Maríanna segist hafa verið ung þegar hún fékk áhuga á öllu því sem er skapandi og listrænt. „Það kom snemma í ljós hvert hugur minn stefndi. Í mér var alltaf einhver listrænn kraftur,“ segir hún. „Ég var kannski ekki mikill stærðfræðingur,“ segir hún og brosir. Maríanna hóf nám í Förðunarskóla No Name, þar sem Birta Björnsdóttir kenndi henni, og kláraði það með miklum glæsibrag. „Það kom fljótt í ljós að þetta starf ætti vel við mig. Ég fann að styrkur minn lá í því að draga allt það fallega fram í fólki. Ég hef næmt og gott auga fyrir því hvað hentar hverjum og einum. Ég hef alltaf verið mikill fagurkeri, elska fallega hluti og glæsilega búin heimili. List gleður augað og heillar mig sömuleiðis.“

Húðin er mikilvægt líffæri

Eftir útskrift úr förðunarskólanum byrjaði Maríanna strax að vinna við alls kyns förðunarstörf fyrir fegurðarsamkeppni, tískusýningar, tímarit og árshátíðir auk þess að vera sjálfstætt starfandi förðunarfræðingur. Síðan lá leiðin í Snyrtiskólann í Kópavogi og lauk hún námi þaðan sem snyrtifræðingur.

„Þetta eru að vissu leyti ólík störf. Snyrtifræðin byggir meira á því að láta fólki líða vel í stólnum og kenna því að hugsa vel um húðina, sem er eitt okkar mikilvægasta líffæri. Húðin getur verið misjöfn, þurr, feit, viðkvæm eða blönduð. Um leið og fólk fer að nota réttu snyrtivörurnar sem henta húðinni sést fljótt munur. Góð krem eru nauðsynleg fyrir húðina, sérstaklega þar sem við búum í landi þar sem veðrið er svo mismunandi, loftið getur verið frostkalt, heitt, rakt og í raun allur skalinn,“ útskýrir Maríanna og bendir á mikilvægi þess að nota sólarvörn yfir sumartímann. „Allir ættu að nota sólarvörn því hún ver húðina fyrir útfjólubláum geislum sólarinnar.“

Íslendingar þurfa að huga sérstaklega vel að húðinni þar sem veðrabrigðin eru svo mikil, segir Maríanna.

Hreinsun húðarinnar mikilvæg

Í starfi sínu á Hringbraut tekur Maríanna á móti miklum fjölda gesta sem þarf að farða fyrir útsendingu. „Þegar ég ræði við fólk af báðum kynjum kemur í ljós að það vita ekki allir hversu mikilvæg húðumhirða er og nauðsynleg til að viðhalda heilbrigði hennar. Hreinsun húðarinnar er jafn mikilvæg og að bursta tennurnar. Það er mikil mengun í umhverfinu sem sest í húðina og þess vegna er ekki nægilegt að nota eingöngu vatn. Það þarf að nota vandaðar hreinsivörur á andlitið og góð krem.

Þetta á jafnt við um karla og konur. Ég hef fundið að andlitskrem eru ekki lengur tabú hjá mörgum karlmönnum eins og áður. Ég farða mikinn fjölda karlmanna sem eru gestir á Hringbraut og undantekningarlaust er ég með gott krem til að setja undir farðann. Sumir hafa á orði hvað það sé notalegt og geri húðinni gott. Ég reyni að ráðleggja þeim sem eru til dæmis með mjög þurra húð hvað sé best að gera,“ segir Maríanna og bendir á að það sé ekki sama hvaða krem fólk noti ef það er til dæmis með háræðaslit í andliti eða rósroða sem er algengt vandamál. „Ég sé strax ef fólk er með rósroða og bendi þá á húðlækna. Stundum getur verið nóg að fara til snyrtifræðings ef alvarleikinn er ekki orðinn mikill.“

Líf og fjör á fjölmiðli

Maríanna segir að það eigi mjög vel við sig að vinna á fjölmiðli þar sem er líf og fjör alla daga. „Mér finnst þetta ótrúlega skemmtilegt starf. Orka mín fær að skína á Hringbraut. Ég er alltaf að fá nýtt fólk í stólinn og mér finnst ég þekkja marga því ég hef svo oft séð þau í fréttum. Aðrir eru að koma í sitt fyrsta sjónvarpsviðtal og eru eðlilega svolítið taugatrekktir. Þá reyni ég að fá fólkið til að slaka vel á og veiti smá hugarró á meðan ég farða. Ef fólk er ánægt með förðunina þá líður því betur á skjánum,“ segir Maríanna.

„Ég reyni alltaf að draga það fallegasta fram í fólki, það er mitt starf. Ég vil að gestum Hringbrautar líði vel þegar þeir fara í útsendinguna. Andrúmsloftið og stemningin á vinnustaðnum og allt þetta fólk sem kemur til mín í stólinn, bæði karlar og konur, gerir dagana ótrúlega skemmtilega. Þetta er mjög ólíkt því að starfa á snyrtistofu þar sem maður er fyrst og fremst að dekra við viðskiptavininn í hugljúfu og róandi umhverfi. Mér finnst mjög gaman að skipta starfi mínu á milli hasarsins og síðan slökunarinnar á snyrtistofunni,“ segir Maríanna.

„Stundum líður mér eins og ég sé sjálf orðin partur af einhverjum raunveruleikaþætti. Allt gerðist hratt þegar ég byrjaði í þessu starfi. Mér fannst stórmerkileg upplifun að hafa allt í einu forseta Íslands, Guðna Th. Jóhannesson, í stólnum hjá mér, sömuleiðis Ólaf Ragnar Grímsson, Katrínu Jakobsdóttur, Bjarna Benediktsson og marga fleiri leiðtoga. Það er svo dásamlegt að sjá hvað allir eru mannlegir og vingjarnlegir. Þegar Helga Vala Helgadóttir settist í stólinn fannst mér hún næstum vera systir mín þótt ég hefði aldrei hitt hana áður. Þannig gæti ég haldið áfram endalaust. Starfið hefur svo sannarlega komið mér skemmtilega á óvart.“

Þannig verða vinsælustu förðunarlitirnir í sumar. MYND/AÐSEND

Helgaði sig börnunum

Maríanna hefur verið einhleyp í fimm ár og lagt allt í sölurnar til að koma fjórum börnum sínum á legg. Þau eru nú að vaxa úr grasi og það yngsta orðið 13 ára. Hún segist vera ánægð með hvernig hefur ræst úr hópnum, elsta dóttirin er að útskrifast úr menntaskóla. „Ég finn að minn tími er kominn til að gera eitthvað nýtt og spennandi.

Ég varð móðir 19 ára og hef lagt allt í sölurnar fyrir börnin mín. Núna hef ég meira frjálsræði til að skapa og gera það sem mig langar til. Meðal þess er að setja upp eigin snyrtistofu, MPStudio, förðunarstúdíó, verslun og snyrtistofu, sem ég stefni á að opna í júní. Ef maður er sáttur við líf sitt, hugar að heilbrigðu lífi, hugleiðir og stundar einhvers konar líkamsrækt eru allir vegir færir. Ég hef mikið stundað jóga, drekk mikið vatn og borða hollt og gott fæði.

Karlar velkomnir

Stundum geri ég óraunhæfar kröfur á sjálfa mig en það er í raun samfélagslegt mein. Ég elti þó ekki tískustrauma heldur fer eigin leiðir. Engu að síður hef ég gaman af því að skoða tísku en kaupi ekki dýran fatnað. Ég er hrifin af fötunum í Zöru, það er ákveðinn glæsileiki yfir þeim og verðlagið er hagstætt. Ég kaupi líka notað á netinu ef það hentar mér. Í snyrtivörum vel ég Comfort Zone en ég er mjög ánægð með þær vörur. Comfort Zone er með afbragðs krem sem henta hverri húðtegund fyrir sig.

Ef fólk er í vafa um sína húðtegund ætti það hiklaust að leita til snyrtifræðinga og fá leiðbeiningar. Það er okkar starf að gefa ráðleggingar. Konur eru í meirihluta þeirra sem koma á snyrtistofu en ég hvet karla til að læra umhirðu húðarinnar,“ segir Maríanna. „Það eru til sérstakar hreinsivörur sem eru hannaðar fyrir karlmenn og ég mæli líka með að þeir noti sólarvörn, til dæmis á golfvellinum.“

Uppáhaldslitur Maríönnu sem verður einmitt mjög vinsæll í sumar.

Bjartsýni og draumar rætast

Maríanna hefur mikinn áhuga á alls kyns litasamsetningum. Litir skipta hana miklu máli. Hennar uppáhaldslitir í sumar eru dimmkoparrauðir og mildir jarðlitir. Hún hefur dálæti á hvers kyns blómum og hefur skreytt heimili sitt með þeim. „Ég tala við þau,“ segir hún. „Veit ekki hvort það hefur þýðingu en þau virðast hafa það gott og dafna vel,“ segir Maríanna og segist finna vel fyrir því hversu lífið getur verið skemmtilegt og hvetur alla til að láta drauma sína rætast.