Tanya segir að þegar fyrst hafi borist fregnir af því að Covid-19 farsóttin væri komin til landsins hafi eldra fólkið sem æfir reglulega hjá Heilsuskólanum dregið sig í hlé og haldið sig heima. „Það var auðvitað ekki skynsamlegt að þau væru að mæta í hóptíma. Mér fannst ég verða að finna einhverja lausn svo þau gætu hreyft sig áfram. Ég byrjaði því með beinar útsendingar af öllum tímunum mínum, þótt það hafi enn þá verið fullt af fólki í salnum hjá mér,“ segir Tanya. „Fólkið sem þurfti að halda sig heima var þakklátt og fann gleði sína á ný í því að geta verið með okkur og gert sömu æfingar þótt það væri fjarri. Þegar samkomubannið var sett á var ég búin að þróa beinu útsendingarnar og tímarnir gátu haldið áfram í gegnum tölvuna eða sjónvarpið heima. Þetta bjargaði alveg deginum enda er þetta samlyndur hópur. Allir nemendur Heilsuskólans nota beinu útsendingarnar. Þetta eru mismunandi hópar á mismunandi námskeiðum. Fit & Fabulous námskeið fyrir konur, Stretch & Shape teygjur og mjúkt jóga fyrir dömur og herra, Ballet Fitness fyrir ballerínur og svo margir mismunandi danshópar fyrir styttra eða lengra komna,“ útskýrir hún.

Eldri borgarar í zumba

Tanya segir að allir geti skráð sig á námskeið og verið með. „Þegar fólk hefur skráð sig fær það aðgang að beinu útsendingunum auk þess sem það fær aðgang að upptökum af öllum æfingunum til að gera heima hjá sér seinna þegar því hentar. Svo þetta er miklu meira en bein útsending,“ segir hún. „Þetta eru skrítnir tímar sem við erum að upplifa. Ég trúi því að þetta ástand sé tímabundið og það mun birta til. Vorið og sumarið koma sterkt inn og lífið heldur áfram eins og áður með allri sinni gleði, fjöri, sól og fuglasöng.“

Tanya er sæl og glöð yfir að nemendur hennar geti haldið áfram að æfa líkamsrækt þótt skólanum hafi verið lokað. Nemendur hennar eru ekki síður ánægðir með þetta framtak og eru duglegir að taka þátt. FRÉTTABLAÐIÐ/SIGTRYGGUR ARI

Tanya hefur kennt eldri borgurum zumba og nú eru þeir tímar líka komnir á netið. „Ég kenni Zumba Gold námskeið á mörgum stöðum í ýmsum hverfum á höfuðborgarsvæðinu og þar sem þetta er fyrir eldri borgara þá eru þeir viðkvæmastir í þessu ástandi. Ég sá snemma að ég þyrfti að finna lausn, svo Zumba Gold hóparnir mínir myndu geta haldið áfram að dansa, þrátt fyrir að þeir megi ekki hittast í eigin persónu. Nú streymi ég dansæfingunum okkar daglega í öllum hópunum. Við spjöllum mikið saman á Facebook, svo enginn sé einmana. Elsti Zumba Gold dansarinn hjá mér er 86 ára gamall og ef hann getur verið nógu tæknivæddur til að tengjast netinu, æft rafrænt og notið góðs af, þá ættu flestir að geta þetta. Það eru bæði konur og menn sem æfa og dansa í Heilsuskólanum. Á meðan ástandið er svona, er eina lausnin að hafa beinar útsendingar með mér og svo upptökur til að endurtaka rútínurnar eftir á, hvenær sem fólki hentar. Við spjöllum líka mikið saman á Facebook.

Ekki æfa á náttfötunum

Við eigum öll að vera klædd skemmtilegum æfingafötum, við æfum ekki í náttfötunum, dömurnar setja alltaf varalit á sig, alveg eins og þegar við fórum út úr húsi til að mæta á æfingu. Og síðasta samþykkta reglan okkar er að hver og einn iðkandi setur sjálfu af sér í hvert skipti í Facebook-hópinn í æfingafötunum, svo við getum „séð“ hvert annað. Þetta fyrirkomulag virkar mjög vel og gefur okkur tilfinningu um eðlilegan hversdagsleika. Auk þess er svo skemmtilegt og gefandi að æfa, hreyfa sig og gleyma sér í smá stund. Það hjálpar okkur við að detta ekki niður í þunglyndi, einmanaleika, andlega einangrun eða depurð,“ segir Tanya.

Tanya er litríkur persónuleiki og segir að nemendurnir megi ekki vera á náttfötunum heima, heldur eigi þeir að klæða sig upp.

Hún segir að allir ættu að gera heimaæfingar. Það hjálpi mikið að standa upp reglulega ef fólk er að vinna heima og gera léttar teygjur eða nokkrar snöggar erfiðari æfingar. „Það er gott til að þjálfa hjartað, lungum og örva blóðrásina,“ segir hún. „Ég mæli með stuttum æfingalotum, fimm til sex sinnum á dag. Það hjálpar líka að fara í göngutúr og fá ferskt loft. Við þurfum að reyna að lifa eins eðlilegu lífi og hægt er á þessum tímum. Það er hægt að nota stól heima til að teygja á og mýkja háls, bak, herða- og axlasvæði. Ég mun setja upp á næstu dögum vef- og Facebook-síðu Heilsuskólans með stólaæfingum og teygjum sem verða aðgengilegar fyrir alla. Einnig er mikilvægt að huga vel að mataræðinu. Sumir fá þá tilfinningu að það sé alltaf helgi og gleyma sér fyrir framan sjónvarpið með nasl og gos. Við eigum frekar að borða meira grænmeti og ávexti og drekka nóg að vatni. Það má elda góðan mat á hverjum degi enda um að gera að njóta og læra nýja rétti,“ segir hún.

Dýrmæt samskipti

Það er mjög hressandi og frískandi að fara út í göngutúr en það er ekki markviss þjálfun. Við þurfum að gera meira en það til að halda okkur í formi. Styrktar- og þolæfingar eða dans er góður kostur til að láta hjartað slá hraðar. Mjúkar jógaæfingar eða hugleiðsla eru streitulosandi. Börnin eiga endilega að taka þátt í æfingunum með foreldrum en með því skapast skemmtileg fjölskylduminning. Að dansa saman getur gert kraftaverk í því að láta sér líða vel. Það hjálpar mér mikið að vera í sambandi við fólkið mitt. Þessi dýrmætu samskipti við fólk gera mér gott jafnt og þeim,“ segir Tanya og bendir á að fólk geti notað YouTube-tónlistarmyndbönd til að dansa saman. „Á eftir er hægt að setjast niður og horfa á létta gamanmynd, við getum stytt okkur stundir með myndum eins og National Lampoon’s Vacation, National Lampoon’s Christmas Vacation og Vegas Vacation. Ég greinilega elska Chevy Chase,“ segir hún.

Tanya borðar ekki kjöt en gefur hér lesendum uppskrift að búlgörskum rétti sem er gerður úr eggaldini en rétturinn er mjög vinsæll í Búlgaríu. „Það er gaman að prófa eitthvað nýtt og spennandi. Mér finnst líka gaman að prófa mig áfram með alls konar kryddum.“