„Komst Jack ekki fyrir á hurðinni? “ er spurning sem flestir sem hafa séð kvik­myndina Titanic hafa spurt sig að. Núna eru 25 ár síðan Titanic kom á hvíta tjaldið og í til­efni þess á­kvað leik­stjórinn James Ca­meron að binda enda allar um­ræður um þetta með skemmti­legri til­raun.

Kvik­myndin Titanic fjallar um sam­nefnt skip sem sökk árið 1912 á leið sinni til Banda­ríkjanna frá Bret­landi, með þeim af­leiðingum að 2224 manns létu lífið.

Titanic sló í gegn um heim allan og var hún um tíma tekju­hæsta kvik­mynd allra tíma. Hins vegar hefur endirinn á myndinni alltaf farið illa í suma áhorfendur og vilja þeir meina að það hafi verið nóg pláss á hurðinni sem Rose lá á þar til henni var bjargað. Á meðan sökk Jack niður í hyldýpið í einu sorglegasta atriði kvikmyndasögunnar.

Í þættinum Good Morning America var sýnt brot úr heimildar­myndinni Titanic: 25 Years Later with James Ca­meron. Þar var gerð til­raun um hvort karakterinn Jack, sem leikinn var af Leonar­do DiCaprio hefði getað komist fyrir á hurðinni með Rose, sem lékin var af Kate Win­s­let.

Í kjöl­far til­raunarinnar sagði Ca­meron að Jack hefði örugg­lega getað lifað af í ein­hverja klukku­tíma hefði hann fengið að komast á hurðina með Rose. Einnig hefði hann mögulega komist í björgunarbát hefði Rose gefið honum björgunarvestið sitt. Cameron út­skýrði þó að hugsunar­ferli Jack hefði verið að stofna ekki lífi Rose í hættu.

Ca­meron er ekki eini sem hefur í­trekað fengið spurninguna af hverju Jack komst ekki fyrir á hurðinni, en Leonar­do DiCaprio hefur þurft að þola stöðugt á­reiti vegna þessa um­deilda máls.