Nú á dögunum kom úr fyrsta plata ísfirsku söngkonunnar Salóme Katrínar Magnúsdóttur, Water.

„Þetta er sem sagt EP-plata. Það þýðir að hún er lengri en smáskífa, styttri en breiðskífa. Hún samanstendur af fimm lögum sem ég samdi, reyndar eru þetta fyrstu lögin sem ég hef samið,“ segir Salóme.

Upptökur hófust sumarið 2019 og þeim lauk í vor. Það kemur fjölmargt fólk að gerð plötunnar og segist Salóme vera því óendanlega þakklát fyrir það allt.

„Ég hafði lokið flestum upptökum áður en COVID skarst í leikinn og því hafði veiran fræga aðeins áhrif á útgáfuna sjálfa, frekar en innihaldið. Upprunalega hafði ég ráðgert að platan kæmi út vorið 2020, með tilheyrandi útgáfutónleikum og fjöri til þess að fagna henni. Þess í stað kom hún hljóðlega á netið síðasta föstudag, 20. nóvember. Eftir á að hyggja held ég að í raun hafi það verið fullkominn tími. Ég vil nefnilega trúa því að allt sem gerist, eigi að gerast,“ segir hún.

Umkringd hæfileikafólki

Salóme segist fyrst og fremst fá innblástur frá eigin tilfinningum, fólkinu í kringum um sig og umhverfi sínu.

„Svo hlusta ég líka á ótrúlega mikið af tónlist og dreg mikinn kjark og innblástur þaðan. Til að nefna plötur sem hafa haft hvað mest áhrif á mig og mína sköpun eru til að mynda plöturnar Party og Designer eftir Aldous Harding, Milk Eyed Mender eftir Joanna Newsom, allt safnið hennar Kate Bush sem og allt safn kanadísku tónlistarkonunnar Feist, Soviet Kitsch og Begin to Hope eftir Reginu Spektor. Svo dái ég líka fullt af fólki sem er að gera tónlist í kringum mig um þessar mundir. Það er magnað að vera umkringd mörgu hæfileikafólki og það veitir mér kannski mestan innblástur af öllu þegar ég virkilega hugsa mig um,“ segir Salóme.

Hún segir drauminn um að semja og gefa út eigin tónlist lengi hafa blundað í sér.

„Ég vissi alltaf að einhverju marki að það væri þangað sem leið mín lægi. Ég er bara á svolítið hægu tempói og hef alltaf verið. Fyrsta lagið sem ég samdi heitir Elsewhere. Það læddist út úr kollinum á mér einn haustdag árið 2017. Þá var eins og stífla brysti og Water er afraksturinn.“

Tilfinningar og vatnið

Salóme viðurkennir að það hafi vissulega verið örlítið stressandi að gefa loksins út sín eigin verk.

„En ég hafði fengið langan tíma til þess að venjast tilhugsuninni. Ég var og er svo ótrúlega viss um að þetta sé nákvæmlega það sem ég á að gera í lífinu akkúrat þessa stundina, þannig að það er ákveðinn léttir að sleppa taki af sköpunarverkinu. Nú get ég byrjað að skapa meira,“ segir hún.

Hún segir lögin á plötunni ná að fanga flest allt sem hún hefur verið að upplifa og hugsa síðustu árin.

„Platan er eins konar tímalína á einhvern óútskýranlegan hátt. Hún byrjar á laginu The End og endar á laginu Water sem er nýjasta lagið á plötunni og nær að binda saman allt það sem hin lögin fjalla um. Þetta er plata um tilfinningar og vatn er eins og tilfinningar að svo mörgu leyti. Vatn er alls staðar. Vatn er lífsnauðsynlegt og á sama tíma lífshættulegt. Það mótast af umhverfi sínu og umhverfið mótast af því. Sjórinn verður úfinn og sjórinn verður spegilsléttur.“

Stefnir á fleiri plötur

Water mun koma út á vínyl á næstu vikum og þá stefnir Salóme á að efna til veislu.

„Tíminn einn mun leiða í ljós hvernig því verður háttað. Ég fékk magnað listafólk til liðs við mig við að skapa umgjörðina um vínylinn en ljósmyndarinn Kata Jóhanness tók kápumyndina, listakonan Gabríela Friðriks gerði verk sem munu skreyta umslagið og vínylinn sjálfan og grafíski hönnuðurinn Anton Kaldal sá svo um að setja þetta allt saman og gera plötuna að vönduðum og eigulegum grip,“ segir hún.

Salóme stefnir á að gefa út tónlistarmyndband við titillag plötunnar á næstunni með Kötu Jóhanness og listakonunni Moniku Kiburytė.

„Svo langar mig auðvitað til þess að skipuleggja alls konar tónleikaferðir og viðburði sem geta hjálpað fólki að heyra þessa plötu. Því ég vil að fólk heyri þessa plötu, ég held það gæti fílað hana. Og svo ætla ég að gera fleiri plötur. Fullt af þeim.“

Water er hægt að nálgast á öllum helstu streymisveitum. Vínylútgáfan verður svo fáanleg í öllum helstu plötuverslunum innan skamms.