Bryndís Stella Birgisdóttir innanhússhönnuður, sem ávallt er kölluð Stella, er mikill fagurkeri og nýtur þess að hafa fallegt í kringum sig, sérstaklega á aðventunni. Hún heldur í þann sið að skreyta fyrir hverja aðventu en á það til að skipta um þema og liti.

„Ég nýt þess að verja aðventunni með fjölskyldu og vinum. Hver jól er ég með ákveðið jólaþema sem breytist ár frá ári. Núna í ár lýsir jólaþemað í náttúrulegu ræturnar. Kanilstangir, hör, hráar greinar og silkifura eru efniviður sem falla undir þemað,“ segir Stella, sem nýtur hverrar stundar þegar hún setur upp aðventuna.

Leirbrúnir litir og hráleiki leika stórt hlutverk í jólaþemanu í ár hjá Stellu. Voffi lætur fara vel um sig á gólfinu þar sem horft er úr eldhúsinu.

Þegar Stella er spurð hvar hún hafi fengið innblásturinn að uppstillingunum segist hún hafa verið heilluð af ákveðnum litum sem hafi komið hugarfluginu af stað. „Leirbrúnir litir og hráleikinn heilla mikið og voru kveikjan að uppstillingunum,“ segir Stella, sem hefur næmt auga fyrir fallegum og frumlegum uppstillingum sem fanga augað.

Sófi og mismunandi hægindastólar. Skemmtilegt að brjóta upp stílinn.

„Hlutir sem koma úr ólíkum áttum mynda eina heild þegar þeim er raðað rétt saman. En ég nota vasa, luktir og potta sem ég hef átt til margra ára sem hluta af þemanu,“ segir Stella og finnst skipta máli að geta nýtt þá hluti sem þegar eru til staðar og það þurfi alls ekki að kaupa allt nýtt.

Stella leggur mikla áherslu á samveruna um jólin. „Jólin eru fyrst og síðast kærkominn tími til að styrkja fjölskylduböndin og létta okkur lífið í svartasta skammdeginu. Kertaljós, greniilmur og nærvera vina og fjölskyldu er það sem nærir sálina. Jólahátíðin minnir okkur á sigur ljóssins yfir myrkrinu.“

Glæsilegt baðherbergi hjá Stellu.
Stofan er mjög rúmgóð og nýtist vel.
Jólaskrautið er lágstemmt en hlýlegt og nýtur sín vel hjá Stellu.
Leirbrúnu tauservíetturnar koma vel út á hátíðarborðinu þar sem svart, grænt og kanill koma við sögu, á móti ljósum litum.
Á efri hæðinni, sem er að hluta undir súð, er gott rými.
Eldhúsið er glæsilegt, en hægt er að loka því alveg.