Það eru fáir ef einhverjir jafn samofnir hugmyndinni um svokallaðan grugg-klæðaburð (e. grunge) og tónlistarmaðurinn sálugi Kurt Cobain. Eitt af því sem einkenndi hann var úfið og tætt ljóst hár og notaður, oft rifinn, fatnaður.

Klæddur hlýlegri ullarpeysu í viðtali í Japan árið 1992. MYND/GETTY

Ein skýringin á því hvers vegna hann klæddist svo oft notuðum fatnaði hefur verið sögð stafa af auraleysi en einnig hefur verið sagt að þetta hafi verið hans leið til þess að gefa skít í auðvaldið, eins konar and-tíska.

Hlýjar ömmupeysur

Kurt sótti í hlýjar, notaðar peysur, oft úr ull, enda ólst hann upp í hinni vætusömu Seattle og því vanur að klæða sig vel. Peysunum hefur verið lýst sem svokölluðum „ömmupeysum“. Hann var líka gjarnan í flannelsskyrtum og síðerma bolum. Skyrtur og bolir sem hann klæddist voru margir prýddir röndum og jafnvel blómamynstri.

Á tónleikum í stórri röndóttri og rifinni síðermapeysu. MYNDir/GETTY

Gallabuxur virðast oftast hafa orðið fyrir valinu hjá honum, yfirleitt tættar, rifnar og vel notaðar. Það er óneitanlega hálf dapurlegt að gera sér í hugarlund hver viðbrögð hans við fjöldaframleiðslu á rifnum gallabuxum í dag yrðu. Þá eru til nokkrar myndir af honum í teinóttum náttfötum, að því er virðist þeim einu og sömu, á sviði jafnt sem uppi í rúmi.

Í teinóttu náttfötunum og peysu ásamt hljómsveitarmeðlimum sínum í Nirvana. MYND/GETTY

Converse-skór einkenndu skóbúnað hans og var hann gjarnan með stór sólgleraugu, iðulega í „kvenstíl“, en það sem var áreiðanlega hvað áhugaverðast við klæðaburð hans er það hversu oft hann klæddist kvenfatnaði og þá ekki síst kjólum.

Pissað á karlmennskuna

Sjálfur ræddi Cobain oft karlmennskuna og að hann hefði ungur átt erfitt með að tengjast öðrum drengjum og hefði frekar sóst í félagsskap stúlkna. Margir hafa bent á femínískan tón í hugsunarhætti hans og sjá má mörg dæmi þess í textagerð hans.

Á verðlaunahátíð MTV ’92, í bol með mynd sem prýddi hulstur kassett­unnar „Hi How Are You: The Unfinished Album“ eftir Daniel Johnston.

Á smáskífunni Blew frá árinu 1989 er að finna lagið „Been a Son“ sem sagt er vera eitt fyrsta dæmi um gagnrýni hans á karlrembuleg viðhorf. Þar syngur hann út frá sjónarhorni föður sem óskar þess að dóttir hans hefði fæðst sem strákur. Boðskapur lagsins er að mörgu leyti tímalaus þar sem bæði sögulega og í samtímanum er því miður enn að finna alltof mörg dæmi um það að sveinbörn eru talin eftirsóknarverðari en meybörn, oft með hræðilegum afleiðingum.

Í kjól með Pétur Pan-kraga árið ’91.

Í laginu „Territorial Pissings“, sem vísar í þá athöfn þegar dýr merkja sér svæði, oft tengt við og notað sem samlíking á tilhneigingu karlmanna til þess að sýna fram á völd sín í nafni karlmennskunnar, söng hann: „Hef aldrei hitt vitran mann, ef svo, þá er það kona.“

Kurt klæddist oft kjólum og er til fjöldi tilkomumikilla mynda af honum í kjólum af ýmsu tagi.

Ljóst er að hægt er að túlka klæðaburð Cobains á marga þýðingarmikla vegu en annað sem var áberandi og einkennandi í fari Cobains var það hversu oft hann klæddist sömu flíkunum eins og sjá má á mörgum myndum. Er það nokkuð sem flest okkar mættum svo sannarlega taka til fyrirmyndar.

Á tónlistarmyndbandahátíð MTV ’93, í röndótta bolnum sem hann notaði oft og rifnum gallabuxum.