Katrín Halldóra Sigurðardóttir, leik- og söngkona, hefur gengið til liðs við Þjóðleikhúsið. Hún hefur vakið mikla athygli síðustu ár fyrir frammistöðu sína sem Ellý Vilhjálmsdóttir í sýningunni Ellý Borgarleikhúsinu.

Áður en hún sló í gegn í Borgarleikhúsinu lék hún hjá Þjóðleikhúsinu, m.a. í hinni vinsælu sýningu Í hjarta Hróa Hattar.

Katrín Halldóra sem Ellý.
Mynd/Borgarleikhúsið

Fram kemur í tilkynningu frá leikhúsinu að Katrín, líkt og aðrir listamenn Þjóðleikhússins, sé þegar komin á fullt í undirbúningi fyrir næsta leikár. Á meðal verkefna hennar verða meðal annars stórt hlutverk í söngleiknum Sem á himni sem Unnur Ösp Stefánsdóttir leikstýrir en þar munu alls 25 leikarar taka þátt auk 12 manna hljómsveitar. Þá mun hún takast á við nýlegt verk eftir Caryl Churchill, Ást og upplýsingar, sem Una Þorleifsdóttir leikstýrir, í þýðingu Auðar Övu.

Undanfarið hafa margir listamenn bæst í fastan hóp listamanna hússins og má þar nefna Unni Ösp Stefánsdóttur, Kristínu Þóru Haraldsdóttur, Hilmi Snæ Guðnason, Hilmar Guðjónsson, Ólaf Egil Egilsson, Ilmi Stefánsdóttur, Björn Berstein Guðmundsson og Hrafnhildi Hagalín. Það er mikill fengur fyrir Þjóðleikhúsið að hafa nú slíka leik- og söngkonu í sínum röðum.