Dansinn er lengi búinn að vera í fyrsta sæti í lífi Maríu Kristínar Jóhannsdóttur, sem hefur nám í samtímadansi við Listaháskóla Íslands (LHÍ) næsta haust.

„Þegar ég dansa líður mér eins og ég sé á réttum stað. Mér líður hvergi meira eins og ég sjálf en þegar ég er á dansæfingu eða að skapa eitthvað geggjað, eða eitthvað glatað. Þegar ég er ómöguleg í skapinu, lítil í mér og vonlaus þá er ég yfirleitt annaðhvort svöng eða það er of langt síðan ég fór á æfingu.“

Covid kveikti ástríðuna aftur

María byrjaði mjög ung í ballett og hefur stundað dansnám með hléum allt sitt líf.

„Ég hætti alveg að dansa þegar ég fór í menntaskóla, það hentaði illa með náminu og ég hugsaði að þá væri rétti tíminn til að fara að einbeita sér að öðru.“

Þegar henni byrjaði að leiðast meðan heimsfaraldurinn stóð yfir, ákvað hún að mæta á dansæfingar í Klassíska listdansskólanum.

„Þar kynntist ég frábærum kennara sem heitir Camilo. Það var svo gaman í tímum hjá honum að það var ekki séns að hætta að mæta og þarna var ekki aftur snúið. Þar mætti ég á hverjum degi í nútímadanstíma og balletttíma með Yann­ier Oviedo sem er einnig frábær kennari.“

Í framhaldinu gekk hún í dansflokkinn Forward Youth Company þar sem hún hefur dansað í ýmsum verkum ásamt því að sækja ýmis „work shop“ með innlendum og erlendum danshöfundum á borð við Margréti Bjarnadóttur, Höllu Ólafsdóttur, Jarrko Mand­elin, Cameron Corbett og fleiri.

„Við frumsýndum nýtt verk eftir Siggu Soffíu í Tjarnarbíói í apríl sem heitir Avatar en það verður sýnt aftur á Reykjavík Fringe Festival í lok júní. Nú vinnum við að verki með frönskum danshöfundi, Sylvain Huc, sem sýnt verður í Iðnó á Listahátíð Reykjavíkur þann 5. júní kl. 15 og 20.“

Buxurnar eru úr Hringekjunni og vestið er úr Cos. Grifflurnar eru gerðar af Dísu Jakobsdóttur og skartið er frá Maria Black. Skórnir eru úr &otherstories.

Rými til tilrauna og mistaka

Námið við LHÍ leggst mjög vel í hana og segist hún hlakka mikið til.

„Í skóla fær maður rými til að þróa sig og sínar hugmyndir, að gera tilraunir og að gera mistök. Ég hlakka til að vinna með og læra af mismunandi danskennurum og höfundum en einnig af bekkjarfélögum mínum. Ég veit ekki enn hvert ég stefni, ég tek einn dag í einu og sé hvert það leiðir mig. Hingað til hefur það leitt mig á ýmsa skemmtilega staði. Eina sem ég veit er að mig langar að halda áfram að dansa, skapa og kynnast nýjum hliðum á sjálfri mér.“

Umhverfið notað sem hljóðfæri

Í sumar mun María vinna að dansverki í skapandi sumarstörfum í Kópavogi ásamt Ingu Maríu Olsen.

„Í fyrrasumar unnum við saman í Listhópum Hins hússins með verkefnið okkar DANSANDI. Markmið okkar var að færa gleðina sem fylgir dansi nær fólki. Við héldum pop-up danspartí víðs vegar um miðbæ Reykjavíkur ásamt því að mæta á vinnustaði og í staffa-partí til að rífa upp stemninguna sem gekk vonum framar.“

Verkefni þeirra kallast Rýmisgreind og verður til í sumar.

„Við munum sækja innblástur frá umhverfinu okkar og búa til hljóðmynd úr hljóðunum í umhverfinu. Þannig verður umhverfi okkar notað sem hljóðfæri en verkið verður sýnt í lok júlí.“

Hægt er að fylgjast með verkinu fæðast á Instagram undir @rymisgreind.

Hér sýnir María lesendum inn í fataskápinn sinn.

María Kristín Jóhannsdóttir klæðist hér fallegum bláum kjól frá Geysi og Levi´s gallabuxum sem hún keypti í Spúútnik. Eyrnalokkana gerði Dísa Jakobsdóttir og skórnir eru frá Dr. Martens.

Hvernig fylgist þú helst með tískunni?

Ég geri það sjaldan af ásettu ráði heldur sæki frekar innblástur frá fólkinu í kringum mig og fólki sem verður á vegi mínum.

Hvar kaupir þú helst fötin þín?

Í Hringekjunni, Verzlanahöllinni, ABC í Kópavogi og Rauða krossinum.

Hvaða litir eru í uppáhaldi?

Það eru engir uppáhaldslitir þegar kemur að klæðnaði. En þessa dagana fíla ég að vera í dökkum fötum með litríkan augnskugga og litríka eyrnalokka í stíl, til dæmis skærappelsínugulan eða skærgrænan.

Áttu minningar um gömul tískuslys?

Það hafa ekki orðið mörg tískuslys, frekar var ég að elta tískustrauma í blindni í fortíðinni, án þess að pæla í því hvað mér finnst raunverulega vera flott. Ég er blessunarlega hætt að nenna því. Eitt sem kemur reyndar upp í hugann er þegar ég grátbað mömmu mína um leggings sem litu út eins og gallabuxur, þar varð stórslys.

Hvaða þekkti einstaklingur er svalur þegar kemur að tísku?

Rihanna er og verður alltaf svalasta manneskja í heimi.

Áttu eina uppáhaldsflík?

Uppáhaldsflíkin mín er svartur síðkjóll sem mamma á og sem við létum sníða á mig. Ég mun nota hann alla ævi.

Bestu og verstu fatakaupin?

Bestu fatakaupin eru svartar Samsoe Samsoe buxur, þær eru flottar og þægilegustu buxur sem ég á en það er fátt verra en óþægilegar buxur. Verstu fatakaupin eru kjólarnir sem ég keypti og notaði einu sinni fyrir Verzló-böll, fáránleg pæling.

Notar þú fylgihluti?

Ég er alltaf með eyrnalokka. Ef ég er ekki með þá líður mér eins og að ég sé nakin. Ég nota líka hringi og hálsmen og hef verið að vinna með gull frekar en silfur.

Eyðir þú miklum peningum í föt miðað við jafnaldra þína?

Ég mundi ekki segja það, enda kaupi ég mest allt notað og ég er almennt mjög sparsöm manneskja, stundum aðeins of sparsöm.