Sólveig Andrea Jónsdóttir innanhússarkitekt tók að sér að endurhanna útsýnisíbúð á besta stað við Arnarnesvoginn í Garðabæ. Útkoman var stórglæsileg. Í þættinum Matur og heimili fengu áhorfendur innsýn í hönnun íbúðar sem Sólveig Andrea gerði í samráði við húsráðendur sem vildu setja sinn brag á íbúðina.

„Innblástur í hönnun minni kemur oft með fólkinu sjálfu, staðsetningu og fleiru. Enda er maður alltaf að hanna fyrir fólkið sem býr á staðnum og bæta við þekkingu sína og reynslu,“ segir Sólveig Andrea, spurð um hvað fylli hana andagift þegar kemur að hönnun.

Létt yfirbragð og hlýleiki einkenna glæsilega íbúðina sem Sólveig Andrea hannaði í samstarfi við eigendur hennar. FRÉTTABLAÐIÐ/ANTON
Úr stofunni er stórkostlegt og óhindrað útsýni yfir Arnarnesvoginn. FRÉTTABLAÐIÐ/ANTON

Léttleikinn í fyrirrúmi og ­persónulegur heimilisstíll

„Þessi íbúð var öll tekin í gegn, allt var rifið út og nýtt sett inn í staðinn, með það að markmiði að létta á rýminu og láta stórfenglegt útsýnið njóta sín til fulls. Einnig til að láta persónuleika þeirra sem hér búa blómstra og fá heildarmynd á allt rýmið,“ segir Sólveig Andrea, sem hefur mikla ástríðu fyrir starfi sínu og blómstrar í hverju einasta verkefni sem hún tekur sér fyrir hendur.

Eldhúsinnréttingin er sérsmíðuð eftir hönnun Sólveigar Andreu. Stór eyjan skapar gott vinnurými. FRÉTTABLAÐIÐ/ANTON
Sérsmíðaðar innréttingar og skilrúm úr sama við gefa vistarverunum hlýlegt og fagurt yfirbragð. FRÉTTABLAÐIÐ/ANTON

Falleg viðarinnrétting í ljósum lit í forgrunni

Vel gekk að vinna verkið því hönnunarferlið var skýrt.

„Þar sem skipulagið á íbúðinni var gott þegar við hófum ferlið var engin þörf á að rífa niður veggi. Íbúðin er björt með fallegu útsýni en að öðru leyti þurfti að taka hana alla í gegn,“ segir Sólveig Andrea.

Hvaða efniviður og litatónar eru í forgrunni?

„Við völdum gullfallega Warm Oak-innréttingu frá BYKO og í framhaldinu ákváðum við að halda áfram með þann við í öðrum innréttingum og halda því sem rauðum þræði gegnumgangandi í allri íbúðinni.“

Sólveig Andrea er útsjónarsöm og bætti við sérsmíðuðum innréttingum í stíl við eldhúsinnréttinguna.

„Ég fór með hillu úr eldhúsinnréttingunni á smíðaverkstæðið Fagus og fékk þá til liðs við mig að vinna verkið. Þeir eru snillingar og sérsmíðuðu bæði hurðir, rimla og aðrar innréttingar úr sama viði eftir minni hönnun.“

Sólveig Andrea lét sérsmíða bókahillu í koníaksstofuna sem hún segir skapa fallega heild og setja punktinn yfir i-ið. FRÉTTABLAÐIÐ/ANTON
Séð inn í koníaksstofuna þar sem unun er að láta fara vel um sig. FRÉTTABLAÐIÐ/ANTON

Skapar fallega heild á íbúðinni

Ein leiðin til að létta á rýminu og leyfa útsýni yfir Arnarnesvoginn að njóta sín betur í stofunni var að taka í burtu ofna sem voru við gluggana.

„Allir ofnar voru teknir út og í staðinn settur hiti í gólfið en með því að gera það njóta gluggarnir sín í stofunni margfalt betur,“ segir Sólveig.

Það má með sanni segja að þar sé lifandi málverk sem breytist dag frá degi og nostalgía fyrir heimilisfólkið að njóta.

Sólveig Andrea hannaði einnig fallega koníaksstofu.

„Ég lét sérsmíða bókahillu á allan vegginn í koníaksstofunni til að hafa bækur, punthluti og lýsingu sem kemur mjög vel út og gerir rýmið áhugavert og fallegt. Þar er einnig gaman að sitja og njóta. Mér finnst þetta setja punktinn yfir i-ið og skapa fallega heild á allri íbúðinni.“

Öll lýsing í íbúðinni var endurhönnuð og skipt var yfir í þráðlausa lýsingu sem er í takt við nútímann og er mikill kostur að geta stýrt allri lýsingu beint úr símanum.

„Ég hannaði lýsinguna eins og ég sá hana fyrir mér. Ég vildi taka niður loftið yfir eyjunni til að ramma inn eldhúseyjuna og fá betri vinnulýsingu. Ingi hjá Lumex hjálpaði okkur að finna réttu ljósin sem hentuðu fyrir þetta tiltekna verkefni,“ segir Sólveig Andrea.

Baðherbergið er glæsilegt, með sérsmíðaðri innréttingu eftir hönnun Sólveigar Andreu. FRÉTTABLAÐIÐ/ANTON

Góð nýting á rými í hjónasvítunni

Hjónasvítan kemur vel út og það er gaman að sjá útfærslu á rennihurðum og góða nýtingu á rýminu.

„Hjónasvítan var með sér baðherbergi sem þurfti að taka í gegn. Við ákváðum því að taka af hurð sem var þar fyrir og setja í staðinn rennihurð svo að plássið nýtist betur. Fagus sá um að sérsmíða rennihurðina ásamt innanstokksmunum, náttborð og skáp eftir minni hönnun. Allt til að halda fallegum heildarsvip á íbúðinni.“

Í hjónasvítunni voru sérsmíðaðar hirslur, náttborð og rennihurðir úr warm oak-við sem er rauður þráður í íbúðinni. FRÉTTABLAÐIÐ/ANTON

Ráðgjöf hjá fagaðilum mikilvæg

Sólveig Andrea er með svörin á hreinu þegar hún er innt eftir því hvað sé mikilvægast þegar ráðist er í stóra framkvæmd eins og þessa.

„Mér finnst mikilvægt að leita aðstoðar hjá fagaðilum, hvort sem um er að ræða heila hæð, hús, eldhús eða baðherbergi. Þeir eru að gera þetta alla daga, vita hvar vörur fást, hvert á leita og hvar úrvalið er gott. Einnig sjá þeir hvað betur má fara og hvernig hægt er að nýta rýmin best, hvernig heildin verður og reyna oftast að halda rauðum þræði í öllu hönnunarferlinu til að fá sem fallegustu heildarmyndina.“

Sólveig Andrea bendir jafnframt á að flestir iðnaðarmenn geti útvegað og fengið góða afslætti og sambönd við aðra fagaðila á sínum snærum.

„Það er mjög þægilegt fyrir alla að vera með teymi með sér og við fengum með okkur verktakann G Verk sem sá um verkefnið frá a til ö.“

Hægt er að fylgjast með Sólveigu Andreu á Facebook @solveigandreainnanhussarkitekt og Insta­gram @solveig.innanhussarkitekt