Við viljum að upplifunin af því að koma inn í verslun Blush sé þægileg og upplífgandi. Verslunin verður ekki eins og margir ímynda sér kynlífstækjaverslun. Hér verður ekkert ögrandi eða óþægilegt sýnilegt heldur bara fallega upp sett verslun með þægilegu andrúmslofti,“ segir Gerður en nýja verslunin er 180 fermetrar og að mati Gerðar stærsta og glæsilegasta kynlífstækjaverslunin sem opnuð hefur verið á Íslandi.

Mikilvægt að hafa trú á sér

Gerður stofnaði Blush árið 2011. 

„Ég var 21 árs, í fæðingarorlofi og ekki með fasta vinnu sem beið mín að því loknu. Mig langaði því að búa til eitthvað sjálf sem gæti veitt mér frelsi til að vinna heima. Þá datt ég niður á þá hugmynd að stofna kynlífstækjaverslun sem höfðaði til kvenna. Mig langaði líka að setja andlit við verslunina þannig að fólk vissi hver ætti hana og þar með minnka það tabú sem hefur loðað við þennan geira.“

Gerður segir að það hafi tekið sig langan tíma að taka af skarið. 

„Ég hafði allar afsakanir í bókinni. Ég hafði enga menntun, rétt náði að koma mér í gegnum grunnskóla og hætti fljótlega í framhaldsskóla. Þó almennt nám hafi ekki hentað mér á þeim tíma vissi ég samt að ég gæti tekist á við eitthvað krefjandi og skemmtilegt. Það mikilvægasta sem maður þarf til að ná árangri er að hafa óbilandi trú á sjálfum sér, passlegt magn af kæruleysi og flottan hóp af fólki sem hefur eitt og sama markmiðið, að láta þetta ganga vel,“ segir Gerður og segist heppin. 

„Þó kynlífstæki séu fyrir marga tabú þá hafa foreldrar mínir alltaf staðið 110 prósent við bakið á mér.“

Jafnt keypt á netinu og í búðinni

Gerður segist ekki hafa haft mikla reynslu af kynlífstækjum þegar hún byrjaði í bransanum. „En ég fann að það var vöntun á þessu konsepti.“

Fyrstu árin var verslunin smá í sniðum. „Ég vann ein í fyrirtækinu og sá um allan reksturinn. Svo smátt og smátt áttaði ég mig á því að ég væri ekki best í öllu og því betra að fá sérfræðinga til að sjá um hluti eins og bókhald og grafíska hönnun. Ég fann að þegar ég kyngdi stoltinu og játaði að ég gæti ekki allt, þá fóru hlutirnir að gerast hratt og fyrirtækið stækkaði ört.“

Hún segir ýmislegt hafa komið sér á óvart. Til dæmis að netverslunin varð ekki áberandi stærst. „Ég átti von á því enda fólk stundum feimið við þetta málefni. En það er áberandi hvað selst jafnt í búðinni og á netinu. Mörgum þykir líka gaman að koma og skoða og fá upplýsingar um hvernig vörurnar virka,“ segir Gerður en hún segir viðskiptavini sína afar fjölbreytta. 

„Það er engin sérstök týpa eða sérstakur aldurshópur sem er meira áberandi. Hingað koma jafnt konur sem karlar og fólk á öllum aldri. Það sem þessi hópur á sameiginlegt er að hann veit að grunnþörf mannsins er að finna fyrir ást og tengingu í gegnum kynlíf. Hann áttar sig á mikilvægi kynlífs og hvað gott kynlíf getur haft jákvæð áhrif á sambönd.“

Úrval fyrir karla eykst

Blush býður upp á 800 mismunandi vörur. En hvað er vinsælast? „Vinsælasta tækið fyrir konur hefur síðustu þrjú ár verið Womanizer sem er sambland af djúpum titringi og léttu sogi sem er hugsað til að örva snípinn. Fyrir karla er það tæki sem heitir Piston,“ svarar Gerður. Hún segir tækin notuð bæði af pörum til að bæta kynlífið eða af einstaklingum.

Mest er úrvalið af tækjum fyrir konur enda var það upphaflega hugmyndin á bak við verslunina að auka úrvalið til þeirra. „Með tímanum hefur úrvalið fyrir strákana aukist mikið. Við finnum fyrir mikilli eftirspurn og gaman að þeir skuli vera farnir að taka við sér.“

Upphaflega bauð Blush aðeins upp á heimakynningar en þær hafa alltaf verið afar vinsælar. Á síðasta ári fóru starfsmenn Blush til dæmis í þúsund slíkar.

„Kynningarnar fara þannig fram að við komum frítt í heimahús, kynnum vörurnar og svo hafa allir tækifæri til að versla á eftir og fara glaðir heim,“ segir Gerður og bendir á að viðburðurinn sé skemmtileg blanda af fróðleik og skemmtun. Oftast taki kvennahópar sig saman og fái heimakynningu, oft í tengslum við gæsanir. „Líklega er helmingurinn af öllum heimakynningum fyrir gæsahópa enda er rosalega mikið að gera hjá okkur á sumrin. Á veturna er rólegra og þá koma saumaklúbbarnir sterkir inn.“

Gerður segir margt hafa breyst á þeim átta árum sem hún hefur starfað í geiranum. 

„Þegar ég byrjaði fyrir átta árum fannst fólki skrítið þegar ég sagðist selja kynlífstæki og ég fann að fólki fannst það óþægilegt og var feimið að tala við mig. Í dag áttar fólki sig á því að kynlíf og kynlífstæki eru ekki lengur tabú enda kom fram í nýlegri könnun að 70 prósent Íslendinga á aldrinum 25 til 45 ára hafa átt eða prófað kynlífstæki.“