá.

Litir, gleði og Frida Kahlo

Hönnun Sigríðar er einstaklega litrík og gjarnan bregður listakonunni Fridu Kahlo fyrir. „Stundum segi ég að stíllinn minn sé barnalegur. Ég er mjög litaglöð og þarf að hafa leik og gleði í hönnuninni, ævintýri og húmor. Oft bý ég til sögur um það sem ég er að gera. Líklega er það þess vegna sem ég elskaði að hanna á börn, því þá getur maður leyft sér meira. En núna leyfi ég mér það bara líka fyrir fullorðna.“

Sem unglingur bjó Sigríður ásamt fjölskyldu sinni í tvö ár í Mexíkó. „Það hafði mikil áhrif á hönnun mína. Ekki bara að kynnast Fridu Kahlo og hennar list heldur líka öllu því ríkidæmi í menningu og list sem Mexíkó býður upp á. Ég held að ekkert land í heiminum sé jafnríkt af alþýðulist eða jafnlitaglatt og Mexíkó. Fridu Kahlo hef ég dýrkað og dáð síðan þá.“

Sigríður saumar púðaver og blandar þar saman ýmsum efnum, áferðum og litum og oft bregður Fridu fyrir. „Ég elska falleg efni og hef sankað þeim að mér í tugi ára. Fallegar gamlar gardínur, dúkar og efnisafgangar sem ég kaupi í second hand-búðum eða fæ gefins. Svo kaupi ég efni á netinu, sérstaklega prentuð efni með Fridu Kahlo. Ég er alveg laus við efnissnobb og blanda öllu saman í púðunum. Silki, pólýester, flauel og bómull geta verið í sama púðanum. Helst vil ég náttúruleg efni en fegurðin ræður samt alltaf för,“ segir Sigríður.

Sigríður hefur unun af því að nota efni með sögu í púðahönnun sína og Frida Kahlo kemur gjarnan við sögu.
Gunnlöð Jóna
Gunnlöð Jóna

Eyrnalokkar með stæl og sögu

Sigríður hannar dýrindis eyrnalokka úr óhefðbundnum efnivið eins og leikfangadýrum, dúskum og fleiru. „Fyrir rúmum 30 árum gerðum við þáverandi maðurinn minn eyrnalokka úr alls kyns hráefni, meðal annars úr plastdýrum, og seldum í Austurstræti. Hann hringdi í mig um daginn og sagði að nú væri ég komin aftur á byrjunarreit,“ segir Sigríður og hlær. „Stóri munurinn nú er aðgengi að alls kyns skrauti og perlum alls staðar að úr heiminum sem blanda má við plastdýrin. Sömuleiðis er aðgengið að gömlum perlufestum og öðru skrauti í nytjamörkuðunum mun meira og gefur svo mikla möguleika. Einnig er dásamlegt að fylgjast með hvað aðrir eru að gera úti um allan heim og fá innblástur og viðbrögð við því sem ég er að gera.

Gunnlöð Jóna, dóttir Sigríðar, tekur allar ljósmyndirnar fyrir Sigríði. Sigrún Eyfjörð sér um förðun.
Gunnlöð Jóna

Mér finnst vont að henda því sem hægt er að nýta og þykir hræðilegt hvernig við á Vesturlöndunum losum okkur við rusl til þriðja heimsins þar sem það hrannast upp í fjöllum. Mér finnst dásamlegt að nýta efnivið með sögu, þó svo hún hafi bara merkingu fyrir mig. Púði með bút úr stofugardínum tengdamömmu heitinnar eða dúkur heklaður af ömmu hlýjar mér um hjartað.

Ég er líka heppin að eiga Gunnlöðu Jónu að dóttur sem er bæði frábær ljósmyndari og óspör á tímann sinn. Hún myndar allt fyrir mig og sér líka um Instagrammið mitt. Þegar hún og Sigrún Eyfjörð förðunarfræðingur taka sig saman, ásamt flottum módelum, þá ná eyrnalokkarnir mínir nýjum hæðum.“

Litanotkun Sigríðar er skemmtileg og heillandi og útkoman er einstök.
Gunnlöð Jóna

Handverksgangur Siggu

Ullarvörur Sigríðar má nálgast í Epal á Laugavegi, Handprjónasambandinu og Rammagerðinni á Skólavörðustíg, Gullfosskaffi við Gullfoss og í Rammagerðinni í flugstöðinni. „Eftir að ég þurfti að flytja allt úr vinnustofunni heim til mín vegna Covid er hér allt undirlagt af vinnudóti. En fólki er velkomið að koma og skoða. Ég kalla ganginn minn Handverksgang Siggu. Þar er ég alltaf með eitthvað til sýnis ásamt eðal ólífuolíu sem ég flyt inn frá Spáni. Stundum auglýsi ég opið hús en svo má líka senda mér skilaboð og fá að koma. Einnig má skoða Instagram-síðuna mína @sesdesign_handcraft og Facebook: SES design-Ísland og panta þar.“

Sigríður notar gjarnan leikfangadýr í eyrnalokkana sem virkar einhvern veginn bæði sjúklega töff og barnslegt á sama tíma.
Gunnlöð Jóna

Sigríður stefnir á opið hús í desember, líklega helgina 17.–18. desember, en að sögn þarf hún að fylla á eyrnalokkalagerinn sem hálfkláraðist á handverkssýningu í ráðhúsinu fyrir stuttu. Áhugasömum er bent á að fylgjast með á Instagram og Facebook. „Öll eru hjartanlega velkomin í kaffi, ólífuolíusmakk og að skoða handverkið mitt og vonandi finna einstakar jólagjafir,“ segir Sigríður.

Þessir myndu sko algerlega stela senunni á áramótunum.
Gunnlöð Jóna
Gunnlöð Jóna